ନୂଆଦିଲ୍ଲୀ, ୬।୧୧: ଦୁନିଆରେ ଆକାଶକୁ ଛୁଇଁବା ପରି ମନେ ହେଉଥିବା ଅଟ୍ଟାଳିକାଗୁଡ଼ିକର ଅଭାବ ନାହିଁ । କେଉଁଟା ୧୦୦ ମହଲା ତ ଆଉ କେଉଁଟା ୧୫୦ ମହଲା । ଦୁବାଇର ବୁର୍ଜ ଖଲିଫା ୧୬୩ ମହଲା ପର୍ଯ୍ୟନ୍ତ ତିଆରି ହୋଇଛି । ଏହି କାରଣରୁ ଏହାକୁ ସବୁଠାରୁ ଉଚ୍ଚ ଅଟ୍ଟାଳିକାର ମାନ୍ୟତା ମଧ୍ୟ ମିଳିଛି । କିନ୍ତୁ, ଦୁନିଆର ସବୁଠାରୁ ଦ୍ରୁତତମ ଲିପ୍ଟ କେଉଁଟି ଜାଣନ୍ତି କି ? ଏହି ବିଲ୍ଡିଂକୁ ନିର୍ମାଣ କରିଛି ଜାପାନୀ କମ୍ପାନୀ ହିଟାଚୀ ବିଲ୍ଡିଂ ସିଷ୍ଟମ୍ ଲିମିଟେଡ୍ । ଏହାକୁ ଚୀନ୍ର ସବୁଠାରୁ ଉଚ୍ଚ ଅଟ୍ଟାଳିକା ସାଂଘାଇ ଟାୱାରରେ ଲଗାଯାଇଛି । ଏହି ଲିପ୍ଟର ସ୍ପିଡ୍ ୭୩.୮ କିମି ପ୍ରତି ଘଣ୍ଟା । ଏହା ଚିତା ପରି ଦ୍ରୁତ ଗତିରେ ଚାଲେ । ମାତ୍ର, ୫୫ ସେକେଣ୍ଡ ଭିତରେ ଏହା ୧୧୮ ମହଲା ପର୍ଯ୍ୟନ୍ତ ପହଞ୍ଚାଇପାରେ । ଏହି ଲିପ୍ଟର ନାଁ ଗିନିଜ୍ ବୁକ୍ରେ ମଧ୍ୟ ସ୍ଥାନ ପାଇଛି ।
ଏହି ସୂଚୀରେ ଦ୍ୱିତୀୟ ନମ୍ୱରରେ ଅଛି ଚୀନ୍ର ସିଟିଏଫ୍ ଫାଇନାନ୍ସ ସେଣ୍ଟର ବିଲ୍ଡିଂର ଲିପ୍ଟ । ଏହା ଘଣ୍ଟା ପ୍ରତି ୭୨ କିମି ଗତିରେ ଚାଲେ ଓ ମାତ୍ର ୪୫ ସେକେଣ୍ଡ ମଧ୍ୟରେ ୯୫ ମହଲା ପର୍ଯ୍ୟନ୍ତ ପହଞ୍ଚାଇଦିଏ । ବୁର୍ଜ ଖଲିଫା ଲିପ୍ଟର ଗତି ୬୫ କିମି ପ୍ରତି ଘଣ୍ଟା । ଅଟ୍ଟାଳିକାର ୧୨୪ ତମ ମହଲାରେ ‘ଡେକ୍ ଆଟ୍ ଦ ଟପ୍’ ପର୍ଯ୍ୟନ୍ତ ପହଞ୍ଚାଇବା ପାଇଁ ଏହି ଲିପ୍ଟକୁ ମାତ୍ର ୨ ମିନିଟ୍ ସମୟ ଲାଗେ । ଏହି ସ୍ଥାନଟି ସବୁଠାରୁ ଦେଖିବା ଯୋଗ୍ୟ ସ୍ଥାନ ଅଟେ । ଯେଉଁଠାରୁ ପର୍ଯ୍ୟଟକମାନେ ଦୁବାଇ ସହରର ଦୃଶ୍ୟ ଦେଖିପାରନ୍ତି । ଏଗୁଡ଼ିକ ପରେ ତାଇପେ ଫାଇନାନ୍ସସିଆଲ ସେଣ୍ଟର ଅଟ୍ଟାଳିକାର ଲିପ୍ଟର ଗତି ମଧ୍ୟ ବହୁତ ଅଧିକ । ସବୁଠାରୁ ପୁରୁଣା ଅଟ୍ଟାଳିକାରେ ଲାଗିବା ସତ୍ତ୍ୱେ ବି ଏହି ଲିପ୍ଟର ଗତି ରହିଛି ୬୦.୬ କିମି ପ୍ରତି ଘଣ୍ଟା । ମାତ୍ର, ୩୭ ସେକେଣ୍ଡରେ ୮୯ ମହଲା ପର୍ଯ୍ୟନ୍ତ ଏହା ପହଞ୍ଚାଇଦିଏ । ଏହି ଅଟ୍ଟାଳିକାର ସ୍ୱତନ୍ତ୍ର ଡିଜାଇନ୍ ତାଇୱାନର ପାରମ୍ପରିକ ବାସ୍ତୁକଳାର ପ୍ରତୀକ ।
୧୯୯୩ରେ ଅନ୍ୟ ଏକ ଦ୍ରୁତତର ଜାପାନୀ ଲିପ୍ଟ ୟୋକୋହାମା ଟାୱାରରେ ଲଗାଯାଇଛି ଯାହା ୪୫ କିମି ପ୍ରତି ଘଣ୍ଟା ଗତିରେ ଚାଲେ । ତାକୁ ଉପରକୁ ଯିବା ପାଇଁ ଲିପ୍ଟ ୨୪ ସେକେଣ୍ଡ ସମୟ ଲାଗେ । ସାଧାରଣତଃ ସମୟ ବଞ୍ଚାଇବା ପାଇଁ ଲିପ୍ଟର ବ୍ୟବହାର କରାଥାଏ । ତେବେ ଚୀନରେ ଥିବା ବିଶ୍ୱର ସବୁଠାରୁ ଦ୍ରୁତତମ ଲିପ୍ଟ ଆଖି ପିଛୁଳାକେ ଆପଣଙ୍କୁ ଗନ୍ତବ୍ୟ ସ୍ଥାନକୁ ନେଇଯିବ । ୨୦୧୭ରେ ଏହି ଲିପ୍ଟକୁ ବସାଯାଇଥିଲା । ଏହି ଲିପ୍ଟଟି ୧ ସେକେଣ୍ଡରେ ୨୦.୫ ମିଟର ବା ୬୭ ଫୁଟ୍ ଯାଇପାରେ । ଏହି ଟାୱାରର ଲିପ୍ଟ ପାଇଁ ୪୦ ଜଣ କର୍ମଚାରୀଙ୍କୁ ନିଯୁକ୍ତ କରାଯାଇଥିଲା ।
