ନୂଆଦିଲ୍ଲୀ: ଆତଙ୍କବାଦ ପ୍ରସଙ୍ଗରେ ଆଲୋଚନା କରି ଭାରତର ବୈଦେଶିକ ମନ୍ତ୍ରୀ ଏସ୍ ଜୟଶଙ୍କର କହିଛନ୍ତି, ଆତଙ୍କୀ ସୀମା ସେପଟେ ରହିଲେ ବି ତ୍ରାହି ନାହିଁ । ଜୟଶଙ୍କର ସଫା ସଫା କହିଛନ୍ତି, ଆତଙ୍କବାଦ ବିରୋଧୀ ଲଢ଼େଇ ନେଇ କୌଣସି ନିୟମ ନାହିଁ । ସେ କହିଛନ୍ତି, ୨୦୧୪ ପରେ ଭାରତର ବିଦେଶ ନୀତିରେ ପରିବର୍ତ୍ତନ ଆସିଛି । ଏହା ଆତଙ୍କବାଦରୁ ମୁକ୍ତି ପାଇଁ ରାସ୍ତା ।

ତେବେ କୌଣସି ଦେଶ ଭାରତର ସମ୍ପର୍କ ଆଗକୁ ବଢ଼ିବା ମୁସ୍କିଲ୍ ପ୍ରଶ୍ନରେ ଜୟଶଙ୍କର, ନାଁ ନନେଇ ପାକିସ୍ତାନ ଆଡ଼କୁ ଇସାରା କରିଛନ୍ତି । ଶୁକ୍ରବାର ପୁନେରେ ତାଙ୍କ ପୁସ୍ତକ ହ୍ୱାଏ ଭାରତ ମ୍ୟାଟର୍ସ ଉପରେ ଆଲୋଚନା ବେଳେ ଜୟଶଙ୍କର କହିଛନ୍ତି, ଆତଙ୍କବାଦୀ କୌଣସି ନିୟମରେ ଚାଲୁ ନାହାନ୍ତି । ଆତଙ୍କବାଦୀଙ୍କୁ ଜବାବ୍ ଦେବା ଲାଗି ମଧ୍ୟ କୌଣସି ନିୟମ ନଥିବା ସେ କହିଛନ୍ତି ।

ଜୟଶଙ୍କର କହିଛନ୍ତି, ୧୯୪୭ରେ ପାକିସ୍ତାନ କାଶ୍ମୀରରେ ଆକ୍ରମଣ କରିଥିଲା । ସେତେବେଳେ ଆମ ସେନା ମୁକାବିଲା କରିବା ସହ ଆମେ ଜାତିସଂଘ ଯାଇଥିଲୁ । ଯଦି ପ୍ରଥମରୁ ହିଁ ପାକିସ୍ତାନ ଆତଙ୍କବାଦୀ ଆକ୍ରମଣ କରୁଥିବା ସ୍ପଷ୍ଟ ହୋଇଥାନ୍ତା ତ ନିହାତି ଅଲଗା ନୀତି ହୋଇଥାନ୍ତା ।

ସେ ଆହୁରି ଦାବି କରିଛନ୍ତି ଯେ, ୧୯୬୨ ଯୁଦ୍ଧ ପରେ ୨୦୧୪ ପର୍ଯ୍ୟନ୍ତ ଚୀନ୍ ସୀମାରେ ବିକାଶ ହୋଇ ନାହିଁ । ନରେନ୍ଦ୍ର ମୋଦି ପ୍ରଧାନମନ୍ତ୍ରୀ ହେବା ପରେ ଚୀନ୍ ସୀମାରେ ବିକାଶ କାର୍ଯ୍ୟ ଲାଗି ବଜେଟ୍ ବଢ଼ିଛି । ୩୫୦୦ କୋଟିରୁ ଏବେ ବଜେଟ୍ ବୃଦ୍ଧି ପାଇ ୧୪ ହଜାର ୫୦୦ କୋଟି ଟଙ୍କା ହୋଇଛି ।