ନବରଙ୍ଗପୁର,୨୭/୨: ନବରଙ୍ଗପୁର ବସଷ୍ଟାଣ୍ଡ ନିକଟ ଆଦିବାସୀ ସଂଗ୍ରହାଳୟ ଭୂତକୋଠିରେ ପରିଣତ ହୋଇଛି । କୋଠା ନିର୍ମାଣକୁ ୨ ଦଶନ୍ଧି ବିତିଯାଇଥିଲେ ମଧ୍ୟ ଏହା ଲୋକଙ୍କ କାମରେ ଲାଗିପାରିନି । କୋଠାକୁ କେତେବେଳେ କଲ୍ୟାଣମଣ୍ଡପ ତ କେତେବେଳେ  ସିମେଣ୍ଟ ଗୋଦାମ ଆଉ କେତେବେଳେ କାଞ୍ଜିଆହୁଦା କରି ପୌରସଂସ୍ଥା ମୁନାଫା କମାଇଲା ।  ଯୋଉଁ ଉଦ୍ଦେଶ୍ୟରେ ଏହା ନିର୍ମାଣ କରାଯାଇଥିଲା  ଦିନଟିଏ ବି କାମରେ ଲାଗିଲାନାହିଁ । ଏବେ  ଜରାଜୀର୍ଣ୍ଣ ହୋଇ ଭୂତକୋଠିରେ ପରିଣତ ହୋଇଥିବା ବେଳେ ଜବରଦଖଲକାରୀ ଏହାକୁ  କବ୍‌ଜା କରି ବସିଛନ୍ତି ।   

୨୦୦୩ରେ ତତ୍କାଳନୀ ରାଜ୍ୟସଭା ସାଂସଦ  ଭଗବାନ ମାଝୀ ଆଦିବାସୀ ସଂଗ୍ରହାଳୟ ପାଇଁ  ଅନୁଦାନ ଦେଇଥିଲେ । ସହରର ଉପକଣ୍ଠରେ  ୨ ଏକର ଜମିରେ ସଂଗ୍ରହାଳୟ ନିର୍ମାଣ  ହୋଇଥିଲା । କୋଠା ଭିତରେ ୬ବଖରା ଘର  ନିର୍ମାଣ କରାଯାଇଥିଲା । କିନ୍ତୁ ଆଦିବାସୀ ପରମ୍ପରା  ସଂସ୍କୃତିର ଛାପକୁ ସଂଗ୍ରହଳାୟ ଭିତରେ ସଜେଇ  ରଖିପାରି ନଥିଲେ ରାଜନେତା ଓ ପ୍ରଶାସନ । କୋଠା  ନିର୍ମାଣ ପରେ ଜିଲ୍ଲା ସଂସ୍କୃତି ବିଭାଗ ଅଧୀନରେ  କିଛି ଦିନ ରହିଥିଲା । ପରେ ପୌରପାଳିକା  ଅଧୀନକୁ ଚାଲିଯାଇଥିଲା । ଶେଷରେ ପୌର  କର୍ତ୍ତୃପକ୍ଷ ଆଦିବାସୀ ସଂଗ୍ରହାଳୟକୁ ଆଶୀର୍ବାଦ ଓ  ପୁଷ୍ପାଞ୍ଜଳି କଲ୍ୟାଣମଣ୍ଡପ ଭାବେ କାମରେ ଲଗାଇ  ବେସରକାରୀ ସଂସ୍ଥାକୁ ଠିକା ସୂତ୍ରରେ ଦେଇଥିଲେ ।  ସେଥିରୁ ଲକ୍ଷାଧିକ ଟଙ୍କାର ଲାଭ ପୌରପାଳିକା  ଉଠାଇଥିଲା । 

ଆଦିବାସୀ ସଂଗଠନର ଅଭିଯୋଗ  ପରେ କୋଠାକୁ ଆଇଟିଡିଏ ବିଭାଗକୁ ହସ୍ତାନ୍ତର  କରାଯାଇଥିଲା । ଗୋଟିଏ ବିଭାଗ ପରେ ଆଉ  ଏକ ବିଭାଗ ହାତକୁ କୋଠା ହସ୍ତାନ୍ତର ହୋଇ  ଚାଲିଥିଲା । ଶେଷରେ କିଛି ଦିନ ପାଇଁ ସିମେଣ୍ଟ  ବ୍ୟବସାୟୀମାନେ ଏହାକୁ ଗୋଦାମଗୃହ ଭାବେ  ବ୍ୟବହାର କରିଥିଲେ । ଅଭିଯୋଗ ପରେ  ଗୋଦାମକୁ ବନ୍ଦ କରିଦିଆଗଲା । ଗୋଦାମ ବନ୍ଦ  ହେବା ପରେ ୨ ଏକର ଜମିକୁ ଧିରେ ଧିରେ  ଜବରଦଖଲକାରୀ କବ୍‌ଜା କରି ନେଇଗଲେ ।  କୋଠାର ୬ ବଖରା ଛାତରୁ ପଲସ୍ତର ଖସିଗଲାଣି ।  ପଦାକୁ ଲୁହାଛଡ ଦିଶୁଛି । ଏଭଳି ସ୍ଥିତିରେ କିଛି  ଦିନ ପାଇଁ ଆଦିବାସୀ ସଂଗ୍ରହାଳୟକୁ କାଞ୍ଜିଆହୁଦା  ଭାବେ ବ୍ୟବହାର କରି ଗୋରୁଗାଈଙ୍କୁ ମଧ୍ୟ  ରଖାଯାଇଥିଲା । ଏବେ କୋଠାଟି ଜରାଜୀର୍ଣ୍ଣ ହୋଇ  ଭୂତକୋଠିରେ ପରିଣତ ହୋଇଛି । ଏନେଇ  ପୌର ନିର୍ବାହୀଅଧିକାରୀ ଶଙ୍କର କେର୍କେଟାଙ୍କୁ  ଯୋଗାଯୋଗ କରିବାରୁ କୋଠା ସଂପର୍କରେ ସେ  ଜାଣି ନଥିବା କହିବା ସହ ତଦନ୍ତ ପରେ ପଦକ୍ଷେପ  ଗ୍ରହଣ କରିବେ ବୋଲି କହିଛନ୍ତି