ଭୁବନେଶ୍ୱର,୨୭/୦୫: ରବିବାର ବଙ୍ଗୋପସାଗରରେ ଆସିଥିବା ଭୀଷଣ ସାମୁଦ୍ରିକ ବାତ୍ୟା ‘ରେମାଲ’ ପଶ୍ଚିମବଙ୍ଗର ସାଗରଦ୍ୱୀପ ଓ ବାଂଲାଦେଶର ଖେପୁପଡା ମଧ୍ୟବର୍ତ୍ତୀ ଉପକୂଳରେ ଲ୍ୟାଣ୍ଡଫଲ କରିଛି । ରାତି ୮ଟା ୩୦ରେ ଲ୍ୟାଣ୍ଡଫଲ ପ୍ରକ୍ରିୟା ଆରମ୍ଭ ହୋଇଥିଲା । ପ୍ରାୟ ୪ ଘଣ୍ଟା ଧରି ଅର୍ଥାତ ରାତି ୧୨ଟା ୩୦ ପର୍ଯ୍ୟନ୍ତ ଉପକୂଳରେ ଏହା ତାଣ୍ଡବ ସୃଷ୍ଟି କରିଥିଲା । ଲ୍ୟାଣ୍ଡଫଲ ସମୟରେ ପବନର ବେଗ ଘଣ୍ଟାପ୍ରତି ୯୦ କି.ମି. ଥିଲା । ପରବର୍ତ୍ତୀ ସମୟରେ ପବନର ବେଗ ଘଣ୍ଟା ପ୍ରତି ୧୧୦ରୁ ୧୨୦ ଓ ସ୍ଥଳ ବିଶେଷରେ ୧୩୫ ରହିଥିଲା ।ଫଳରେ ଉପକୂଳରେ ବ୍ୟାପକ କ୍ଷୟକ୍ଷତି ଘଟିଛି ।
ସୋମବାର ୪ ଜିଲ୍ଲାରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ହୋଇପାରେ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ବାଲେଶ୍ୱର, କେନ୍ଦୁଝର, ମୟୂରଭଞ୍ଜ ଓ ଭଦ୍ରକରେ ସ୍ୱଳ୍ପରୁ ମଧ୍ୟମ ଧରଣର ବର୍ଷା ହେବ ।ବାତ୍ୟା ପ୍ରଭାବରେ ଉତ୍ତର ଓଡ଼ିଶାରେ ପ୍ରବଳ ବର୍ଷା ହୋଇଛି । ଚାନ୍ଦବାଲିରେ ୫୧.୯, ପାରାଦୀପରେ ୪୬, ଜଗତସିଂହପୁରରେ ୩୦.୩ ଓ ବାଲେଶ୍ୱରରେ ୨୫.୨ମିମି ବର୍ଷା ହୋଇଛି ।
ପାଣିପାଗ ବିଶେଷଜ୍ଞ ପ୍ରଫେସର ସୁରେନ୍ଦ୍ରନାଥ ପଶୁପାଳକ କହିଛନ୍ତି, ସୋମବାର ବାତ୍ୟାର ବିଶେଷ ପ୍ରଭାବ ରହିବନି । ଖୋର୍ଦ୍ଧାରୁ ବାଲେଶ୍ୱର ଯାଏ ପାଗ ମେଘୁଆ ରହିବ । ତାତି କମିବ । କେନ୍ଦ୍ରାପଡ଼ା ଓ ବାଲେଶ୍ୱରରେ କୋହଲା ପାଗ ରହିବ । ସୋମବାର ମଧ୍ୟାହ୍ନ ସୁଦ୍ଧା ବର୍ଷା ହେବ । ଉପକୂଳରେ ହାଲୁକା ବର୍ଷା ହୋଇପାରେ । କେନ୍ଦ୍ରାପଡ଼ା, ଭଦ୍ରକ ଓ ବାଲେଶ୍ୱରରେ ସ୍ୱଳ୍ପ ବର୍ଷା ହୋଇପାରେ । ଜୁନ୍ ୧ ତାରିଖରେ ବଙ୍ଗୋପସାଗରରେ ପୁଣି ଏକ ଘୂର୍ଣ୍ଣିବଳୟ ହେବ ବୋଲି ଡ. ପଶୁପାଳକ କହିଛନ୍ତି । ସେହିଭଳି ୨୮ରୁ ତାତି ବଢ଼ିବ । ୨୮ ଓ ୨୯ ଦୁଇ ଦିନ ଭୁବନେଶ୍ୱରରେ ତାତି ୪୧ରୁ ୪୨ ଡିଗ୍ରୀ ରହିବ । ୨୯ ସୁଦ୍ଧା ପଶ୍ଚିମ ଓଡ଼ିଶା, ଦକ୍ଷିଣ ଓଡ଼ିଶା ଓ ଆଭ୍ୟନ୍ତରୀଣ ଦକ୍ଷିଣରେ ତାତି ୪୪ ଡିଗ୍ରୀ ରହିବ ।
ସୋଆ ଜଳବାୟୁ ଓ ପାଣିପାଗ କେନ୍ଦ୍ର ନିର୍ଦ୍ଦେଶକ ଡ. ଶରତ ସାହୁ କହିଛନ୍ତି, ବାତ୍ୟା ରାତି ସାଢ଼େ ୯ଟାରେ ବାଂଲାଦେଶ ଓ ପଶ୍ଚିମବଙ୍ଗ ଉପକୂଳରେ ସ୍ଥଳଭାଗ ଅତିକ୍ରମ କରିଛି । ଓଡ଼ିଶା ଉପରେ ଆଉ କୌଣସି ପ୍ରଭାବ ରହିବନି । ସୋମବାର ପାଗ ଶୁଖିଲା ରହିବ । ରାଜ୍ୟକୁ ଅଧିକ ଜଳୀୟବାଷ୍ପ ଆସୁଥିବାରୁ ଉପକୂଳ ଓଡ଼ିଶାରେ କାଳବୈଶାଖୀ ବର୍ଷା ସମ୍ଭାବନା ଅଛି । ଆଜି ରାଜ୍ୟର ଅଧିକାଂଶ ସ୍ଥାନରେ ପାଗ ମେଘୁଆ ରହିବା ସହ ତାତି ୪୦ ଡିଗ୍ରୀ ତଳେ ଥିଲା । ଅନେକ ସ୍ଥାନରେ ତାପମାତ୍ରା ୩୫ ଡିଗ୍ରୀରୁ ତଳକୁ ଖସିଯାଇଥିଲା । କୋରାପୁଟରେ ସର୍ବନିମ୍ନ ୨୬.୮ ଡିଗ୍ରୀ ରହିଥିଲା ।
