ହିନ୍ଦୋଳ, ୧୯।୮: ଜୀବିତ ମହିଳାଙ୍କୁ ମୃତ ଘୋଷଣା କରି କାଟିଦେଲେ ରାସନ କାର୍ଡ । ମହିଳା ଜଣକ ଅନ୍ତୋର୍ଦୟ ଯୋଜନାରେ ପାଉଥିବା ରାସନ କାର୍ଡ କାଟି ଦେଇଛନ୍ତି ହିନ୍ଦୋଳ ଯୋଗାଣ ବିଭାଗ ଅଧିକାରୀ I ସୂଚନା ଅନୁଯାୟୀ, ହିନ୍ଦୋଳ ବ୍ଲକ କୁଟୁଣିଆ ପଞ୍ଚାୟତ ଗୁଆଘରିଆ ଗ୍ରାମର ସାବିତ୍ରୀ ପଧାନ ଜଣେ ଅସହାୟ ବିଧବା ମହିଳା I ପରିବାର କହିଲେ କେହି ନାହାନ୍ତି I ଏଣେତେଣେ କାମ କରି ନଚେତ ମାଗିଯାଚି ଖାଇବା ଯୋଗାଡ଼ କରନ୍ତି I ରାସନ କାର୍ଡ ପାଇବା ଦିନଠାରୁ ସେ ସରକାରଙ୍କର ଅନ୍ତୋର୍ଦୟ ଯୋଜନାରେ ୩୫ କିଲୋ ଚାଉଳ ପାଉଥିଲେ I ୨୦୨୩ ମସିହା ମାର୍ଚ୍ଚ ମାସ ପରଠୁ ତାଙ୍କୁ ଆଉ ଚାଉଳ ମିଳୁନଥିଲା I ଡିଲର ପାଖକୁ ଦୌଡ଼ି ଦୌଡ଼ି ନୟାନ୍ତ ହେବାପରେ ହିନ୍ଦୋଳ ଯୋଗାଣ ବିଭାଗ ଅଧିକାରୀଙ୍କ ପାଖରେ ପହଞ୍ଚିଥିଲେ I ପରେ ଜାଣିବାକୁ ପାଇଥିଲେ ସାବିତ୍ରୀ ପ୍ରଧାନଙ୍କ ମୃତ୍ୟୁ ହୋଇଥିବାରୁ ତାଙ୍କର ରାସନ କାର୍ଡଟି କଟିଯାଇଛି I 

ତେବେ ସେହିଦିନ ଠାରୁ ଆଜି ପର୍ଯ୍ୟନ୍ତ ଦୀର୍ଘ ଦେଢ଼ ବର୍ଷ ହେବ ସେ ରାସନ ଚାଉଳ ପାଇପାରୁନାହାନ୍ତି I ଯୋଗାଣ ବିଭାଗ କିପରି ଜଣେ ଜୀବିତ ମହିଳାକୁ ମୃତ ଘୋଷଣା କରି ରାସନ କାର୍ଡ କାଟିଲେ ଏବଂ ଜୀବିତ ଥିବା ଜାଣିବା ପରେ ଆଜି ପର୍ଯ୍ୟନ୍ତ କିପରି କୌଣସି ପଦକ୍ଷେପ ନିଆଯାଉନାହିଁ ତାହା ବିରାଟ ପ୍ରଶ୍ନବାଚୀ ସୃଷ୍ଟି କରିଛି I ଜାଣିଶୁଣି ସାବିତ୍ରୀଙ୍କୁ ମୃତ ଘୋଷଣା କରି ତାଙ୍କ କାର୍ଡକୁ ଅର୍ଥ ଲୋଭରେ ଯୋଗାଣ ଅଧିକାରୀ ଅନ୍ୟ ହିତାଧିକାରୀଙ୍କ ନାମରେ କରାଇଥିବା ଚର୍ଚ୍ଚା ହେଉଛି I ଏନେଇ ଯୋଗାଣ ଅଧିକାରୀ କୌଣସି ପ୍ରତିକ୍ରିୟା ଦେଇନଥିଲେ I