ଚେନ୍ନାଇ: ଇଣ୍ଡିଆନ୍ ପ୍ରିମିୟର ଲିଗ୍ ୨୦୨୪ର କ୍ବାଲିଫାୟର ୨ ମ୍ୟାଚ୍ରେ ରାଜସ୍ଥାନ ଏବଂ ହାଇଦ୍ରାବାଦ ଲଢ଼େଇ ଜାରି ରହିଛି । ପ୍ରଥମେ ବ୍ୟାଟିଂ କରି ସନରାଇଜର୍ସ ହାଇଦ୍ରବାଦ ନିର୍ଦ୍ଧାରିତ ୨୦ ଓଭରରେ ୯ ଓ୍ବିକେଟ ହରାଇ ୧୭୫ ରନ୍ କରିଛି । ଆଜି ହେନରିକ କ୍ଲାସେନ୍ ସର୍ବାଧିକ ୫୦ ରନ୍ କରିଛନ୍ତି । ସେହିଭଳି ଟ୍ରେଭିସ ହେଡ୍ (୩୪), ଅଭିଶେଖ ଶର୍ମା (୧୨), ରାହୁଲ ତ୍ରିପାଠୀ (୩୭), ଏଡନ୍ ମାର୍କରମ (୧), ନିତୀଶ ରେଡ୍ଡୀ (୫), ଶାହବାଜ ଅହମ୍ମଦ (୧୮), ପାଟ କମିନ୍ସ (୫*) ଏବଂ ଜୟଦେବ ଉନଦକଟ (୫)ଙ୍କ ବଳରେ ଦଳ ରାଜସ୍ଥାନକୁ ୧୭୬ ରନ୍ର ଟାର୍ଗେଟ ଦେଇଛି ।
ଆଜିର ମ୍ୟାଚରେ ଟସ୍ ଜିତି ବୋଲିଂ ନିଷ୍ପତ୍ତି ନେଇଥିଲା ରାଜସ୍ଥାନ ରୟାଲ୍ସ । ରାଜସ୍ଥାନର ଟ୍ରେଣ୍ଟ ବୋଲ୍ଟ ଏବଂ ଆଭେଶ ଖାନ ୩ଟି ଲେଖାଏଁ ଓ୍ବିକେଟ ନେଇଥିବା ବେଳେ ସନ୍ଦୀପ ଶର୍ମା ୨ଟି ଓ୍ବିକେଟ ଅକ୍ତିଆର କରିଛନ୍ତି । ଟସ୍ ହାରି ପ୍ରଥମେ ବ୍ୟାଟିଂ କରିଥିବା ହାଇଦ୍ରାବାଦ ବ୍ୟାଟିଂ ବିର୍ଯ୍ୟୟର ସାମ୍ନା କରିଛି । ଦଳୀୟ ସ୍କୋର ୧୩ ରନରେ ଅଭିଷେଖ ଶର୍ମା ଆଉଟ ହୋଇଥିଲେ । ପରେ ପରେ ରାହୁଲ ତ୍ରିପାଠୀ, ଏଡନ ମାର୍କରମ, ଟ୍ରେଭିସ ହେଡ, ନୀତିଶ ରେଡ୍ଡୀ ଏବଂ ଅବ୍ଦୁଲ ସମଦ ପ୍ୟାଭିଲିୟନ ଫେରିଥିଲେ । ହେଲେ ହେନରିଚ୍ କ୍ଲାସେନ ଅର୍ଦ୍ଧଶତକୀୟ ପାଳି ଖେଳି ଦଳକୁ ମଜଭୁତ ସ୍ଥିତିକୁ ନେଇଥିଲେ ।
ଅନ୍ୟପଟେ ଆଜିର ମ୍ୟାଚ୍ ଉଭୟ ଟିମ୍ ପାଇଁ ବେଶ୍ ଗୁରୁତ୍ବପୂର୍ଣ୍ଣ । କାରଣ ଆଜି ଯେଉଁ ଟିମ୍ ବିଜୟୀ ହେବ ସିଧା ଫାଇନାଲରେ ପହଞ୍ଚିବ । ପ୍ରଥମ କ୍ବାଲିଫାୟରରେ ପରାଜୟ ପରେ ହାଇଦ୍ରାବାଦ ଲାଗି ଏହି ମ୍ୟାଚ୍ ଦ୍ବିତୀୟ ସୁଯୋଗ । ସେପଟେ ଏଲିମିନେଟର ମ୍ୟାଚ୍ରେ ଆରସିବିକୁ ପରାସ୍ତ କରି କ୍ବାଲିଫାୟର ୨ରେ ପହଞ୍ଚିଛି ରାଜସ୍ଥାନ । ଯଦି ଆଜି ରାଜସ୍ଥାନ ହାଇଦ୍ରାବାଦକୁ ପରାସ୍ତ କରେ ତେବେ ଫାଇନାଲକୁ ଯିବ । ଆଉ ପୂର୍ବରୁ ଫାଇନାଲକୁ ପ୍ରବେଶ କରିସାରିଥିବା କେକେଆରକୁ ଭେଟିବ କ୍ବାଲିଫାୟର-୨ର ବିଜେତା ।
