ନୂଆଦିଲ୍ଲୀ ୧୮/୦୫: ଆଫ୍ରିକୀୟ ଦେଶ ଆଲଜେରିଆର ଜେଲ୍ଫା ସହରରେ ୨୬ ବର୍ଷ ତଳେ ନିଖୋଜ ହୋଇଯାଇଥିଲେ ଓମାର ବିନ୍ ଓମରାନ୍ । ସେତେବେଳେ ତାଙ୍କ ବୟସ ଥିଲା ମାତ୍ର ୧୯ ବର୍ଷ । ଓମରାନ୍ ନିଖୋଜ ହୋଇଯିବା ପରେ ପରିବାର ଲୋକେ ତାଙ୍କୁ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ । ଶେଷରେ ୧୯୯୦-୨୦୦୦ ମସିହାଯାଏ ଦେଶରେ ଚାଲିଥିବା ଗୃହଯୁଦ୍ଧରେ ତାଙ୍କର ମୃତ୍ୟୁ ହୋଇଯାଇଥିବ ବୋଲି ମନେ କରିଥିଲେ । ତେବେ ତାଙ୍କ ମା’ କିନ୍ତୁ ପୁଅର ଫେରିବା ଆଶା ଛାଡି଼ନଥିଲେ । ସେହିପରି ଅପେକ୍ଷାରତ ଅବସ୍ଥାରେ ୨୦୧୩ରେ ତାଙ୍କର ମୃତ୍ୟୁ ଘଟିଥିଲା । ଗତ ରବିବାର ଓମରାନ୍ଙ୍କୁ ଠାବ କରାଯାଇଛି । ନିଜ ଘରଠାରୁ ମାତ୍ର ୧୦୦ ମିଟର ଦୂରରେ ଥିବା ଜଣେ ପଡ଼ୋଶୀଙ୍କ ଘରର ଏକ ଭୂତଳ କୋଠରୀରୁ ସୁରକ୍ଷାକର୍ମୀମାନେ ତାଙ୍କୁ ଉଦ୍ଧାର କରିଛନ୍ତି ।
ନ୍ୟୁୟର୍କ ପୋଷ୍ଟର ରିପୋର୍ଟ ଅନୁସାରେ, ୧୯୯୮ ମସିହାରେ ଓମରାନ୍ ସ୍କୁଲ ଯାଇଥିବା ସମୟରେ ତାଙ୍କର ଜଣେ ୬୧ ବର୍ଷୀୟ ପଡ଼ୋଶୀ ତାଙ୍କୁ ଅପହରଣ କରିନେଇଥିଲେ । ପଡ଼ୋଶୀଜଣକ ଉଚ୍ଚ ପାହ୍ୟାର ସରକାରୀ ଅଧିକାରୀ ହୋଇଥିବାବେଳେ ଏକୁଟିଆ ରହୁଥିଲେ । ଓମରାନ୍ଙ୍କୁ ଉଦ୍ଧାର କରାଯିବା ସମୟର ଏକ ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ୍ ହେଉଛି । ସେଥିରେ ଲମ୍ବା ଦାଢ଼ି ଓ ସ୍ୱେଟର ପିନ୍ଧିଥିବା ଓମରାନ୍ଙ୍କୁ ଭୟରେ କମ୍ପୁଥିବା ଦେଖିବାକୁ ମିଳୁଛି । ଅପହର୍ତ୍ତାଙ୍କ ଭାଇଙ୍କର ସୋସିଆଲ୍ ମିଡିଆରେ ଏକ ପୋଷ୍ଟରୁ ଏହି ଘଟଣା ସଂପର୍କରେ ଜଣାପଡି଼ଥିଲା । ଏହାପରେ ଓମରାନ୍ଙ୍କ ପରିବାର ଲୋକେ ପୁଲିସ ସହ ଯୋଗାଯୋଗ କରିଥିଲେ । ଏଥିସହ ଖୋଲିଥିଲା ଓମରାନ୍ଙ୍କ ନିଖୋଜ ହେବା ସଂପର୍କିତ ଫାଇଲ୍ । ଅଧିକାରୀମାନେ ଅପହର୍ତ୍ତାଙ୍କ ଘରର ଯାଞ୍ଚ କରିବାରୁ ସେମାନଙ୍କୁ ଚଟାଣ ତଳେ ଏକ ଲୁକ୍କାୟିତ କୋଠରୀ ମିଳିଥିଲା । ସେହି ଛୋଟ କୋଠରୀରେ ଓମରାନ୍ ଥିଲେ । ସେହି ଘରଟି ଅପହରଣକାରୀଙ୍କର ଏକ ମେଣ୍ଢା ଫାର୍ମ ଥିଲା ବୋଲି କୁହାଯାଉଛି ।
NEW: Man who disappeared 27 years ago at the age of 17, found alive 200 meters from his family's home in a neighbor's cellar.
— Collin Rugg (@CollinRugg) May 15, 2024
Insane.
Omar Bin Omran of Algeria disappeared 27 years ago. He went missing in 1998 on his way to a vocational school.
A 61-year-old is in police… pic.twitter.com/idkvSCykmh
ଅପହର୍ତ୍ତାଙ୍କ ବିରୋଧରେ ଓମରାନ୍ଙ୍କ କୁକୁରକୁ ହତ୍ୟା କରିବାର ମଧ୍ୟ ଅଭିଯୋଗ ରହିଛି । ଓମରାନ୍ ନିଖୋଜ ହେବାର ପ୍ରାୟ ମାସେ ଯାଏ ତାଙ୍କର ପ୍ରିୟ କୁକୁର ସବୁବେଳେ ତାଙ୍କ ପଡ଼ୋଶୀଙ୍କ ଘର ଆଗରେ ପଇଁତରା ମାରୁଥିଲା । କିନ୍ତୁ ପରେ କୁକୁରର ମୃତଦେହ ମିଳିଥିଲା । ପୁଲିସର ତଲାସୀ ସମୟରେ ଅପହର୍ତ୍ତା ଖସିଯିବାକୁ ଚେଷ୍ଟା କରୁଥିବାବେଳେ ତାଙ୍କୁ ଗିରଫ କରାଯାଇଛି । ଏ ସଂପର୍କରେ ଓମରାନ୍ କହିଛନ୍ତି, ଭୂତଳରେ ଥିବା ଏକ ଝରକାରୁ ସେ ପରିବାର ଲୋକଙ୍କୁ ଦେଖିବାକୁ ପାଉଥିଲେ । କିନ୍ତୁ ଡାକିବାର ଉପାୟ ନଥିଲା । ଉଦ୍ଧାର ହେବା ପରେ ତାଙ୍କୁ ଏକ ମେଡିକାଲ ସେଣ୍ଟରକୁ ନିଆଯାଇଛି । ଅଧିକାରୀମାନଙ୍କ ଅନୁସାରେ, ଏହା ଏକ ଜଘନ୍ୟ ଅପରାଧ । ତେଣୁ ଅପହରଣ କରିଥିବା ବ୍ୟକ୍ତିଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ତେବେ ଅପହର୍ତ୍ତାଙ୍କ ପରିଚୟକୁ ଗୋପନ ରଖାଯାଇଛି ।
