କଟକ,୨୬।୯ : କଟକରେ ପୂଜା ବେଳେ ରାସ୍ତା ଉପରେ ହୋଇପାରିବନି ତୋରଣ। କଟକ ନଗର ସମସ୍ୟା ସମ୍ପର୍କିତ ମାମଲାର ଶୁଣାଣି କରି ହାଇକୋର୍ଟ ଏହି ନିର୍ଦେଶ ଦେଇଛନ୍ତି। ଏଥିସହ ଦଶହରା ପୂଜା ପୂର୍ବରୁ କଟକର ସମସ୍ତ ରାସ୍ତା ମରାମତି କାମ ଶେଷ ହେବ।
କଟଜ ସହର ସମସ୍ୟା ସମ୍ପର୍କିତ ମାମଲାକୁ ନେଇ ହାଇକୋର୍ଟରେ ଆଜି ଶୁଣାଣି ହୋଇଥିଲା। ତେବେ ସହର ସମସ୍ୟାକୁ ନେଇ ହାଇକୋର୍ଟ ଉଦବେଗ ପ୍ରକାଶ କରିଛନ୍ତି। ରାସ୍ତା ଦୁରବସ୍ଥାକୁ ନେଇ ସିଏମସିକୁ ଭତ୍ସନା କରିଥିଲେ ହାଇକୋର୍ଟ । ଏଥିରେ ଆଭାସୀ ଜରିଆରେ ହାଜର ହୋଇଥିଲେ ପୂର୍ତ୍ତ ସଚିବ। ଆସନ୍ତା ୫ ତାରିଖ ସୁଦ୍ଧା ସମସ୍ତ ରାସ୍ତା ମରାମତି କାମ ସରିବ। ଏ ନେଇ ହାଇକୋର୍ଟଙ୍କୁ ପୂର୍ତ୍ତ ବିଭାଗ ସଚିବ ଅବଗତ କରିଥିଲେ।
ଆଗକୁ ଦଶହରା ଆସୁଥିବାରୁ, ରାସ୍ତା ଅବରୋଧ ନକରିବା ଲାଗି ଆଜି ତାଗିଦ କରିଛନ୍ତି ହାଇକୋର୍ଟ। ରାସ୍ତା ଉପରେ ପୂଜା ପେଣ୍ଡାଲ ଓ ତୋରଣ ନିର୍ମାଣ ନ କରିବା,ଶବ୍ଦ ପ୍ରଦୂଷଣ ରୋକିବା ଲାଗି ଡିଜେ ନବଜେଇବା, ବିଦ୍ୟୁତ ତାର ରାସ୍ତା ଉପରେ ନପକେଇବା ଲାଗି ଆଜି ହାଇକୋର୍ଟ ନିର୍ଦ୍ଦେଶ ଦେଇଛନ୍ତି।ଆସନ୍ତା ୩ ତାରିଖରେ ମାମଲାର ପରବର୍ତ୍ତୀ ଶୁଣାଣି ପାଇଁ ଧାର୍ଯ୍ୟ କରାଯାଇଛି। ତା ଭିତରେ ସମସ୍ତ ନିର୍ଦେଶର ସଠିକ ଅନୁପାଳନ ଲାଗି ହାଇକୋର୍ଟ ବିଭାଗୀୟ ଅଧିକାରୀ ମାନଙ୍କୁ ତାଗିତ କରିଛନ୍ତି। ଏହି ଜନସ୍ୱାର୍ଥ ମାମଲାର ଶୁଣାଣି ବେଳେ ସିଏମସି କମିଶନର, ସ୍ବାସ୍ଥ୍ୟ ଅଧିକାରୀ, ସିଟି ଇଞ୍ଜିନିୟର, ଏସସିବି ଅଧିକ୍ଷକ ବ୍ୟକ୍ତିଗତ ଭାବେ କୋର୍ଟରେ ଉପସ୍ଥିତ ଥିଲେ ଅନ୍ୟପଟେ, ରାଜ୍ୟ ସ୍ବାସ୍ଥ୍ୟ ସଚିବ, ନଗର ଉନ୍ନୟନ ବିଭାଗ ସଚିବ ଏବଂ କଟକ ଜିଲ୍ଲାପାଳ ଆଭାସୀ ଜରିଆରର ହାଜର ହୋଇଥିଲେ।
