ନୀଳଗିରି, ୨୩/୩ : ବାଲେଶ୍ୱର ଜିଲ୍ଲା କୂଳଡ଼ିହା ଅଭୟାରଣ୍ୟ ସୀମାନ୍ତ ଗାଁରେ ଆରମ୍ଭ ହୋଇଛି କମ୍ବିଂ ଅପରେଶନ। ବନ କର୍ମଚାରୀଙ୍କୁ ଆକ୍ରମଣ ଓ ବନ୍ଧୁକ କାରଖାନା ଠାବ ହେବା ପରେ ହଜି ଯାଇଛି ବନ ବିଭାଗର ନିଦ। ଅଭୟାରଣ୍ୟ ସୀମାନ୍ତରୁ ଏପର୍ଯ୍ୟନ୍ତ ୧୫ ଜଣ ଶିକାରୀ ଗିରଫ ହୋଇଥିବା ବେଳେ ୧୮ଟି ବନ୍ଧୁକ ଓ ବ୍ୟାପକ ଗୋଳାବାରୁଦ ଜବତ ହୋଇଛି। ହେଲେ କୂଳଡ଼ିହା ବନ ବିଭାଗର ଦବଙ୍ଗଗିରି ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି। କମ୍ବିଂ ଅପରେସନ ନାଁରେ ବନ ବିଭାଗ ନିରୀହ ଆଦିବାସୀଙ୍କୁ ଅତ୍ୟାଚାର କରୁଥିବା ଅଭିଯୋଗ ଆସିଛି।

ଶୁକ୍ରବାର ବନ ବିଭାଗ କେସିପୁର ପଞ୍ଚାୟତ କେଳାମରା ଗ୍ରାମରେ ଚଢ଼ାଉ କରିଥିଲା। ଅଶୋକନାଳ ଅଞ୍ଚଳରୁ ଜଣେ ଶିକାରୀ ଗିରଫ ପରେ ବନ ବିଭାଗ କିଛି ନିରୀହ ଆଦିବାସୀଙ୍କୁ ଘରୁ ଡାକି ଅତ୍ୟାଚାର କରିବା ସହ ମାଡ଼ ମାରୁଥିବା ଅଭିଯୋଗ ଆସିଛି। କେଳାମରା ଗାଁର ନରୋତ୍ତମ ମଢେଇ ଓ ତାଙ୍କ ପୁଅ ରଞ୍ଜନ ମଢେଇ ଗୁରୁତର ହୋଇଛନ୍ତି। ରଞ୍ଜନ ଜଣେ ଟିବି ରୋଗୀ ହୋଇଥିବା ବେଳେ ସେ ଅସୁସ୍ଥ ହୋଇପଡିଛନ୍ତି। ପରେ ଗ୍ରାମବାସୀ ବାପ ପୁଅଙ୍କୁ ୧୦୮ ଆମ୍ବୁଲାନ୍ସରେ ଆଣି ଭର୍ତ୍ତି କରିଛନ୍ତି। ସେହି ଅଞ୍ଚଳର ଆଉ କିଛି ଗ୍ରାମବାସୀ ମଧ୍ୟ ଆହତ ହୋଇ ମୟୁରଭଞ୍ଜ ଜିଲ୍ଲା ଉଦଳା ହସ୍ପିଟାଲକୁ ଯାଇଥିବା ଜଣାପଡିଛି। ବନବିଭାଗର ଏଭଳି କାର୍ଯ୍ୟ ପାଇଁ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି।