ନୂଆଦିଲ୍ଲୀ ୨୬/୦୫: ବେଳେବେଳେ କୋର୍ଟରେ କିଛି ନିଷ୍ପତ୍ତି ଐତିହାସିକ ହୋଇଯାଏ । ନ୍ୟୁୟର୍କର କୋର୍ଟରେ ଠିକ୍‌ ଏହିଭଳି ହୋଇଛି । ବନ୍ଧୁକ ଦେଖାଇ ଲୁଟ୍‌, ଘରେ ପଶି ଚୋରି କରିବା ମାମଲାରେ ଦୋଷୀ ପ୍ରମାଣିତ ଓହାୟୋ ବାସିନ୍ଦା ୩୫ ବର୍ଷୀୟ ଆନ୍ଥୋନି ସାଣ୍ଟିଆଗୋଙ୍କୁ କୋର୍ଟଙ୍କ ଦଣ୍ଡବିଧାନ ଚର୍ଚ୍ଚାର ବିଷୟ ହୋଇଛି । ମେଲିନା ମ୍ୟାକ୍‌ଗୁଇନିଙ୍ଗଲ୍‌ ନାମକ ବିଚାରକ ସାଣ୍ଟିଆଗୋଙ୍କୁ ଦଣ୍ଡିତ କରିବା ପରେ ପରେ ତାଙ୍କର ବିବାହ କରାଇଛନ୍ତି । ଅନେକ ମାମଲାରେ ଗିରଫ ହୋଇଥିବା ସାଣ୍ଟିଆଗୋଙ୍କ ବିରୋଧରେ ୨୦୨୨, ଜୁନ୍‌ରେ ଉତ୍ତର ସିରାକ୍ୟୁଜ୍‌ର ଏକ ଘରେ ଚୋରି ଅଭିଯୋଗ ହୋଇଥିଲା । 

ରିପୋର୍ଟ ଅନୁସାରେ, ଯାଞ୍ଚ୍‌କର୍ତ୍ତା ଦାବି କରିଛନ୍ତି ଯେ ୨୦୨୨, ମେ’ରେ ସାଣ୍ଟିଆଗୋ ଏକ କାର୍‌ ମଧ୍ୟ ଚୋରି କରିଥିଲେ । କୁହାଯାଏ, ସାଣ୍ଟିଆଗୋ କ୍ଲିଭ୍‌ଲ୍ୟାଣ୍ଡର ନିଜ ସାଙ୍ଗ ମଲିକ ଶବାଜ ଓ ଆଣ୍ଡ୍ରେସ୍‌ ଅର୍ଜୋଲା-ଟୋରେହୁଙ୍କ ସହ ମିଶି ଜଣଙ୍କ ଘରେ ଚୋରି ଯୋଜନା କରିଥିଲେ । ସେଠାରୁ ସେମାନେ କାର୍‌ଟିକୁ ଚୋରି କରିଥିଲେ । ସେତିକି ନୁହେଁ, ୨୦୨୨ ମସିହା ଜୁନ୍‌ ୨୭ରେ ଏହି ଲୁଟେରା ଗ୍ୟାଙ୍ଗ୍‌ ଜଣଙ୍କ ଘରେ ଡକାୟତି କରିଥିଲେ ଏବଂ ଜଣେ ମହିଳାଙ୍କ ଉପରେ ମରଣାତ୍ମକ ଆକ୍ରମଣ କରିଥିଲେ । 

ଅନ୍ୟ ଦୁଇଜଣ ସାଥୀଙ୍କ ସହ ସାଣ୍ଟିଆଗୋଙ୍କୁ ଓହାୟୋରେ ଦୋଷୀ ସାବ୍ୟସ୍ତ କରାଯାଇଥିଲା । କିନ୍ତୁ ସାଣ୍ଟିଆଗୋଙ୍କର କୌଣସି ଅପରାଧକୁ ନେଇ ତାଙ୍କ ଭାବୀ ପତ୍ନୀଙ୍କ ଉପରେ କୌଣସି ଫରକ ପଡ଼ିନଥିଲା । ସେ ଦଣ୍ଡବିଧାନ ପୂର୍ବରୁ ସାଣ୍ଟିଆଗୋଙ୍କୁ ବିବାହ କରିବାକୁ ଚାହୁଁଥିଲେ । ଦୁହିଁଙ୍କ ଇଚ୍ଛା ବିଚାରକ ପୂରଣ କଲେ । ଦଣ୍ଡ ଶୁଣାଇବାର ଠିକ୍‌ ପରେ ଉଭୟଙ୍କର ବିବାହ କରାଇଦେଲେ । ସାଣ୍ଟିଆଗୋ ୧୦ ବର୍ଷ ଜେଲଦଣ୍ଡ ଭୋଗିବା ପରେ ପତ୍ନୀଙ୍କ ପାଖକୁ ଫେରିବେ । ତେବେ ପୂର୍ବରୁ ମଧ୍ୟ ଏଭଳି ମାମଲା ସାମ୍ନାକୁ ଆସିଛି । ୨୦ ବର୍ଷର ଜେଲ ଦଣ୍ଡ କାଟୁଥିବା ୩୧ ବର୍ଷୀୟ ବଳାତ୍କାର ଅଭିଯୁକ୍ତ ଲିୟୋନେଲ ଭାସ୍କେଜ ୨୦୨୨, ଡିସେମ୍ବରରେ ଭର୍ଜିନିଆ ଜେଲ ଭିତରେ ୩୧ ବର୍ଷୀୟା ଜେମ୍ମା ମୋର୍ଗନଙ୍କୁ ବିବାହ କରିଥିଲେ ।