ଲକ୍ଷ୍ନୌ, ୧୮।୩: ସରକାରୀ ଚାକିରି ହେଉ କି ବେସରକାରୀ ଚାକିରି ହେଉ, ପ୍ରତ୍ୟେକ ଚାକିରିରେ ସପ୍ତାହକୁ ଛୁଟି ଥାଏ । ନଚେତ୍ ଚାକିରି କରୁଥିବା ବ୍ୟକ୍ତି କାମ କରିବା ଚାପରେ ଅସୁସ୍ଥ ହୋଇପଡ଼ନ୍ତି । କିନ୍ତୁ, ଆଜି ଆମେ ଆପଣଙ୍କୁ ଏପରି ଜଣେ ବ୍ୟକ୍ତିଙ୍କ ବିଷୟରେ କହିବୁ, ଯିଏ ୨୬ ବର୍ଷ ଚାକିରିରେ ମାତ୍ର ଗୋଟିଏ ଛୁଟି ନେଇଛନ୍ତି । ଅର୍ଥାତ୍, ସେ ଚାକିରି କରୁଥିବା ସମୟରେ ମାତ୍ର ଗୋଟିଏ ଦିନ ଛୁଟିରେ ରହିଥିଲେ । ଆପଣଙ୍କୁ କଥାଟା ହୁଏତ ବିଶ୍ୱାସ ହେଉନଥିବ କିନ୍ତୁ, ଏହା ସତ । ଏ ବ୍ୟକ୍ତି ଜଣକ ଏମିତି ଆଶ୍ଚର୍ଯ୍ୟକର କାମ କରିଛନ୍ତି, ଯେଉଁଥିପାଇଁ ତାଙ୍କ ନାଁ ଇଣ୍ଡିଆ ବୁକ୍ ଅଫ ରେକର୍ଡରେ ସାମିଲ ହୋଇଛି ।
ଉତ୍ତରପ୍ରଦେଶର ବିଜନୋରର ଦ୍ୱାରିକେଶ ସୁଗାର ଇଣ୍ଡଷ୍ଟ୍ରିଜ୍ ଲିମିଟେଡ୍ ବୁନ୍ଦକିରେ ଅତିରିକ୍ତ ମ୍ୟାନେଜର ପର୍ସନାଲ ଭାବରେ କାର୍ଯ୍ୟ କରନ୍ତି ତେଜପାଲ ସିଂ । ସେ ତାଙ୍କ କାର୍ଯ୍ୟକୁ ଏତେ ଭଲ ପାଉଥିଲେ ଯେ କେବେ ବି ଛୁଟି ନେଇ ନାହାନ୍ତି । ବନ୍ୟା ହେଉ କି ବାତ୍ୟା ହେଉ କି କୌଣସି ମହାମାରୀ ହେଉ ତେଜପାଲ କେବେ ବି ଛୁଟି ନେବାକୁ ଇଚ୍ଛା କରି ନଥିଲେ । ସେ ୨୬ ଡିସେମ୍ବର ୧୯୯୫ରୁ ବୁନ୍ଦକିର ଦ୍ୱାରିକେଶ ସୁଗାର ମିଲରେ ଟ୍ରେନି କ୍ଲର୍କ ଭାବରେ କାର୍ଯ୍ୟ କରିବା ଆରମ୍ଭ କରିଥିଲେ । ୨୬ ଡିସେମ୍ବର ୧୯୯୫ରୁ ୫ ମେ ୨୦୨୧ ପର୍ଯ୍ୟନ୍ତ ପ୍ରାୟ ୨୬ ବର୍ଷର କାର୍ଯ୍ୟକାଳରେ କେବଳ ଗୋଟିଏ ଛୁଟି ନେଇଥିଲେ । ଯେଉଁଥିପାଇଁ ତାଙ୍କ ନାଁ ଏବେ ଇଣ୍ଡିଆ ବୁକ୍ ଅଫ୍ ରେକର୍ଡରେ ସାମିଲ କରାଯାଇଛି ।
