ନୂଆଦିଲ୍ଲୀ ୧୫/୦୯: ପିଲାମାନଙ୍କ ଉପରେ ବାପା ମା’ଙ୍କ ପରେ ଶିକ୍ଷକ, ଶିକ୍ଷୟିତ୍ରୀମାନଙ୍କର ଅଧିକ ପ୍ରଭାବ ପଡି଼ଥାଏ । ସେଥିଯୋଗୁ ଗୁରୁଦିବସରେ ପ୍ରାୟତଃ ଛାତ୍ରଛାତ୍ରୀମାନେ ସେମାନଙ୍କର ଗୁରୁଙ୍କୁ ଶ୍ରଦ୍ଧାରେ ଉପହାରମାନ ଦେଇଥାନ୍ତି । କିନ୍ତୁ ଚୀନ୍‌ରେ ଏହିପରି ଏକ ଘଟଣାରେ ଜଣେ ନର୍ସରୀ ସ୍କୁଲ ଅଧ୍ୟକ୍ଷ ୱାଙ୍ଗଙ୍କୁ ତାଙ୍କର ଚାକିରି ହରାଇବାକୁ ପଡ଼ିଛି । 

ଘଟଣାଟି ଚୋଙ୍ଗକିଙ୍ଗସ୍ଥିତ ସାନ୍‌କ୍ସିଆ କିଣ୍ଡରଗାର୍ଟନ୍‌ର । ଗତବର୍ଷ ଗୁରୁଦିବସରେ ୱାଙ୍ଗଙ୍କୁ ସେଠାକାର ଜଣେ ଛାତ୍ର ଭାରତୀୟ ମୁଦ୍ରାରେ ପ୍ରାୟ ୬୦ ଟଙ୍କା ମୂଲ୍ୟର ଏକ ଚକୋଲେଟ୍‌ ଡବା ଦେଇଥିଲେ । ୱାଙ୍ଗ ତାକୁ ଗ୍ରହଣ କରିବା ପରେ ଶ୍ରଦ୍ଧାରେ ପିଲାଟିକୁ କୁଣ୍ଢାଇ ପକାଇଥିଲେ । ସେହି ଚକୋଲେଟ୍‌କୁ ପରେ ସେ ଅନ୍ୟ ପିଲାମାନଙ୍କୁ ବାଣ୍ଟି ଦେଇଥିଲେ । କିନ୍ତୁ ଏହି ଘଟଣାରେ ସ୍କୁଲ କର୍ତ୍ତୃପକ୍ଷ ତାଙ୍କୁ ଚାକିରିରୁ ବାହାର କରିଦେଲେ । 

ଏହା ବିରୋଧରେ ୱାଙ୍ଗ ଜିଲ୍ଲା କୋର୍ଟଙ୍କ ଦ୍ୱାରସ୍ଥ ହେଲେ । ସେଠାରେ ସ୍କୁଲ ପକ୍ଷରୁ ଦର୍ଶାଯାଇଥିଲା ଯେ, ୱାଙ୍ଗ ଉପହାର ନେଇ ଶିକ୍ଷା ମନ୍ତ୍ରଣାଳୟର ନିୟମକୁ ଉଲ୍ଲଂଘନ କରିଛନ୍ତି । ଏହାଦ୍ୱାରା କିଣ୍ଡରଗାର୍ଟନ୍‌ରେ ନକାରାତ୍ମକ ପରିବେଶ ମଧ୍ୟ ସୃଷ୍ଟି ହୋଇଛି । ତେବେ ମାର୍ଚ୍ଚ ମାସରେ କୋର୍ଟ ୱାଙ୍ଗଙ୍କ ସମର୍ଥନରେ ରାୟ ଦେଇଥିଲେ । ଚକୋଲେଟ୍‌କୁ ଛାତ୍ରଜଣକ ଶ୍ରଦ୍ଧା ଓ ସମ୍ମାନର ସହ ଦେଇଥିବାରୁ ଏହା ନିୟମ ଉଲ୍ଲଂଘନ ନୁହେଁ ବୋଲି କହିବା ସହିତ ୱାଙ୍ଗଙ୍କୁ କ୍ଷତିପୂରଣ ଦେବାକୁ କିଣ୍ଡରଗାର୍ଟନକୁ ନିର୍ଦ୍ଦେଶ ଦେଇଥିଲେ । ନର୍ସରୀ ସ୍କୁଲ କର୍ତ୍ତୃପକ୍ଷ ଏହା ବିରୋଧରେ ଉପର କୋର୍ଟଙ୍କ ଦ୍ୱାରସ୍ଥ ହୋଇଥିଲେ । ତେବେ ଉପର କୋର୍ଟ ମୂଳ ରାୟକୁ ଅପରିବର୍ତ୍ତିତ ରଖିଛନ୍ତି ।