ନୂଆଦିଲ୍ଲୀ, ୨୯/୦୩: ଲୋକସଭା ନିର୍ବାଚନ ଲାଗି ଘୋଷଣା ସରିଛି ତାରିଖ । ଦେଶରେ ୭ଟି ପର୍ଯ୍ୟାୟରେ ଅନୁଷ୍ଠିତ ହେବ ଲୋକସଭା ନିର୍ବାଚନ । ସାଧାରଣ ନିର୍ବାଚନ ଲାଗି ପ୍ରଥମ ପର୍ଯ୍ୟାୟ ମତଦାନ ଏପ୍ରିଲ୍ ୧୯ରେ ହେବ । ଏହାରି ଭିତରେ ଟିଏମସି ନେତା କେନ୍ଦ୍ରରେ କ୍ଷମତାସୀନ ବିଜେପି କେନ୍ଦ୍ରୀୟ ତଦନ୍ତକାରୀ ସଂସ୍ଥାର ଦୁରୂପଯୋଗ ହେଉଥିବା ଅଭିଯୋଗ କରିଛି । ମାମଲାରେ ନିର୍ବାଚନ ଆୟୋଗଙ୍କ ହସ୍ତକ୍ଷେପ ଦାବି କରିଛି ଟିଏମସି ।

ମିଳିଥିବା ସୂଚନା ଅନୁସାରେ, ନିର୍ବାଚନ ଆୟୋଗଙ୍କୁ ଟିଏମସି ନେତା ଏକ ଦାବି ପତ୍ର ପ୍ରଦାନ କରିବା ସହ ସମସ୍ୟା ଜଣାଇବା ଲାଗି ସମୟ ମାଗିଛନ୍ତି । ସୋମବାର ଟିଏମସି ନେତା ମୁଖ୍ୟ ନିର୍ବାଚନ କମିଶନର ଓ ନିର୍ବାଚନ କମିଶନରଙ୍କୁ ଭେଟିବା ସହ ସେମାନଙ୍କ ଆଶଙ୍କା ବ୍ୟକ୍ତ କରିବେ ।

ଟିଏମସି ନେତା ରାଶି ପାଞ୍ଜା କହିଛନ୍ତି, ଆମେ ନିର୍ବାଚନ ଆୟୋଗଙ୍କୁ ଦାବି ପତ୍ର ଦେଇଛୁ । ଆଲୋଚନା ପାଇଁ ଆୟୋଗ ସୋମବାର ସମୟ ଦେବେ । ଆମେ ଆୟୋଗଙ୍କ ସହ ଆଲୋଚନା କରି ସମସ୍ୟା ଅବଗତ କରାଇବୁ । ନିର୍ବାଚନ ପୂର୍ବରୁ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ଯେଭଳି ଗିରଫ କରାଗଲା, ତାହାକୁ ନେଇ ଟିଏମସି କାର୍ଯ୍ୟକର୍ତ୍ତା ବେଶ୍ ଚିନ୍ତିତ । ଏବେ ଆଦର୍ଶ ନିର୍ବାଚନ ଆଚରଣ ବିଧି ଲାଗୁ ହୋଇଛି । ସ୍ଥିତି ନିର୍ବାଚନ ଆୟୋଗଙ୍କ ନିୟନ୍ତ୍ରଣରେ । ତଥାପି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଗିରଫ କରି ନିଆଗଲା ।

ଟିଏମସି ନେତା କହିଛନ୍ତି, ଏବେ କେନ୍ଦ୍ରର ନଜର ‘ପଶ୍ଚିମବଙ୍ଗ ଉପରେ’ । ସେମାନେ ମହୁଆ ମୋଇତ୍ରଙ୍କ ପର୍ଯ୍ୟନ୍ତ ପହଞ୍ଚି ଯାଇଛନ୍ତି । ଏବେ ପ୍ରଚାର କରି ଟିଏମସି ନେତାଙ୍କୁ ହଇରାଣ କରୁଛନ୍ତି । ପଶ୍ଚିମବଙ୍ଗ ସରକାର ସହ ଜଡ଼ିତ ଲୋକଙ୍କୁ ମଧ୍ୟ ହଇରାଣ କରାଯାଉଛି । କେନ୍ଦ୍ରୀୟ ତଦନ୍ତକାରୀ ସଂସ୍ଥା ଭେଦଭାବପୂର୍ଣ୍ଣ ନୀତି ଆପଣାଉଛି ।

ସେ ଆହୁରି କହିଛନ୍ତି, ଆମେ ବହୁତ ବିଚଳିତ ଓ ଚିନ୍ତିତ । କେନ୍ଦ୍ର ସରକାରଙ୍କ ଆଦେଶରେ ସିବିଆଇ, ଇଡି ଓ ଏନ୍ଆଇଏ ଭଳି କେନ୍ଦ୍ରୀୟ ତଦନ୍ତକାରୀ ସଂସ୍ଥା ଏବେ ନିର୍ବାଚନ ସମୟରେ ଆମ କାର୍ଯ୍ୟକର୍ତ୍ତାଙ୍କୁ ଡାକୁଛନ୍ତି । ଆମେ ବି ଚାହୁଁ ନିର୍ବାଚନ ନିରପେକ୍ଷ ହେଉ । କିନ୍ତୁ ସବୁବେଳେ ଟିଏମସକୁ ଟାର୍ଗେଟ୍ କରା ଯାଉଛି । ସମସ୍ତ ରାଜନୈତିକ ଦଳର ଅଧିକାର ସେମାନେ ନିର୍ବାଚନ ପ୍ରଚାର କରିବେ ।