ତେଜପାଲ ସବୁବେଳେ ଠିକ୍ ସମୟରେ ନିଜ କାର୍ଯ୍ୟାଳୟରେ ପହଞ୍ଚିଥାନ୍ତି । କମ୍ପାନୀ ତରଫରୁ ସାପ୍ତାହିକ ଛୁଟି ବ୍ୟତୀତ କମ୍ପାନୀରେ ଗୋଟିଏ ବର୍ଷରେ ୪୫ ଦିନ ପାଇଁ ଛୁଟି ବ୍ୟବସ୍ଥା ରହିଛି । କିନ୍ତୁ, ୧୯୯୫ ମସିହାରୁ ୨୦୨୧ ମସିହା ମଧ୍ୟରେ ତେଜପାଲ ମାତ୍ର ଥରେ ହିଁ ଛୁଟି ନେଇଥିଲେ । ତାଙ୍କ ସାନଭାଇର ବିବାହ ପାଇଁ ୧୮ ଜୁନ୍ ୨୦୦୩ରେ କେବଳ ଗୋଟିଏ ଦିନ ପାଇଁ ଛୁଟି ନେଇଥିଲେ । ତେଜପାଲଙ୍କ କହିବା ଅନୁସାରେ ସେ ରବିବାର ଏବଂ କୌଣସି ପର୍ବରେ ମଧ୍ୟ ଛୁଟି ନନେଇ ଅଫିସକୁ ଯାଆନ୍ତି । ଯଦି କୌଣସି ଘରୋଇ କାମ ଥାଏ ତେବେ ସେ ରବିବାର ଦିନ ଶ୍ରୀଘ୍ର କାମ ସାରି ଅଫିସରୁ ବାହାରି ଯାଆନ୍ତି । ଏଥିପାଇଁ ତାଙ୍କ ନାମ ଏହି ସପ୍ତାହରେ ଇଣ୍ଡିଆ ବୁକ୍ ଅଫ୍ ରେକର୍ଡରେ ସାମିଲ ହୋଇଛି ।
ତେଜପାଲ ସିଂ କହିଛନ୍ତି ଯେ ତାଙ୍କ ପିତା ହରି ସିଂ ତାଙ୍କୁ କାମରୁ ଅନାବଶ୍ୟକ ଛୁଟି ନ ନେବାକୁ ଶିଖାଉଥିଲେ । ସେ ଯେଉଁ ସ୍ଥାନରେ କାମ କରୁଥିଲେ ସେହି ସ୍ଥାନଟି ଗାଁଠାରୁ ପ୍ରାୟ ୧୨ କିଲୋମିଟର ଦୂରରେ ଥିଲା । ଗାଁରୁ ମୁଖ୍ୟ ରାସ୍ତାକୁ ଯିବା ପାଇଁ ରାସ୍ତା ନଥିବାରୁ ତାଙ୍କ ସାନଭାଇ ମନୋଜ ତାଙ୍କୁ ପ୍ରତିଦିନ ବାଇକରେ ବସ୍ ଷ୍ଟପ୍ରେ ପହଞ୍ଚାନ୍ତି । ତାଙ୍କ ସ୍ତ୍ରୀ ମଧ୍ୟ ଏଥିରେ ତାଙ୍କୁ ସମ୍ପୂର୍ଣ୍ଣ ସହଯୋଗ କରୁଥିଲେ । ତାଙ୍କର କଠିନ ପରିଶ୍ରମ ଏବଂ ନିଷ୍ଠା ଦେଖି କମ୍ପାନୀ ତାଙ୍କୁ ପ୍ରୋତ୍ସାହିତ କରି ଚାଲିଥିଲା ଏବଂ ବର୍ତ୍ତମାନ ସେ ଅତିରିକ୍ତ ମ୍ୟାନେଜର ପର୍ସନାଲ ପଦରେ କାର୍ଯ୍ୟ କରୁଛନ୍ତି ।