ମୁମ୍ବାଇ: ନିର୍ବାଚନୀ ସଭାକୁ ସମ୍ବୋଧନ କରିବା ସମୟରେ ହଠାତ ଅଚେତ ହୋଇ ତଳେ ପଡ଼ିଗଲେ କେନ୍ଦ୍ର ପରିବହନ ମନ୍ତ୍ରୀ ନୀତିନ ଗଡ଼କରୀ । ବୁଧବାର ମହାରାଷ୍ଟ୍ରର ୟବତମାଲରେ ନିର୍ବାଚନୀ ପ୍ରଚାର କରୁଥିଲେ ଗଡ଼କରୀ । ଏହି ସମୟରେ ଉପସ୍ଥିତ ଜନତାଙ୍କ ଉଦ୍ଦେଶ୍ୟରେ ଭାଷଣ ଦେଉଥିଲେ । ଷ୍ଟେଜ ଉପରେ ଭାଷଣ ଦେଉଥିବା ବେଳେ ହଠାତ ଅଚେତ ହୋଇ ପଡ଼ିଯାଇଥିଲେ ଗଡ଼କରୀ । ଅଚେତ ହୋଇଯିବା ପରେ ସାଙ୍ଗେସାଙ୍ଗେ ବିଜେପି ନେତା ନୀତିନ ଗଡ଼କରୀଙ୍କ ସ୍ବାସ୍ଥ୍ୟବସ୍ଥା ପରୀକ୍ଷା କରିଥିଲେ ଡାକ୍ତର ।

ମିଳିଥିବା ସୂଚନା ଅନୁସାରେ, ଆଜି ଗଡ଼କରୀ ୟବତମାଲର ପୁସାଦରେ ଭାଷଣ ଦେଉଥିବା ବେଳେ ଅଚେତ ହୋଇ ତଳେ ପଡ଼ିଯାଇଥିଲେ । ପାଖରେ ଥିବା ଅନ୍ୟ ନେତାମାନେ ତାଙ୍କୁ ସମ୍ଭାଳିନେବା ସହ ଚିକିତ୍ସା ଯୋଗାଇ ଦେଇଥିଲେ । ବିଜେପି ନେତା ଏବଂ କେନ୍ଦ୍ରମନ୍ତ୍ରୀ ନୀତିନ ଗଡ଼କରୀ ନାଗପୁର ଲୋକସଭା ଆସନରୁ ପ୍ରାର୍ଥୀ ହୋଇଛନ୍ତି । ତେବେ ପ୍ରଥମ ପର୍ଯ୍ୟାୟ ନିର୍ବାଚନରେ ଏହି ଆସନରେ ମତଦାନ ଶେଷ ହୋଇଛି । 

ଗଡ଼କରୀ ଆଜି ଏକନାଥ ସିନ୍ଦେଙ୍କ ନେତୃତ୍ବାଧୀନ ଶିବସେନା ପ୍ରାର୍ଥୀ ରାଜଶ୍ରୀ ପାଟିଲଙ୍କ ପାଇଁ ପ୍ରଚାର କରୁଥିଲେ । ରାଜଶ୍ରୀ ପାଟିଲ ୟବତମାଲ-ଓ୍ବାସିମ ଲୋକସଭା ଆସନରୁ ପ୍ରାର୍ଥୀ ହୋଇଛନ୍ତି । ଏହା ବ୍ୟତୀତ ଦ୍ବିତୀୟ ପର୍ଯ୍ୟାୟ ନିର୍ବାଚନରେ ମତଦାନ ହେବାକୁ ଯାଉଥିବା ବୁଲଢ଼ାନା, ଆକୋଲା, ଅମରାବତୀ, ଓ୍ବାର୍ଦ୍ଧା, ହିଙ୍ଗୋଳି, ନାନ୍ଦେଡ ଏବଂ ପ୍ରଭାନି ଆସନ ଲାଗି ମଧ୍ୟ ପ୍ରଚାର କରୁଛନ୍ତି ନୀତିନ ଗଡ଼କରୀ । ଏହି ସବୁ ଆସନରେ ଏପ୍ରିଲ ୨୬(ଶୁକ୍ରବାର) ନିର୍ବାଚନ ହେବାକୁ ଯାଉଛି ।