ଅନୁଗୁଳ, ୨୭।୧୧: କାର୍ତ୍ତିକ ପୂର୍ଣ୍ଣିମାରେ ଅଘଟଣ । ଡଙ୍ଗା ଭସା ବେଳେ ପାଣିରେ ବୁଡ଼ି ଯୁବକ ମୃତ । ତାଳଚେର ଥାନା ଇଲାକା କଙ୍କିଳୀ ଗ୍ରାମ ଦେଇ ଯାଇଥିବା ସମଲ ରାଇଟ୍ କେନାଲରେ ସୋମବାର ଭୋରୁ ଏହି ଅଭାବନୀୟ ଘଟଣା ଘଟିଛି । ମୃତକ ଜଣକ ପାଲଲହଡ଼ା ବ୍ଲକ୍ ସହର ଗୁରୁଜାଙ୍ଗ ଗ୍ରାମର ଆଶିଷ କୁମାର ସାହୁ ବୋଲି ଜଣାପଡ଼ିଛି ।
ସୂଚନା ମୁତାବକ, ଆଶିଷ ଛୋଟବେଳୁ ତାଙ୍କ ମାମୁଁଙ୍କ ଘରେ ତାଳଚେର କଙ୍କିଳୀ ଗ୍ରାମ ପଞ୍ଚାୟତର କଙ୍କିଳୀ ନୂଆଁସାହି (ସାତପାଟିଆ)ରେ ରହି ପଢ଼ୁଥିଲେ । ପରେ ଏକ ପ୍ରାଇଭେଟ୍ ଗାଡ଼ି ଫାଇନାନ୍ସ କମ୍ପାନୀରେ ନିଯୁକ୍ତ ଥିଲେ । ଆଜି ଭୋର ସମୟରେ ବୋଇତ ବନ୍ଦାଣ ଉତ୍ସବ ଥିବାରୁ ପିଲାମାନଙ୍କ ସହ ବୋଇତ ବନ୍ଦାଣ ପାଇଁ ଯାଇଥିବା ବେଳେ ପାଣିରେ ବୁଡ଼ି ଯାଇଥିଲେ । ତାଙ୍କୁ ପାଣିରୁ ଉଦ୍ଧାର କରି ତାଳଚେର ଉପଖଣ୍ଡ ଚିକିତ୍ସାଳୟକୁ ପଠାଯାଇଥିବା ବେଳେ ସେଠାରେ ତାଙ୍କର ମୃତ୍ୟୁ ହୋଇଛି । ଏହି ଖବର ପ୍ରଚାର ହେବା ପରେ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି ।