ନୀଳଗିରି,୨୩/୮ : ନୀଳଗିରି ବ୍ଲକ ଅଧିନ ଧୋବଶିଳା ଉଦୟ ନାରାୟଣ ବିଦ୍ୟାପୀଠରେ ପୂର୍ବରୁ କାର୍ଯ୍ୟରତ ଥିବା ହିନ୍ଦୀ ଶିକ୍ଷକ ଚାକିରୀ ହରାଇ ଦୀର୍ଘ ୨୦ ବର୍ଷ ସଂଘର୍ଷ ଜାରି ରଖିଥିଲେ। ଉପରିସ୍ଥ ଅଧିକାରୀଙ୍କଠାରୁ ଆରମ୍ଭ କରି କୋର୍ଟର ଦ୍ୱାରସ୍ଥ ହୋଇ ଶେଷରେ ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ୨୦ବର୍ଷ ପରେ ଚାକିରୀ ଫେରିପାଇଲେ ହିନ୍ଦୀ ଶିକ୍ଷକ ରମେଶ ଚନ୍ଦ୍ର ପରିଡା। ମାଜିଷ୍ଟ୍ରେଟଙ୍କ ଉପସ୍ଥିତିରେ ଆଜି ସେ କାର୍ଯ୍ୟରେ ଯୋଗଦାନ କରିଥିବାବେଳେ ତାଙ୍କ ସ୍ଥାନରେ ୨୦ବର୍ଷ ଚାକିରୀ କରିଥିବା ଶିକ୍ଷୟିତ୍ରୀ ବିନୋଦିନୀ ନାୟକଙ୍କ ଉପରେ ପୁଣି କଳାବାଦଲ ଘୋଟି ଆସିଛି ।

ପୁଣି ସେ ତାଙ୍କର ଚାକିରୀ ନେଇ ନ୍ୟାୟ ଅପେକ୍ଷାରେ ଉପରିସ୍ଥ ଅଧିକାରୀଙ୍କଠାରୁ ଆରମ୍ଭ କରି ମାନ୍ୟବର ସାଂସଦଙ୍କ ଉପରେ ଭରଷା କରିଛନ୍ତି । ସୂଚନାଯୋଗ୍ୟ ନୀଳଗିରି ବ୍ଲକ ଧୋବଶିଳା ଉଦୟନାରାୟଣ ବିଦ୍ୟାପୀଠରେ ୧୯୯୧ ମସିହାରେ ହିନ୍ଦୀ ଶିକ୍ଷକ ଭାବେ ରମେଶ ଚନ୍ଦ୍ର ପରିଡା କାର୍ଯ୍ୟରେ ଯୋଗଦେଇଥିଲେ। ୨୦୦୪ ମସିହାରେ ତତ୍କାଳୀନ ପ୍ରଧାନଶିକ୍ଷକ ତାଙ୍କୁ ଦୀର୍ଘ ବର୍ଷ ଅନୁପସ୍ଥିତ ରହିବା କାରଣରୁ ଆଉ ବିଦ୍ୟାଳୟ ଆସିବା ଦରକାର ନାହିଁ ବୋଲି କହିଥିଲେ। ପରେ ତାଙ୍କ ସ୍ଥାନରେ ଶିକ୍ଷୟିତ୍ରୀ ବିନୋଦିନୀ ନାୟକଙ୍କୁ ଚାକିରୀ ଦିଆଯାଇଥିବାବେଳେ ସେ ଆଜକୁ ୨୦ ବର୍ଷ ଧରି କାର୍ଯ୍ୟରତ ଅଛନ୍ତି । ଏପରିକି ସେ ମଧ୍ୟ ସରକାରୀ ମାନ୍ୟତା ପାଇସାରିଛନ୍ତି । ହେଲେ ନ୍ୟାୟ ପାଇଁ ପୁରାତନ ଶିକ୍ଷକ ଶ୍ରୀ ପରିଡା ରାଜନେତାଙ୍କ ଠାରୁ ଆରମ୍ଭ କରି ବିଭାଗୀୟ ଅଧିକାରୀଙ୍କ ପାଖକୁ ଧାଇଁ ଧାଇଁ ଶେଷରେ କୋର୍ଟର ଦ୍ୱାରସ୍ଥ ହୋଇଥିଲେ । 

