ନୂଆଦିଲ୍ଲୀ,୨୨/୦୯: ବର୍ତ୍ତମାନ ତିରୁପତି ମନ୍ଦିରର ଲଡୁ ପ୍ରସାଦରେ ଘିଅ ବଦଳରେ ପଶୁ ଚର୍ବି ବ୍ୟବହାର କରିବା ପ୍ରସଙ୍ଗକୁ ନେଇ ଚର୍ଚ୍ଚା ଜୋର ଧରିଛି। ସେପଟେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଏନ ଚନ୍ଦ୍ରବାବୁ ନାଇଡୁ ଏକ ବଡ଼ ଘୋଷଣା କରିଛନ୍ତି। ରାଜ୍ୟର ସମସ୍ତ ମନ୍ଦିରର ଶୁଦ୍ଧିକରଣ ଖୁବ ଶୀଘ୍ର ଆରମ୍ଭ ହେବ ବୋଲି ସିଏମ୍ ନାଇଡୁ କହିଛନ୍ତି। ତିରୁପତି ଲଡୁରେ ପଶୁ ଚର୍ବିର ବ୍ୟବହାର ସମ୍ପର୍କରେ ଖବର ଆସିବା ପରେ ସିଏମ ଚନ୍ଦ୍ରବାବୁ ନାଇଡୁ ଏହି ନିଷ୍ପତ୍ତି ନେଇଛନ୍ତି। ଇଣ୍ଡିଆ ଟୁଡେ ଖବର ଅନୁଯାୟୀ ସିଏମ ଚନ୍ଦ୍ରବାବୁ ନାଇଡୁ ତେଲୁଗୁ ଦେଶମ ପାର୍ଟିର କେନ୍ଦ୍ରୀୟ କାର୍ଯ୍ୟାଳୟରେ ଗଣମାଧ୍ୟମକୁ ଏକ ସାକ୍ଷାତ କରିଥିଲେ। ଏହାରି ଭିତରେ ସେ ଧାର୍ମିକ ଭାବନାକୁ ସମ୍ମାନ ଦେବା ପାଇଁ ରାଜ୍ୟ ସରକାରଙ୍କ ପ୍ରତିବଦ୍ଧତାକୁ ଦୋହରାଇଥିଲେ।
ଧାର୍ମିକ ନେତାଙ୍କ ସହ ପରାମର୍ଶ କରିବା ପରେ ସେ ଆବଶ୍ୟକ ପଦକ୍ଷେପ ନେବାକୁ ମଧ୍ୟ ପ୍ରତିଶୃତି ଦେଇଛନ୍ତି। ନାଇଡୁ କହିଛନ୍ତି, ତିରୁପତି ଲଡ଼ୁ ବିବାଦର ଜବାବରେ ଜିର ସ୍ୱାମୀ, କାଞ୍ଚି ସ୍ବାମୀ ଏବଂ ଅନ୍ୟ ଧାର୍ମିକ ନେତାଙ୍କ ସହ ପରାମର୍ଶ ପରେ ଖୁବ ଶୀଘ୍ର ନିଷ୍ପତ୍ତି ନିଆଯିବ। କେବଳ ଏତିକି ନୁହେଁ, ଭବିଷ୍ୟତର କାର୍ଯ୍ୟକଳାପ ନିର୍ଣ୍ଣୟ କରିବା ପାଇଁ ଜଣେ ମଠାଧିଶ, ସାଧୁ, ପୁରୋହିତ ଏବଂ ଅନ୍ୟାନ୍ୟ ଅଗ୍ରଣୀ ହିନ୍ଦୁ ଧର୍ମ ବିଶେଷଜ୍ଞଙ୍କ ସହ ପରାମର୍ଶ କରାଯିବ ବୋଲି ସେ କହିଛନ୍ତି।
ଏହି ପରାମର୍ଶ ପରେ ତିରୁପତିସ୍ଥିତ ପ୍ରସିଦ୍ଧ ଶ୍ରୀ ଭେଙ୍କଟେଶ୍ୱର ସ୍ବାମୀ ମନ୍ଦିରର ସରକାରୀ ସଂରକ୍ଷକ ତିରୁମାଲା ତିରୁପତି ଦେବସ୍ଥାନମ୍ (ଟିଟିଡି) ସମ୍ପର୍କରେ ସରକାର ନିଷ୍ପତ୍ତି ନେବେ। କହିରଖୁଛୁ ଯେ, ସିଏମ୍ ନାଇଡୁଙ୍କ ଅଭିଯୋଗ ପରେ ଏହି ବିବାଦ ସାମ୍ନାକୁ ଆସିଥିଲା, ଯେଉଁଥିରେ ଦାବି କରାଯାଇଥିଲା ଯେ ପୂର୍ବତନ ଓ୍ବାଇଏସ୍ଆର୍ସିପି ସରକାର ସମୟରେ ମନ୍ଦିରରେ ଦିଆଯାଇଥିବା ଲଡୁରେ 'ଚର୍ବି ଏବଂ ମାଛ ତେଲ' ଭଳି ପଦାର୍ଥ ବ୍ୟବହାର କରାଯାଇଥିଲା।
