ନୂଆଦିଲ୍ଲୀ: ଲୋକସଭା ନିର୍ବାଚନର ଚତୁର୍ଥ ପର୍ଯ୍ୟାୟ ମତଦାନ ସମାପ୍ତ ହୋଇଛି । ଆଜି ୧୦ ଟି ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳର ୯୬ ଆସନରେ ୬୨ ପ୍ରତିଶତରୁ ଅଧିକ ମତଦାନ ହୋଇଛି । ନିର୍ବାଚନ ଆୟୋଗ ଅନୁସାରେ, ଚତୁର୍ଥ ପର୍ଯ୍ୟାୟ ନିର୍ବାଚନରେ ସବୁଠୁ ଅଧିକ ମତଦାନ ପଶ୍ଚିମବଙ୍ଗରେ ହୋଇଥିବା ବେଳେ ସବୁଠୁ କମ୍ ମତଦାନ ଜାମ୍ମୁକାଶ୍ମୀରରେ ହୋଇଛି । ପଶ୍ଚିମବଙ୍ଗରେ ୭୬.୦୨ ପ୍ରତିଶତ ଭୋଟିଂ ହୋଇଥିବା ବେଳେ ଜାମ୍ମୁକାଶ୍ମୀରରେ ୩୬.୮୮ ପ୍ରତିଶତ ମତଦାନ ହୋଇଛି । ତେବେ ନିର୍ବାଚନ ଆୟୋଗଙ୍କ ଅନୁସାରେ, ସନ୍ଧ୍ୟା ୬ଟା ପରେ ଧାଡ଼ିରେ ଥିବା ଲୋକମାନେ ମତସାବ୍ୟସ୍ତ କରିଛନ୍ତି ।
ଭୋଟର ଟର୍ଣ୍ଣଆଉଟ୍ ଆପ୍ରେ ଉପଲବ୍ଧ ସୂଚନା ଅନୁସାରେ, ଦେଶରେ ୯୬ଟି ଲୋକସଭା ଆସନରେ ୬୨.୯୪ ପ୍ରତିଶତ ଭୋଟିଂ ହୋଇଛି । ପଶ୍ଚିମବଙ୍ଗରେ ୭୬.୦୨%, ଆନ୍ଧ୍ର ପ୍ରଦେଶରେ ୬୮.୧୨%, ମଧ୍ୟ ପ୍ରଦେଶରେ ୬୮.୮୬%, ଓଡ଼ିଶାରେ ୬୩.୮୫%, ଝାଡ଼ଖଣ୍ଡରେ ୬୩.୪୪%, ତେଲଙ୍ଗାନାରେ ୬୧.୫୪%, ବିହାରରେ ୫୫.୯୨%, ଉତ୍ତର ପ୍ରଦେଶରେ ୫୭.୯୭%, ମହାରାଷ୍ଟ୍ରରେ ୫୨.୯୩% ଏବଂ ଜାମ୍ମୁକାଶ୍ମୀରରେ ୩୬.୮୮ ପ୍ରତିଶତ ମତଦାନ ହୋଇଥିବା ଜଣାପଡ଼ିଛି ।
ଚତୁର୍ଥ ପର୍ଯ୍ୟାୟ ନିର୍ବାଚନ ଶାନ୍ତିପୂର୍ଣ୍ଣ ଉପାୟରେ ସଂପନ୍ନ ହୋଇଛି । ହେଲେ ଆନ୍ଧ୍ର ପ୍ରଦେଶ ଏବଂ ପଶ୍ଚିମବଙ୍ଗର କେତେକ ସ୍ଥାନରେ ହିଂସାକାଣ୍ଡ ନେଇ ଖବର ସାମ୍ନାକୁ ଆସିଛି । ତେବେ ପୂର୍ବ ୩ଟି ପର୍ଯ୍ୟାୟ ନିର୍ବାଚନରେ ଯଥାକ୍ରମେ ୬୬.୧୪%, ୬୬.୭୧% ଏବଂ ୬୫.୬୮ ପ୍ରତିଶତ ମତଦାନ ହୋଇଥିଲା । ଆଜି ତେଲଙ୍ଗାନାର ସମସ୍ତ ୧୭ ସିଟ୍ରେ ଭୋଟିଂ ହୋଇଥିବା ବେଳେ ଆନ୍ଧ୍ରପ୍ରଦେଶର ୨୫ ଆସନ, ଉତ୍ତର ପ୍ରଦେଶ ୧୩, ବିହାର ୫, ଝାଡ଼ଖଣ୍ଡର ୪, ମଧ୍ୟ ପ୍ରଦେଶର ୮, ମହାରାଷ୍ଟ୍ରର ୧୧, ଓଡ଼ିଶାର ୪, ପଶ୍ଚିମବଙ୍ଗର ୮ ଏବଂ ଜାମ୍ମୁକାଶ୍ମୀରର ଗୋଟିଏ ସିଟରେ ମତଦାନ ହୋଇଛି ।
