ପୁରୀ,୧୦/୦୯: ନାବାଳିକା ବୋଲି ଜାଣି ବି କରୁଥିଲା ପ୍ରେମ ନିବେଦନ । ଭଲରେ ଆସିବୁ ନା ଘରୁ ଉଠାଇ ନେବି ବୋଲି ଦେଉଥିଲା ଧମକ । ନହେଲେ ଦୁଷ୍କର୍ମ କରି ସୋସିଆଲ୍ ମିଡିଆରେ ଭିଡିଓ ପୋଷ୍ଟ କରିବି ବୋଲି ମଧ୍ୟ ଖୁଲମ୍ଖୁଲ୍ଲା କହୁଥିଲା । ଏଭଳି ଅଭିଯୋଗ କରି କୁମ୍ଭାରପଡ଼ା ଥାନାରେ ଏତଲା ଦେଇଛନ୍ତି ଜଣେ ନାବାଳିକା । ଶେଷରେ ରୋମିଓ ବିରୋଧରେ ମାମଲା ରୁଜୁ କରି ବାନ୍ଧିଛି ପୁଲିସ । ଅଭିଯୁକ୍ତ ଜଣକ ରାମଚଣ୍ଡୀ ସାହି ବାଲିକୁଦା ବସ୍ତିର ଦୀପକ କୁଣ୍ଡୁ ଓରଫ ଦୀପୁ (୨୬) ବୋଲି ଜଣାପଡ଼ିଛି ।
ନାବାଳିକାଙ୍କ ବୟସ ୧୭ ବର୍ଷ । ଗତ ୬ ମାସ ହେଲା ତାଙ୍କ ପଛରେ ପଡ଼ିଛି ଦୀପୁ । ନାବାଳିକାଙ୍କୁ ଏକତରଫା ପ୍ରେମ କରି ହଇରାଣ କରୁଛି । ଘର ଛାଡ଼ି ତା’ ସହ ଚାଲିଯିବାକୁ ବାଧ୍ୟ କରୁଛି । ରାଜି ନହେବାରୁ ପରିବାର ଲୋକଙ୍କୁ ଗାଳିଗୁଲଜ କରି ଅପମାନ ଦେଉଛି ବୋଲି ଏତଲାରେ ଉଲ୍ଲେଖ ରହିଛି । ଏଭଳି ସ୍ଥିତିରେ ନାବାଳିକା ଓ ତାଙ୍କ ପରିବାର ମାନସିକ ଚାପ ଓ ଭୟଭୀତ ଅବସ୍ଥାରେ ଦିନ କାଟୁଛନ୍ତି ।
ଗତ ୭ ତାରିଖ ଅପରାହ୍ନ ୩ଟାରେ ଦୀପୁ ସମ୍ପୃକ୍ତା ନାବାଳିକାଙ୍କୁ ଫୋନ୍ କଲ୍ କରି ଉଠାଇ ନେବାକୁ ଧମକ ଦେଇଥିଲା । ଘର ଛାଡ଼ି ନଆସିଲେ ଭାଇକୁ ମାରିଦେବ ବୋଲି ଧମକ ଦେଇଥିଲା । ଏହାପରେ ଆଇନ୍ର ଆଶ୍ରୟ ନେଇଥିଲେ ନାବାଳିକା । ୧୨ ପୋକ୍ସୋ ଆକ୍ଟ ବଳରେ ମାମଲା (୨୧୨/୨୩) ରୁଜୁ କରି ଦୀପୁକୁ ଗିରଫ କରିଛି ପୁଲିସ । ଶନିବାର ତାକୁ କୋର୍ଟ ଚାଲାଣ କରାଯାଇଥିବାବେଳେ ଜାମିନ୍ ନାମଞ୍ଜୁର ହେବାରୁ ଜେଲ୍ ପଠାଇ ଦିଆଯାଇଥିବା ପୁଲିସ୍ କହିଛି ।
