ଫୁଲବାଣୀ,୨୦/୫ : ସୋମବାର ସକାଳୁ କନ୍ଧମାଳ ଜିଲ୍ଲାର ୬୫୯ ବୁଥରେ ମତଦାନ ପ୍ରକ୍ରିୟା ଆରମ୍ଭ ହୋଇଛି। କିଛି ସ୍ଥାନରେ ଇଭିଏମରେ ତ୍ରୁଟି ଦେଖାଦେଇଥିବା ବେଳେ ଅଧିକାଂଶ ସ୍ଥାନରେ ମତଦାନ ଶାନ୍ତିଶୃଙ୍ଖଳାର ସହ ଚାଲିଛି। ସକାଳୁ ସକାଳୁ ବୁଥ୍ମାନଙ୍କରେ ଭୋଟରମାନଙ୍କ ଲମ୍ବା ଲାଇନ୍ ଦେଖିବାକୁ ମିଳିଛି। ସକାଳ ୯ଟା ସୁଦ୍ଧା ଜିଲ୍ଲାରେ ମତଦାନ ହାର ୬.୭୭ ଥିବା ଜଣାପଡିଛି। ଆଜି ଫୁଲବାଣୀ ପୌରାଞ୍ଚଳ ଅନ୍ତର୍ଗତ ୧୧୮ନଂ ବୁଥ ଏଜେଓ ହାଇସ୍କୁଲ ଠାରେ ନିଜର ମତାଧିକାର ସାବ୍ୟସ୍ତ କରିଛନ୍ତି ଦୌଡରାଣୀ ଅଲିମ୍ପିୟାନ ଶ୍ରାବଣୀ ନନ୍ଦ। ବାପା ବନବିହାରୀ ନନ୍ଦ ଓ ମା ସୁବାସିନୀ ରାୟଗୁରୁଙ୍କ ସହ ମତଦାନ କେନ୍ଦ୍ରକୁ ଯାଇ ଭୋଟ ଦେଇଥିଲେ ଶ୍ରାବଣୀ।
ପୂର୍ବ ନିର୍ବାଚନମାନଙ୍କରେ ଦେଶ ବାହାରେ ଥିବାରୁ ସେ ମତଦାନ କରି ପାରି ନଥିଲେ। ଏଥର ପ୍ରଥମ ଥର ପାଇଁ ଭୋଟ୍ ଦେବାର ସୁଯୋଗ ପାଇଥିବାରୁ ଅତ୍ୟନ୍ତ ଖୁସି ପ୍ରକଟ କରିଛନ୍ତି ଶ୍ରାବଣୀ। କେବଳ ଭୋଟ୍ ଦେବା ପାଇଁ ଭୂବନେଶ୍ୱରରୁ ଫୁଲବାଣୀ ଆସିଥିବା ସେ ପ୍ରକାଶ କରିଛନ୍ତି। ସମସ୍ତ ମତଦାତାଙ୍କୁ ଏହି ଅଧିକାର ସାବ୍ୟସ୍ତ କରିବା ପାଇଁ ସେ ଅନୁରୋଧ କରିଛନ୍ତି।