ନୂଆଦିଲ୍ଲୀ – ମୋଦି ସରକାରର ୩ୟ ପାଳି ଆରମ୍ଭ ହୋଇଛି । ଏହି କ୍ରମରେ ଆଜି ମନ୍ତ୍ରିମଣ୍ଡଳର ବିଭିନ୍ନ ବିଭାଗ ବଣ୍ଟନ ହୋଇଛି। ଏହି କ୍ରମରେ ଓଡ଼ିଶାରୁ ୩ଜଣ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ , ଜୁଏଲ ଓରାମ ଓ ଅଶ୍ୱିନୀ ବୈଷ୍ଣବଙ୍କୁ ମୋଦି ସରକାରରେ ଗୁରୁତ୍ୱପୂର୍ଣ୍ଣ ଦାୟିତ୍ୱ ମିଳିଛି ।
ପୁଣିଥରେ ଧର୍ମେନ୍ଦ୍ର ପ୍ରଧାନଙ୍କୁ ମିଳିଛି ଶିକ୍ଷା ମନ୍ତ୍ରଣାଳୟ। ତାଙ୍କୁ ମୋଦି କ୍ୟାବିନେଟରେ ଶିକ୍ଷା ବିଭାଗର ମନ୍ତ୍ରୀ ପଦ ମିଳିଛି। ସେହିପରି ଓଡ଼ିଶାରୁ ଆଉ ଜଣେ ମନ୍ତ୍ରୀ ଜୁଏଲ ଓରାମଙ୍କୁ ମିଳିଛି ଆଦିବାସୀ ବ୍ୟାପାର ବିଭାଗ । ତାଙ୍କୁ ବି ସେହି ପୂର୍ବର ଦାୟିତ୍ୱ ପୁନର୍ବାର ଦିଆଯାଇଛି। ଅଶ୍ୱିନୀ ବୈଷ୍ଣବଙ୍କୁ ମଧ୍ୟ ସେହି ସମାନ ଭାବେ ରେଳ , ସୂଚନା ଓ ପ୍ରସାରଣ ବିଭାଗ ମିଳିଛି। ମୋଦିଙ୍କ ଦ୍ୱିତୀୟ ପାଳି ସରକାରରେ ଧର୍ମେନ୍ଦ୍ର ପ୍ରଧାନ ଶିକ୍ଷାମନ୍ତ୍ରୀ ଥିବାବେଳେ, ଅଶ୍ୱିନୀ ରେଳ ମନ୍ତ୍ରୀ ଭାବେ ଦାୟିତ୍ୱ ନିର୍ବାହ କରିଥିଲେ ।
ଶିବରାଜ ସିଂହ ଚୌହାନଙ୍କୁ କୃଷି ମନ୍ତ୍ରଣାଳୟର ଦାୟିତ୍ୱ
ଉଲ୍ଲେଖନୀୟ ଯେ, ନାଗପୁର ସାଂସଦ ନିତିନ ଗଡକରୀଙ୍କୁ ପୁଣି ଥରେ ସଡ଼କ ପରିବହନ ମନ୍ତ୍ରଣାଳୟର ଦାୟିତ୍ବ ଦିଆଯାଇଛି। ଏଥି ସହିତ ସଡ଼କ ପରିବହନ ମନ୍ତ୍ରଣାଳୟରେ ହର୍ଷ ମଲହୋତ୍ରା ଏବଂ ଅଜୟ ଟମଟାଙ୍କୁ ରାଜ୍ୟ ମନ୍ତ୍ରୀ ଭାବେ ଦାୟିତ୍ବ ପ୍ରଦାନ କରାଯାଇଛି। ସେହିପରି ବୈଦେଶିକ ମନ୍ତ୍ରଣାଳୟ ଦାୟିତ୍ବ ପୁଣି ଏସ. ଜୟଶଙ୍କରଙ୍କ ହାତରେ ଦିଆଯାଇଛି । ମୋଦି ସରକାରଙ୍କ ଦ୍ୱିତୀୟ କାର୍ଯ୍ୟକାଳରେ ଜୟଶଙ୍କର ମଧ୍ୟ ବୈଦେଶିକ ମନ୍ତ୍ରୀ ପଦରେ ଥିଲେ।
ଏଥି ସହିତ ଗୃହ ମନ୍ତ୍ରଣାଳୟର ଦାୟିତ୍ବ ପୁଣିଥରେ ଅମିତ ଶାହଙ୍କୁ ଦିଆଯାଇଛି ଏବଂ ଅର୍ଥ ମନ୍ତ୍ରଣାଳୟ ଦାୟିତ୍ୱ ପୁଣି ଥରେ ନିର୍ମଳା ସୀତାରମଣଙ୍କୁ ଦିଆଯାଇଛି। ପୁଣିଥରେ ପ୍ରତିରକ୍ଷା ମନ୍ତ୍ରାଳୟର ଦାୟିତ୍ବ ମିଳିଛି ରାଜନାଥ ସିଂଙ୍କ ହାତରେ।
