ନୂଆଦିଲ୍ଲୀ ୨୦/୦୫: ଜୁନ ୧ରୁ ୨୯ ତାରିଖ ପର୍ଯ୍ୟନ୍ତ ଉଭୟ ୱେଷ୍ଟଇଣ୍ଡିଜ ଓ ଆମେରିକାରେ ଆୟୋଜିତ ହେବାକୁ ଯାଉଛି ଟି-ଟ୍ୱେଣ୍ଟି ବିଶ୍ୱକପ୍ର ନବମ ସଂସ୍କରଣ । ମୋଟ୍ ୨୦ଟି ଦଳ ଏଥର ଭାଗ ନେଇଛନ୍ତି । ଯାହା ଟୁର୍ଣ୍ଣାମେଣ୍ଟକୁ ଅଧିକ ରୋମାଞ୍ଚିତ କରିବ ବୋଲି ଆଶା କରାଯାଉଛି । ଆଇପିଏଲ୍ ଶେଷ ହୋଇ ନଥିବାରୁ ବିଶ୍ୱକପ୍କୁ ନେଇ ଆଲୋଚନା ସେଭଳି ସରଗରମ ହୋଇ ନାହିଁ । ପ୍ରଥମ ଥର ଅସ୍ଥାୟୀ ଷ୍ଟାଡିୟମରେ ବିଶ୍ୱ ଟି-ଟ୍ୱେଣ୍ଟିର ଗୁରୁତ୍ୱପୂର୍ଣ୍ଣ ଟୁର୍ଣ୍ଣାମେଣ୍ଟ ଆୟୋଜିତ ହେବାକୁ ଯାଉଛି ।
ପ୍ରଥମ ଥର ଆମେରିକାରେ ଆୟୋଜିତ ହେବାକୁ ଯାଉଛି କ୍ରିକେଟର ମହାପର୍ବ ଟି-ଟ୍ୱେଣ୍ଟି ବିଶ୍ୱକପ୍ । ୨୦ଟି ଦଳ ଖେଳିବେ ୫୫ଟି ମ୍ୟାଚ୍। ଟୁର୍ଣ୍ଣାମେଣ୍ଟ ଜୁନ ୧ରୁ ଆରମ୍ଭ ହୋଇ ୨୯ ତାରିଖରେ ଶେଷ ହେବ । ୱେଷ୍ଟଇଣ୍ଡଜ ଓ ଆମେରିକା ମିଳିତ ଭାବେ ନବମ ସଂସ୍କରଣର ଆୟୋଜନ କରୁଛନ୍ତି ।
ଫୁଟବଲ୍, ବାସ୍କେଟ୍ବଲ୍, ବେସ୍ବଲ୍, ଆମେରିକାନ ଫୁଟବଲ୍ ଓ ଆଇସ୍ ହକି ଭଳି କ୍ରୀଡ଼ା ଆମେରିକାରେ ବେଶ ଲୋକପ୍ରିୟ । କ୍ରିକେଟର ଲୋକପ୍ରିୟତା ଅତି ନ୍ୟୂନ କହିଲେ ଚଳେ । ୨୦୨୮ ଅଲିମ୍ପିକ୍ସରେ କ୍ରିକେଟ୍ ସାମିଲ ରହିଛି । ତେଣୁ ଟି-ଟ୍ୱେଣ୍ଟି ବିଶ୍ୱକପ୍ ଆୟୋଜନ ନେଇ ଆଗ୍ରହ ପ୍ରକାଶ କରିଥିଲା ଆମେରିକା । ଆଇସିସି ମଧ୍ୟ ସାରା ବିଶ୍ୱରେ କ୍ରିକେଟ୍ର ବିକାଶ ଚାହୁଁଛି । ନବମ ସଂସ୍କରଣ ଆୟୋଜନ ନେଇ ୱେଷ୍ଟଇଣ୍ଡିଜ ଓ ଆମେରିକା ଯୁଗ୍ମ ଭାବେ ବିଡ୍ ଦାଖଲ କରିଥିଲେ । ୨୦୨୧ ନଭେମ୍ବର ମାସରେ ଆଇସିସି ଉଭୟଙ୍କୁ ଆୟୋଜକ ଘୋଷଣା କରିଥିଲା ।
ୱେଷ୍ଟଇଣ୍ଡିଜରେ ଏବେ କ୍ରିକେଟ୍ର ମାହୋଲ କିଛି ମାତ୍ରାରେ ଶିଥିଳ ପଡ଼ିଥିଲେ ବି ଭିତ୍ତିଭୂମି ରହିଛି । କେବଳ କିଛି ମାତ୍ରାରେ ପୁନରୁଦ୍ଧାରର ଆବଶ୍ୟକା ରହିଥିଲା । କିନ୍ତୁ ଆମେରିକାରେ ଅନ୍ତର୍ଜାତୀୟ ମ୍ୟାଚ୍ ଆୟୋଜନ ଭଳି ଭିତ୍ତିଭୂମି ନଥିଲା । ଫ୍ଲୋରିଡା, ନ୍ୟୁୟର୍କ ଓ ଟେକ୍ସାସରେ ବିଶ୍ୱକପ୍ ଖେଳାଯିବ । କେବଳ ଫ୍ଲୋରିଡାରେ କ୍ରିକେଟ୍ ଷ୍ଟାଡିୟମ ରହିଛି । ଟେକ୍ସାସରେ ବେସ୍ବଲ ଷ୍ଟାଡିୟମକୁ କ୍ରିକେଟ୍ ଷ୍ଟାଡିୟମର ରୂପ ଦିଆଯାଇଛି । ସେମିତି ନ୍ୟୁୟର୍କରେ ସଂପୂର୍ଣ୍ଣ ଅସ୍ଥାୟୀ ଭାବରେ ଏକ କ୍ରିକେଟ୍ ଷ୍ଟାଡିୟମ ତିଆରି କରାଯାଇଛି ।
ବରଫାବୃତ ପାର୍କରୁ ବିଶ୍ୱକପ୍ ଷ୍ଟାଡିୟମ ବିଶ୍ୱକପ୍ କ୍ରିକେଟ୍ସୂଚୀ ଘୋଷଣା ହେବା ପର୍ଯ୍ୟନ୍ତ ନ୍ୟୁୟର୍କରେ ଷ୍ଟାଡିୟମର କିଛି ଚିହ୍ନ ବର୍ଣ୍ଣ ନଥିଲା । କିନ୍ତୁ ଷ୍ଟାଡିୟମର ନାମ ରଖାଯାଇଥିଲା ନାସାଉ କାଉଣ୍ଟି ଇଣ୍ଟରନ୍ୟାସନାଲ କ୍ରିକେଟ୍ ଷ୍ଟାଡିୟମ । ଯାହାର ଦର୍ଶକ ଧାରଣ କ୍ଷମତା ୩୪୦୦୦ । ସ୍ଥାନଟି ବରଫରେ ଆବୃତ ରହିଥିଲା ।
ଗତ ଜାନୁଆରୀ ୧୨ ତାରିଖରୁ ସେହି ସ୍ଥାନରେ ଷ୍ଟାଡିୟମ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା । ଏକ ବରଫ ଆବୃତ ପାର୍କକୁ ଅନ୍ତର୍ଜାତୀୟ କ୍ରିକେଟ୍ ଷ୍ଟାଡିୟମର ରୂପ ଦିଆଯାଇଥିଲା । ବିଶ୍ୱକପ୍ର ୮ଟି ମ୍ୟାଚ୍ ଏଠାରେ ଖେଳାଯିବ । ଇତିମଧ୍ୟରେ ଷ୍ଟାଡିୟମର କାର୍ଯ୍ୟ ସମ୍ପନ୍ନ ହୋଇଛି । ବିଶ୍ୱକପ୍ରେ ଏହି ଷ୍ଟାଡିୟମ ଉପରେ ସମସ୍ତଙ୍କ ନଜର ରହିବ । କାରଣ ଟୁର୍ଣ୍ଣାମେଣ୍ଟର ସବୁଠୁ ବଡ଼ ମୁକାବିଲା ଜୁନ ୯ ତାରିଖରେ ଭାରତ-ପାକିସ୍ତାନ ମ୍ୟାଚ୍ ଏଠାରେ ଖେଳାଯିବ ।
ଷ୍ଟାଡିୟମଟି ସଂପୂର୍ଣ୍ଣ ଷ୍ଟିଲ୍ରେ ନିର୍ମାଣ ହୋଇଛି । ପୁଣି ଅସ୍ଥାୟୀ ଭାବରେ । ଗ୍ୟାଲେରୀ ପାଇଁ ଲାସ୍ ଭେଗାସର ଫର୍ମୁଲା-୧ ସର୍କିଟରେ ଥିବା ଭ୍ରାମ୍ୟମାଣ ଭିତ୍ତିଭୂମିକୁ ବ୍ୟବହାର କରାଯାଇଛି । ବିଶ୍ୱକପ୍ ଶେଷ ହେବା ପରେ ପୁଣି ବିଭିନ୍ନ ଯନ୍ତ୍ରଣାଂଶ ଖୋଲି ମୂଳ ସ୍ଥାନକୁ ବୋହି ନିଆଯାଇ ପାରିବ ।ସେମିତି ମ୍ୟାଚ୍ରେ ଯେଉଁ ପିଚ ବ୍ୟବହାର ହେବ ତାହା ଅଷ୍ଟ୍ରେଲିଆର ଆଡିଲେଡରୁ ଆସିଛି। ଯାହାକୁ ଉଠା ପିଚ କୁହାଯାଉଛି ।
