ଭୁବନେଶ୍ୱର,୩୧/୦୫: ପୂର୍ବତଟ ରେଲବାଇ ପକ୍ଷରୁ ଓଡିଶାର ବିଭିନ୍ନ ସ୍ଥାନରେ ଥିବା ରେଳ ଲାଇନ ତଥା ଷ୍ଟେସନର ନବୀକରଣ କାମ ଆରମ୍ଭ ହୋଇଛି । ଏଥିଯୋଗୁଁ କେତେକ ଟ୍ରେନର ମାର୍ଗ ଓ ସମୟ ପରିବର୍ତ୍ତନ କରାଯାଇଥିବା ଗୁରୁବାର ପୂର୍ବତଟ ରେଲବାଇ ପକ୍ଷରୁ ପ୍ରେସ ବିବୃତ୍ତିରେ ସୂଚନା ଦିଆଯାଇଛି ।
ମିଳିଥିବା ସୂଚନା ଅନୁସାରେ, ଢେଙ୍କାନାଳ ଓ ସଦାଶିବପୁର ରେଳ ଷ୍ଟେସନ ମଧ୍ୟରେ ତୃତୀୟ ଓ ଚତୁର୍ଥ ଲାଇନ ଏବଂ ସରଲାଠାରେ ସମ୍ୱଲପୁର-ଝାରସୁଗୁଡା ରେଳ ସେକ୍ସନର ମାଲବାହୀ ଟ୍ରେନ୍ ପରୀକ୍ଷା ଲାଇନ କାର୍ଯ୍ୟକ୍ଷମ ହେବା ପାଇଁ କାମ ଚାଲିଛି । ସେହିପରି ସମ୍ୱଲପୁର ଏବଂ ୱାଲଟିୟର ରେଳ ମଣ୍ଡଳ ମଧ୍ୟରେ ବ୍ରିଜ୍ ନବୀକରଣ କାର୍ଯ୍ୟ ମଧ୍ୟ ଚାଲିଛି ।
ଏଥିପାଇଁ ରାଉରକେଲା-ପୁରୀ-ରାଉରକେଲା ଏକ୍ସପ୍ରେସକୁ ମେ ୩୦ରୁ ଜୁନ ୧୪ ପର୍ଯ୍ୟନ୍ତ ରାଉରକେଲା ଠାରୁ ଓ ଶୁକ୍ରବାରଠୁ ଜୁନ ୧୫ ଯାଏ ପୁରୀରୁ ବାତିଲ କରାଯିବ । ସେହିପରି ପୁରୀ-ତାଳଚେର-ପୁରୀ ପାସେଞ୍ଜର ସ୍ପେସିଆଲ୍ ଗୁରୁବାରଠାରୁ ଜୁନ ୫ ପର୍ଯ୍ୟନ୍ତ ପୁରୀରୁ ଏବଂ ଶୁକ୍ରବାର ଠାରୁ ଜୁନ ୬ ପର୍ଯ୍ୟନ୍ତ ତାଳଚେର ଠାରୁ ବାତିଲ୍ କରାଯିବ । ପଲାସା-ବିଶାଖାପଟ୍ଟନମ୍-ପଲାସା ପାସେଞ୍ଜର ସ୍ପେସିଆଲ୍ ଟ୍ରେନ୍ ଶୁକ୍ରବାର ପାଇଁ ଉଭୟ ସ୍ଥାନରୁ ବାତିଲ୍ କରାଯିବ । ଝାରସୁଗୁଡାସମ୍ୱଲପୁର-ଝାରସୁଗୁଡା ପାସେଞ୍ଜର ସ୍ପେସିଆଲ ଜୁନ୍ ୭ରୁ ୧୪ ପର୍ଯ୍ୟନ୍ତ ଉଭୟ ପାଶ୍ୱର୍ରୁ ବାତିଲ ରହିବ ।
ବିଳାସପୁର-ଟିଟିଲାଗଡ-ବିଳାସପୁର ପାସେଞ୍ଜର ସ୍ପେସିଆଲ ଟ୍ରେନ୍ ବିଳାସପୁରରୁ ଜୁନ୍ ୭ରୁ ୧୪ ଏବଂ ଟିଟିଲାଗଡରୁ ଜୁନ ୮ରୁ ୧୫ ଯାଏଁ ବାତିଲ ରହିବ । ଏଥିସହ ଟିଟିଲାଗଡ-ରାୟପୁର-ଟିଟିଲାଗଡ ପାସେଞ୍ଜର ସ୍ପେସିଆଲ ଟ୍ରେନ୍ ଟିଟିଲାଗଡରୁ ଜୁନ୍ ୭ ରୁ ୧୪ ଯାଏଁ ଏବଂ ରାୟପୁରରୁ ଜୁନ୍ ୮ ରୁ ୧୫ ତାରିଖ ଯାଏଁ ବାତିଲ ରହିବ । ଅନ୍ୟପକ୍ଷରେ ଏର୍ଣ୍ଣାକୁଲମ୍-ଟାଟା-ଏର୍ଣ୍ଣାକୁଲମ୍ ଏକ୍ସପ୍ରେସ୍ ଜୁନ୍ ୬ ରୁ ୧୨ ମଧ୍ୟରେ ଏର୍ଣ୍ଣାକୁଲମ୍ ଠାରୁ ଏବଂ ଜୁନ୍ ୭ରୁ ୧୪ ପର୍ଯ୍ୟନ୍ତ ଟାଟା ଠାରୁ ଚଳାଚଳ କରିବାକୁ ଥିଲା । ଏହାର ନିର୍ଦ୍ଧାରିତ ପଥ ବିଜୟନଗରମ-ଟିଟିଲାଗଡ-ଝାରସୁଗୁଡା ପରିବର୍ତ୍ତନ କରାଯାଇ ଜାରୋଲି-ଜଖପୁରା-କଟକ-ଖୋର୍ଦ୍ଧା ରୋଡ୍-ବିଜୟନଗରମ୍ କରାଯାଇଛି । ତେଣୁ ଏହି ପରିବର୍ତ୍ତିତ ମାର୍ଗରେ ଉଭୟ ପାଶ୍ୱର୍ରୁ ଟ୍ରେନ୍ ଚଳାଚଳ କରିବ ବୋଲି ପୂର୍ବତଟ ରେଳବାଇ ପକ୍ଷରୁ ଜଣାଯାଇଛି ।
