ଭୁବନେଶ୍ୱର,୧୦/୦୬: ରାଜଧାନୀରେ ପୁଣି କାୟା ବିସ୍ତାର କଲାଣି ଡେଙ୍ଗୁ । ଗତ ଦୁଇ ଦିନରେ ଭୁବନେଶ୍ୱରରୁ ୬ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି । ଏବେ ଠୁ ସ୍ଥିତି ବେକାବୁ ହେଲାଣି । ବିଏମ୍ସି କେବଳ ଡ୍ରା ଡେ ଘୋଷଣା କରି ଚୁପ ବସିଥିବା ଅଭିଯୋଗ ହୋଇଛି । ସରକାରୀ ସୂତ୍ରରୁ ମିଳିଥିବା ସୂଚନା ଅନୁସାରେ ଜୁନ୍ ମାସରେ ମୋଟ୍ ୧୦ ଜଣ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି । ସେଥିରୁ କେବଳ ଗତ ଶୁକ୍ରବାର ଦିନ ଟେଷ୍ଟିଂରୁ ୫ ଜଣ ରୋଗୀ ଚିହ୍ନଟ ହୋଇଛନ୍ତି । ଗତକାଲି ଭୁବନେଶ୍ୱରୁ ଆଉ ଜଣେ ରୋଗୀ ଚିହ୍ନଟ ହୋଇଛନ୍ତି । ଜାନୁଆରୀ ମାସ ଏଯାବତ ଏହି ସଂଖ୍ୟା ୨୯ରେ ପହଞ୍ଚିଛି । ଏହି ସବୁ ରୋଗୀ ସରକାରୀ ଓ ବେସରକାରୀ ହସ୍ପିଟାଲରେ ଚିକିତ୍ସା ହେଉଛନ୍ତି । ବିଶେଷ କରି ଉତ୍ତର ଜୋନ୍ର ବୁଦ୍ଧ ପାର୍କ, ନିଳାଦ୍ରିବିହାର ଅଞ୍ଚଳରୁ ବେଶୀ ଡେଙ୍ଗୁ ରୋଗୀ ଚିହ୍ନଟ ହୋଇଛି ।
ରାଜଧାନୀରେ ଗତ ବର୍ଷ ୫ ହଜାର ଡେଙ୍ଗୁ ରୋଗୀ ଚିହ୍ନଟ ହୋଇଥିଲେ । ଡେଙ୍ଗୁ ୫ ଜଣଙ୍କ ମୁଣ୍ଡ ନେଇଥିଲା । ଏଥିରେ ଜଣେ ଅବସରପ୍ରାପ୍ତ ପୁଲିସ ଅଧିକାରୀ, ଗର୍ଭବତୀ ମହିଳାଙ୍କ ସହ ଜଣ ବରିଷ୍ଠ ନାଗରିକ ପ୍ରାଣ ହରାଇଥିଲେ । ବିଏମ୍ସିର ଖାମଖାଆଲି ମନୋବାବ ଯୋଗୁ ସ୍ଥିତି ବିଗିଡିଥିଲା । ବିଶେଷ କରି ସହିଦନଗର, ନୂଆପଲ୍ଲୀ, ଶାସ୍ତ୍ରୀ ନଗର, ନିଳାଦ୍ରୀ ବିହାର, ପଟିଆ ହଟସ୍ପଟ ପାଲଟିଥିଲା । ବିଏମ୍ସି ସେଥିରୁ କିଛି ଶିଖିଲା ନାହିଁ । ଏ ବର୍ଷ ବି ଡେଙ୍ଗୁ ଉପରମୁହାଁ ହେଲାଣି ।
ଡେଙ୍ଗୁ ମୁକାବିଲା କରିବାକୁ ବିଏମ୍ସି ପକ୍ଷରୁ ପ୍ରତି ଶୁକ୍ରବାରକୁ ଡ୍ରା ଡେ ଘୋଷଣା କରାଯାଇଛି । ସ୍ୱାସ୍ଥ୍ୟ କର୍ମୀ ଓ ବିଏମ୍ସି ମିଳିତ ଭାବେ ବସ୍ତି, ଆପାର୍ଟମେଣ୍ଟ ଯାଇ ଲୋକଙ୍କୁ ସଚେତନ କରିବେ ବୋଲି ଯୋଜନା ହୋଇଥିଲା । ହେଲେ ଘୋଷଣା କରି ବିଏମ୍ସି ଚୁପ ବସିଛି । ଫଳରେ ଡେଙ୍ଗୁ ସଚେତନତା ହୋଇ ପାରୁନି । ଜୁନ୍ ମାସରେ ଡେଙ୍ଗୁ ବଢିଲାଣି । ଆଗକୁ ବର୍ଷା ଋତୁ ଆସୁଥିବାରୁ ସ୍ଥିତି ସାଂଘାତିକ ହେବା ଆଶଙ୍କାକୁ ଏଡାଇ ଦିଆଯାଇ ନପାରେ । ରାଜଧାନୀରେ ପରିମଳ ଅବସ୍ଥା ବି ଶୋଚନୀୟ ହୋଇପଡ଼ିଛି । ବିଭିନ୍ନ ୱାର୍ଡରେ ଅଳିଆ ପଡି ରହୁଛି । ୱାର୍ଡରେ ସଫେଇ ଠପ୍ ହୋଇଯାଇଛି । ଆଗ ଭଳି ଅଳିଆ ଉଠୁନି । ତେଣୁ ସ୍ଥିତି ଆଗକୁ ବିଗିଡିବା ଏକ ପ୍ରକାର ଥୟ । ଏନେଇ ପରିମଳ ବିଭାଗ ପକ୍ଷକୁ କୌଣସି ପଦକ୍ଷେପ ନିଆଯାଉନି ।
ପୂର୍ବରୁ ବିଏମ୍ସି ପକ୍ଷରୁ ମଶା ଉତ୍ପତି ସ୍ଥଳ ଚିହ୍ନଟ କରିବାକୁ ଡ୍ରୋନ ଭେଳିକି ଦେଖାଇଥିଲେ । ଏଥିପାଇଁ ଲକ୍ଷ ଲକ୍ଷ ଟଙ୍କା ଖର୍ଚ୍ଚ ହେଲା । ହେଲେ ମଶା ମଲେ ନାହିଁ । ଏଥର ନୂଆ ସରକାର ଶପଥ ନେଲା ପରେ ନଗର ଉନ୍ନୟନ ବିଭାଗ କଣ ପଦକ୍ଷେପ ନେଉଛି ତାକୁ ଦେଖିବାକୁ ବାକି ରହିଲା।
