ଟିଟିଲାଗଡ଼,୨୫/୦୮: ଦ୍ରୁତ ଗତିରେ ବ୍ୟାପୁଛି ଡାଇରିଆ । ନୂଆପଡ଼ା ଗାଁରେ ଝାଡ଼ାବାନ୍ତିରେ ଆକ୍ରାନ୍ତ ହେଲେଣି ୬୦ରୁ ଉର୍ଦ୍ଧ୍ୱ ଲୋକ । ତନ୍ମଧ୍ୟରୁ ୪ଜଣ ଗୁରୁତର ରୋଗୀଙ୍କୁ ବଲାଙ୍ଗୀର ଡାକ୍ତରଖାନାରେ ଭର୍ତ୍ତି କରାଯାଇଛି । ଏହି ଝାଡ଼ାବାନ୍ତି ଅଗଷ୍ଟ ମାସ ୨୧ ତାରିଖରୁ ଆରମ୍ଭ ହୋଇଛି । ବଲାଙ୍ଗୀର ଜିଲ୍ଲା ଗୁଡ଼ଭେଲା ବ୍ଳକ ନୂଆପଡ଼ା ଗ୍ରାମରେ ଏଭଳି ଘଟଣା ଦେଖିବାକୁ ମିଳିଛି । 

ସୂଚନା ଅନୁଯାୟୀ, ନୂଆପଡ଼ା ଗାଁରେ ବ୍ୟାପୁଛି ଝାଡ଼ାବାନ୍ତି । ଏହା ଦ୍ରୁତ ଗତିରେ ବ୍ୟାପୁଥିବାରୁ ଗ୍ରାମବାସୀଙ୍କ ମଧ୍ୟରେ ଭୟର ବାତାବରଣ ସୃଷ୍ଟିହୋଇଛି । ତିନିଦିନ ଭିତରେ ଏହା ସାରା ଗାଁକୁ ବ୍ୟାପିଗଲାଣି । ଫଳରେ ୬୦ରୁ ଉର୍ଦ୍ଧ୍ୱ ଲୋକ ଏହି ରୋଗରେ ଆକ୍ରାନ୍ତ ହୋଇଛନ୍ତି । ସେମାନଙ୍କ ମଧ୍ୟରୁ ୪ ଜଣଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ବଲାଙ୍ଗୀର ଡାକ୍ତରଖାନାରେ ଭର୍ତ୍ତି କରାଯାଇଛି । ଏନେଇ ସୂଚନା ପାଇବା ପରେ ଭ୍ରାମ୍ୟମାଣ ହେଲଥ ୟୁନିଟ୍ ସମେତ ଆଶାକର୍ମୀ, ସ୍ୱାସ୍ଥ୍ୟକର୍ମୀ ଗାଁରେ ପହଞ୍ଚି ସ୍ୱାସ୍ଥ୍ୟସେବା ଜାରି ରଖିଛନ୍ତି । ଦୂଷିତ ପାଣି ପିଇବା ଯୋଗୁ ଝାଡ଼ାବାନ୍ତି ବ୍ୟାପୁଥିବା ଅନୁମାନ କରାଯାଉଛି । ତେଣୁ ବିଶୁଦ୍ଧ ଜଳଯୋଗାଣ ପାଇଁ ଗାଁ ମୁଣ୍ଡରେ ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ ପକ୍ଷରୁ ଏକ ଟାଙ୍କି ତିଆରି କରାଯାଇଛି। ଉକ୍ତ ଟାଙ୍କିରୁ ସମଗ୍ର ଗାଁକୁ ଜଳଯୋଗାଣ କରାଯାଉଛି । 

ଅନ୍ୟପଟେ ପ୍ରଶାସନିକ ଅଧିକାରୀମାନେ ଗାଁକୁ ଯାଇ ସ୍ଥିତି ଅନୁଧ୍ୟାନ କରିଛନ୍ତି । ଅସ୍ଥାୟୀ କ୍ୟାମ୍ପ ଖୋଲି ରୋଗୀଙ୍କ ଚିକିତ୍ସା କରାଯାଉଛି । ଡାଇରିଆ ସଂକ୍ରମଣ ରୋକିବାକୁ ଗଳିକନ୍ଦି, ରାସ୍ତାରେ ବ୍ଲିଚିଂ ପାଉଡର ସିଞ୍ଚନ କରିବାକୁ ନିର୍ଦ୍ଦେଶ ଦିଆଯାଇଛି । ଗ୍ରାମବାସୀଙ୍କୁ ସତର୍କତା ଅବଲମ୍ୱନ କରିବାକୁ ସଚେତନ କରାଯିବା ସହ ଚିକିତ୍ସା ପାଇଁ ସ୍ୱାସ୍ଥ୍ୟ ବିଭାଗର ପରାମର୍ଶ ନେବାକୁ କୁହାଯାଇଛି ।