ହାଇକୋର୍ଟରେ ନ୍ୟାୟ ନ ପାଇ ଶେଷରେ ସୁପ୍ରିମକୋର୍ଟର ଦ୍ୱାରସ୍ଥ ହୋଇଥିଲେ । ଶେଷରେ ସୁପ୍ରିମକୋର୍ଟ ତାଙ୍କୁ ପୁନଃ ଚାକିରୀରେ ଅବସ୍ଥାପିତ କରିବାକୁ ନିର୍ଦେଶ ଦେଇଥିଲେ । ହେଲେ ଏହି ନିର୍ଦେଶ ସତ୍ତ୍ୱେ ସେ ଦୀର୍ଘ ଦିନ ଧରି ଚାକିରୀରେ ଯୋଗଦାନ କରି ପାରିନଥିଲେ। ଜିଲ୍ଲା ଶିକ୍ଷାଅଧିକାରୀଙ୍କ ନିର୍ଦ୍ଦେଶ ପରେ ମଧ୍ୟ ପ୍ରଧାନଶିକ୍ଷକ କାର୍ଯ୍ୟକାରୀ କରୁନଥିବା ବେଳେ ବିଦ୍ୟାଳୟର ପରିଚାଳନା କମିଟି ଶିକ୍ଷୟିତ୍ରୀ ବିନୋଦିନୀ ନାୟକଙ୍କ ସପକ୍ଷରେ ଥିବା ଜଣାପଡିଛି। ପରେ ଶ୍ରୀ ପରିଡା ସାଂସଦ ପ୍ରତାପ ଷଡ଼ଙ୍ଗୀଙ୍କ ପାଖକୁ ଯାଇ ଶେଷରେ ନ୍ୟାୟ ମାଗିଥିଲେ। ସାଂସଦ କୋର୍ଟ ନିର୍ଦେଶକୁ ପାଳନ କରିବା ନେଇ ଜିଲ୍ଲାପାଳଙ୍କ ଦୃଷ୍ଟିକୁ ଆଣିଥିଲେ। ଶେଷରେ ଆଜି ଜିଲ୍ଲା ଶିକ୍ଷା ଅଧିକାରିଣୀ ପ୍ରତିଭା ମଞ୍ଜରୀ ଦାସ, ଅତିରିକ୍ତ ଜିଲ୍ଲା ଶିକ୍ଷାଆଧିକାରିଣୀ, ବ୍ଲକ ଶିକ୍ଷା ଅଧିକାରିଣୀ ମାଜିଷ୍ଟ୍ରେଟ ଓ ପୋଲିସଙ୍କ ସହାୟତାରେ ବିଦ୍ୟାଳୟକୁ ଯାଇ ପୁରାତନ ହିନ୍ଦୀ ଶିକ୍ଷକ ରମେଶ ପରିଡାଙ୍କୁ ଦାୟିତ୍ବ ଅର୍ପଣ କରିଛନ୍ତି । 

ତେବେ ତାଙ୍କ ସ୍ଥାନରେ ଦୀର୍ଘ ୨୦ ବର୍ଷ ଚାକିରୀରେ ଅବସ୍ଥାପିତ ହୋଇ ସରକାରୀ ମାନ୍ୟତା ପାଇଥିବା ଶିକ୍ଷୟିତ୍ରୀ ବିନୋଦିନୀ ନାୟକ ତାଙ୍କର ଭବିଷ୍ୟତ ନେଇ ଚିନ୍ତାରେ ପଡିଛନ୍ତି । ପୂର୍ବରୁ ମଧ୍ୟ ସେ ସାଂସଦ ପ୍ରତାପ ଷଡ଼ଙ୍ଗୀଙ୍କୁ ନ୍ୟାୟ ମାଗିଥିବାବେଳେ ଆଜି ପୁଣି ଜିଲ୍ଲା ଶିକ୍ଷାଅଧିକାରୀଙ୍କୁ ତାଙ୍କର ଭବିଷ୍ୟତ ନେଇ ନ୍ୟାୟ ମାଗିଛନ୍ତି। ତେବେ ଅଧିକାରିଣୀ କିଛି ବ୍ୟସ୍ତ ହେବାର ନାହିଁ ଉଭୟ ଶିକ୍ଷାଦାନ ଜାରୀ ରଖିବେ ଏ ନେଇ ଖୁବଶୀଘ୍ର ସ୍ଥାନ ପାଇଁ ସେ ନିର୍ଦ୍ଦେଶନାମା ପ୍ରଦାନ କରିବେ ବୋଲି ପ୍ରତିଶ୍ରୁତି ଦେଇଛନ୍ତି। ପୁରାତନ ଶିକ୍ଷକ ୨୦ ବର୍ଷ ପରେ ଚାକିରୀ ପାଇ ଖୁସି ଥିବା ବେଳେ ତାଙ୍କ ସ୍ଥାନରେ ଶିକ୍ଷୟିତ୍ରୀ ଜଣକ ନିଜର ଭବିଷ୍ୟତ ପାଇଁ ଚିନ୍ତାପ୍ରକଟ କରିଛନ୍ତି।