ନୂଆଦିଲ୍ଲୀ: ଅଡୁଆରେ ବଲିଉଡ ଅଭିନେତା ସନ୍ନି ଦେଓଲ । 'ଗଦର ୨'ର ତାର ସିଂଙ୍କ ଉପରେ ଠକେଇ ଓ ମିଥ୍ୟା ପ୍ରତିଶ୍ରୁତିର ଅଭିଯୋଗ ଆସିଛି । ବଲିଉଡ ପ୍ରଯୋଜକ ସୌରଭ ଗୁପ୍ତା ଅଭିନେତାଙ୍କ ବିରୋଧରେ ଠକେଇ, ଜୋରଜବରଦସ୍ତି ଆଦାୟ ଏବଂ ଜାଲିଆତି ଅଭିଯୋଗ ଆଣିଛନ୍ତି । କେବଳ ଏତିକି ନୁହେଁ ସେ ତାଙ୍କ ପ୍ରତିଶ୍ରୁତି ପାଳନ କରିନଥିବା ଅଭିଯୋଗ କରିଛନ୍ତି । ସାଉଣ୍ଡାଉନ୍ ଏଣ୍ଟରଟେନମେଣ୍ଟ ପ୍ରାଇଭେଟ୍ ଲିମିଟେଡର ସୌରଭ ଗୁପ୍ତା ଦାବି କରିଛନ୍ତି ଯେ, ୨୦୧୬ ରେ ସେ ତାଙ୍କ ଫିଲ୍ମରେ ମୁଖ୍ୟ ଭୂମିକା ପାଇଁ ସନ୍ନି ଦେଓଲଙ୍କ ସହ ୪ କୋଟି ଟଙ୍କାରେ ଚୁକ୍ତି ସ୍ବାକ୍ଷର କରିଥିଲେ । ବର୍ତ୍ତମାନ କୋଟି କୋଟି ଟଙ୍କାର ଏହି ଡିଲରେ ହୋଇଥିବା ପରିବର୍ତ୍ତନକୁ ନେଇ ଅଭିଯୋଗ ଆଣିଛନ୍ତି । 

ପ୍ରଯୋଜକ ସୌରଭ ଗୁପ୍ତା କହିଛନ୍ତି ଯେ, ୨୦୧୬ ମସିହାରେ ସନ୍ନି ଦେଓଲ ତାଙ୍କର ଗୋଟିଏ ଚଳଚ୍ଚିତ୍ର ପାଇଁ ଦସ୍ତଖତ କରିଥିଲେ ଏବଂ ଏଥିପାଇଁ ଅଭିନେତା ମଧ୍ୟ ତାଙ୍କଠାରୁ ୪ କୋଟି ଟଙ୍କା ନେଇଥିଲେ । ସେ ସନ୍ନି ଦେଓଲଙ୍କୁ ୧ କୋଟି ଟଙ୍କା ଅଗ୍ରୀମ ଦେଇଥିବା ବେଳେ ପରେ ୨.୫୫ କୋଟି ଅଭିନେତା ନେଇଥିଲେ । ତଥାପି ସନ୍ନି ଦେଓଲ ଫିଲ୍ମର ସୁଟିଂ ଆରମ୍ଭ କରିନାହାଁନ୍ତି ଏବଂ ଏହା ବଦଳରେ ୨୦୧୭ରେ ଫିଲ୍ମ ‘ପୋଷ୍ଟର ବଏଜ’ର ସୁଟିଂ ଆରମ୍ଭ କରିଥିଲେ । 

ସୌରଭ ଗୁପ୍ତା ଆହୁରି କହିଛନ୍ତି ଯେ, ୨୦୨୩ ମସିହାରେ ସନ୍ନି ଦେଓଲ ତାଙ୍କ କମ୍ପାନୀ ସହିତ ଏକ ଜାଲିଆତି ଚୁକ୍ତି କରିଥିଲେ । ଆଉ 'ଯେତେବେଳେ ଆମେ ଏଗ୍ରିମେଣ୍ଟ ପେପର ପଢିଥିଲୁ ସେତେବେଳେ ସନ୍ନି ମଝି ପୃଷ୍ଠା ବଦଳାଇ ଦେଇଥିଲେ, ଆଉ ଫି ପରିମାଣକୁ ୪ କୋଟିରୁ ୮ କୋଟି ଟଙ୍କାକୁ ବୃଦ୍ଧି କରିଥିଲେ । ଏହି ମାମଲାରେ ଜାଲିଆତି ଅଭିଯୋଗରେ ସେ ସନ୍ନି ଦେଓଲଙ୍କ ବିରୋଧରେ ପୋଲିସ୍ ଅଭିଯୋଗ କରିଛନ୍ତି।