ଭୁବନେଶ୍ଵର, ୦୭/୦୨ : ଏବେଠୁ କଲବଲ କଲାଣି ତାତି। ଦିନ ସାଢେ ୧୧ଟା ସୁଦ୍ଧା ପୁରୀରେ ସର୍ବାଧିକ ତାପମାତ୍ରା ୨୪.୧ ଡ଼ିଗ୍ରୀ ଛୁଇଁଛି। ସେହିଭଳି ଭୁବନେଶ୍ବର ଏବଂ ପାରାଦୀପରେ ୨୩.୫ ଡ଼ିଗ୍ରୀ ରେକର୍ଡ ହୋଇଛି। ରାଜ୍ୟରେ ୧୭ ସହରରେ ୨୦ ଡିଗ୍ରୀ ଉପରେ ତାପମାତ୍ରା ରହିଛି।
ସେହିଭଳି ଚାନ୍ଦବାଲିରେ ୨୨.୮ ଡିଗ୍ରୀ, ଗୋପାଳପୁରରେ ୨୨.୩ ଡିଗ୍ରୀ, କଟକରେ ୨୨.୨ ଡିଗ୍ରୀ, କେନ୍ଦ୍ରାପଡାରେ ୨୧.୬ ଡିଗ୍ରୀ, ଟିଟଲାଗଡ ଏବଂ ଯାଜପୁରରେ ୨୧.୫ ଡିଗ୍ରୀ, ଭଦ୍ରକରେ ୨୧.୪ ଡିଗ୍ରୀ, ଢେଙ୍କାନାଳରେ ୨୧.୨ ଡିଗ୍ରୀ, ନୟାଗଡରେ ୨୦.୮ ଡିଗ୍ରୀ, ମାଲକାନଗିରି, ହାରୀକୁଦ ଏବଂ ଦେବଗଡରେ ୨୦.୫ ଡିଗ୍ରୀ, ବାଲେଶ୍ବରରେ ୨୦.୩ ଡିଗ୍ରୀ ତାପମାତ୍ରା ରେକର୍ଡ ହୋଇଛି।
୨ ଦିନ ପରେ ରାତି ତାପମାତ୍ରାରେ ୨ ରୁ ୩ ଡ଼ିଗ୍ରୀ ଯାଏଁ ହ୍ରାସ ହେବାର ସମ୍ଭାବନା ରହିଛି। ଆସନ୍ତା ୧୦ ତାରିଖ ବେଳକୁ ପାଗରେ ପରିବର୍ତ୍ତନ ହେବ। ଓଡ଼ିଶା ଓ ଆନ୍ଧ୍ର ଉପକୂଳ ସଂଲଗ୍ନ ବଙ୍ଗୋପସାଗରରେ ଗୁରୁଚାପ ସୃଷ୍ଟି ହୋଇପାରେ। ଏହା ପ୍ରଭାବରେ ପବନ ପ୍ରବାହ ବଢିବ। ତେବେ କେବଳ ଏହି ବର୍ଷ ନୁହେଁ, ପୂର୍ବରୁ ମଧ୍ୟ ଫେବୃଆରୀରେ ଏମିତି ଅସ୍ଵାଭାବିକ ଗରମ ଅନୁଭୂତ ହୋଇଛି।