ବାରଙ୍ଗ,୨୪/୦୮: ନନ୍ଦନକାନନ  ପ୍ରାଣୀ ଉଦ୍ୟାନର ଶିଶୁ ରେଳଗାଡ଼ି ଗତ  ୧୩ ତାରିଖ ଠାରୁ ବନ୍ଦ ହୋଇଥିବା  ବେଳେ ଶୁକ୍ରବାର ଚାଲିଛି । ୧୩  ରାଉଣ୍ଡ ଚାଲିଥିବା ବେଳେ ପ୍ରାୟ ୩୦୦  ପର୍ଯ୍ୟଟକଙ୍କୁ ବୁଲାଇଥିବା ଜଣାପଡ଼ିଛି । ୧୦ ଦିନ ଧରି ପର୍ଯ୍ୟଟକ ନିରାଶ ହୋଇ ଫେରୁଥିବା ବେଳେ ଶୁକ୍ରବାର ଠାରୁ ପର୍ଯ୍ୟଟକ  ପୁଣି ପୂର୍ବଭଳି ଶିଶୁ ରେଳଗାଡ଼ିରେ  ବସି ପ୍ରାଣୀ ଉଦ୍ୟାନର ସବୁଜିମାକୁ  ଉପଭୋଗ କରିବା ସହିତ ଖୋଲାରେ  ବିଚରଣ କରୁଥିବା ତୃଣଭୋଜି ପ୍ରାଣୀ  ମାନଙ୍କୁ ଦେଖିପାରିଛନ୍ତି । 

ସୂଚନାଯୋଗ୍ୟ  ପ୍ରାଣୀ ଉଦ୍ୟାନରେ ୧୯୭୧ ମସିହାରେ  ପ୍ରଥମେ ଡିଜେଲ ଚାଳିତ ଶିଶୁ  ରେଳଗାଡ଼ି ଗଡ଼ି ଚାଲିଥିଲା । ବିଭିନ୍ନ  ସମୟରେ ଯାନ୍ତ୍ରିକ ତୃଟି ଦେଖାଦେବାରୁ  ୨୦୧୪ ମସିହାରେ ରେଳଗାଡ଼ିକୁ ସମ୍ପୂର୍ଣ୍ଣ  ଭାବରେ ବନ୍ଦ କରିଦିଆଯାଇଥିଲା ।  ପୁଣି ୨୦୨୧ ଅକ୍ଟୋବର ୮ ତାରିଖରେ  ବ୍ୟାଟେରି ଚାଳିତ ଶିଶୁ ରେଳଗାଡ଼ି  ଆରମ୍ଭ ହୋଇଥିଲା । ଚଳିତ ବର୍ଷ  ଜାନୁଆରୀ ମାସରେ ବ୍ୟାଟେରି  ଖରାପ ହୋଇଯାଇଥିବାରୁ ପ୍ରାୟ ୩  ମାସ ମଧ୍ୟ ବନ୍ଦ ରହିଥିଲା । ଏହା  ପରେ ମଧ୍ୟ ବିଭିନ୍ନ ସମୟରେ ଛୋଟ  ବଡ଼ ସମସ୍ୟା ପାଇଁ ରେଳଗାଡ଼ି ବନ୍ଦ ରହୁଛି । ଏବେ ଚାର୍ଜିଂ ସମସ୍ୟା ପାଇଁ  ୧୦ ଦିନ ବନ୍ଦ ରହିବା ପରେ ଚାଲିଛି ।