ଗ୍ରୁପ୍ ଏ’ରେ ଆୟୋଜକ ଆମେରିକା ସମେତ ଭାରତ, ପାକିସ୍ତାନ, ଆୟର୍ଲାଣ୍ଡ ଓ କାନାଡ଼ା ରହିଛନ୍ତି । ଭାରତ ନ୍ୟୁୟର୍କରେ ଜୁନ ୫ରେ ଆୟର୍ଲାଣ୍ଡକୁ, ୯ରେ ପାକିସ୍ତାନକୁ ଏବଂ ୧୨ରେ ଆମେରିକାକୁ ଭେଟିବାର ସୂଚୀ ରହିଛି ।
ଆଡିଲେଡ୍ରୁ ଆସିଛି କ୍ରିକେଟ୍ ପିଚ୍ ଉଠା କ୍ରିକେଟ୍ ପିଚ ବା ଭ୍ରାମ୍ୟମାଣ ପିଚରେ ଏଥର ବିଶ୍ୱକପ୍ ଖେଳାଯିବ । ହୁଏତ ଏ କଥା ଶୁଣି ଆଶ୍ଚର୍ଯ୍ୟ ଲାଗିପାରେ, କିନ୍ତୁ କଥାଟି ସତ । ଆମେରିକାରେ ଯେଉଁ ୩ଟି ଷ୍ଟାଡିୟମରେ (ନ୍ୟୁୟର୍କ, ଫ୍ଲୋରିଡା, ଟେକ୍ସାସ) ୧୬ଟି ମ୍ୟାଚ୍ ଖେଳାଯିବ, ସବୁ ଷ୍ଟାଡିୟମରେ ଉଠା ପିଚ୍ ବିଛା ଯାଇଛି । ଆଉ ଏଥିପାଇଁ ଅଷ୍ଟ୍ରେଲିଆରୁ ପିଚ୍ ଆସିଛି ।
ସହ-ଆୟୋଜକ ଆମେରିକା ଆଡିଲେଡରୁ କ୍ରିକେଟ୍ ପିଚ୍ ମଗାଯାଇଥିଲା । ଜାହାଜରେ ପିଚ୍ ପ୍ରଥମେ ଆଡିଲେଡରୁ ବାହାରି ଫ୍ଲୋରିଡାରେ ପହଞ୍ଚିଥିଲା । ପରେ ନ୍ୟୁୟର୍କରେ ଏବଂ ସେଠାରୁ ଟେକ୍ସାସ ନିଆଯାଇଥିଲା । ଏଥିପାଇଁ ମୋଟ୍ ଜଳ ଓ ସ୍ଥଳ ପଥରେ ୨୨,୫୦୦ କି.ମି ଯାତ୍ରା କରିବାକୁ ପଡ଼ିଥିଲା ।
ଷ୍ଟାଡିୟମରେ ପିଚ ବିଛାଇବା ପାଇଁ ସ୍ୱତନ୍ତ୍ର ତାଲିମ ପ୍ରାପ୍ତ ପିଚ୍ କ୍ୟୁରେଟର ଏବଂ ଅନ୍ୟାନ୍ୟ ବିଶେଷଜ୍ଞମାନେ ଆସିଥିଲେ । ୩ଟି ଷ୍ଟାଡିୟମରେ ପିଚ୍ ବ୍ୟାଟର ନା ବୋଲରଙ୍କୁ ସହାୟତା କରିବ ତାହା ଏବେ କ୍ରିକେଟ୍ପ୍ରେମୀଙ୍କ ମନରେ ଉତ୍କଣ୍ଠା ସୃଷ୍ଟି କରିଛି ।
ଆଡିଲେଡ୍ ଓଭାଲର ପିଚ୍ କ୍ୟୁରେଟର ଡାମିଆନ ହ୍ୟୁଗ କହିଛନ୍ତି, ‘ପେସ ବୋଲର ଏବଂ ନିୟମିତ ବାଉନ୍ସ ହେଲା ଭଳି ପିଚ୍ ପ୍ରସ୍ତୁତ କରିବା ଆମର ଲକ୍ଷ୍ୟ । ବ୍ୟାଟରମାନେ ସେମାନଙ୍କ ସଟ୍ ଖେଳିବେ ।’ ବିଶ୍ୱକପ୍ ଶେଷ ହେବା ପରେ ପୁଣି ଆସନ୍ତା ଜାନୁଆରୀ ମାସରେ ପୁଣି ସମସ୍ତ ପିଚ୍ ଆଡିଲେଡ୍ ଫେରିଯିବ । ଗତ ଅକ୍ଟୋବର ମାସରେ ପିଚକୁ କିଭଳି ଗୋଟିଏ ସ୍ଥାନରୁ ଆଣି ଆଉ ଏକ ସ୍ଥାନରେ ବିଛା ଯିବ, ତାହାର ପରୀକ୍ଷଣ କରାଯାଇଥିଲା ।
