ଭୁବନେଶ୍ୱର,୨୨/୦୩: ବଢ଼ିବ ତାତି । ଦିନ ତାପମାତ୍ରା ଆସନ୍ତା ୩ ଦିନ ଭିତରେ ୮ରୁ ୧୦ ଡିଗ୍ରୀ ସେଲସିୟସ୍ ବଢ଼ିପାରେ ଅଧିକାଂଶ ସ୍ଥାନରେ । ରାତି ତାପମାତ୍ରା ୩ରୁ ୫ ଡିଗ୍ରୀ ବଢ଼ିପାରେ । ଏଭଳି ପୂର୍ବାନୁମାନ କରିଛି ପାଣିପାଗ ବିଭାଗ । ଏଭଳି ହେଲେ କେତେକ ସ୍ଥାନରେ ପାରଦ ୪୦ ଡିଗ୍ରୀ ଡେଇଁପାରେ । ଅର୍ଥାତ୍ ତାତି ଆସୁଛି କଲବଲ କରିବାକୁ ହୋଲି ସମୟରେ ।
ଦୁଇଦିନ ବର୍ଷା ଓ କୋହଲା ପାଗ ଯୋଗୁ ରାଜ୍ୟରେ ଗରମ ପୂରା ଗାଏବ ହୋଇଯାଇଥିଲା । ପାରଦ ୧୫-୧୬ ଡିଗ୍ରୀ ଖସିଯାଇଥିଲା । ଭୁବନେଶ୍ୱର, କଟକରେ ବି ତାପମାତ୍ରା ୨୦ ଡିଗ୍ରୀ ତଳେ ପହଞ୍ଚି ଯାଇଥିଲା । ମାର୍ଚ୍ଚରେ ଓଡ଼ିଶା କାଲୁଆ ପାଗରେ ଥରି ସର୍ବକାଳୀନ ରେକର୍ଡ କରିଥିଲା ।
ଗୁରୁବାରଠାରୁ ପାଗ ବଦଳିଛି । ଖରା ବାହାରିଛି । ବର୍ଷା ଆଉ ନାହିଁ । ତଥାପି ୧୪ଟି ସ୍ଥାନରେ ଦିନ ତାପମାତ୍ରା ୩୦ ଡିଗ୍ରୀ ସେଲସିୟସ ତଳେ ଥିଲା ଗୁରୁବାର । ସର୍ବୋଚ୍ଚ ଦିନ ତାପମାତ୍ରା ଟିଟିଲାଗଡ଼ରେ ରେକର୍ଡ ହୋଇଛି । ଏଠାରେ ପାରଦ ୩୪ ଡିଗ୍ରୀ ଥିଲା ଗୁରୁବାର । ଭୁବନେଶ୍ୱର ତାପମାତ୍ରା ୩୦.୮ ଡିଗ୍ରୀ ଥିବାବେଳେ କଟକ ୩୦ ଡିଗ୍ରୀ ଛୁଇଁଥିଲା । ବାଲେଶ୍ୱର, ଅନୁଗୁଳ, ପୁରୀ, ପାରାଦୀପ, ହୀରାକୁଦ, ତାଳଚେର, ଦାରିଙ୍ଗିବାଡ଼ି, ଭଦ୍ରକ, ଯାଜପୁର, ଢେଙ୍କାନାଳ, ବରଗଡ଼, ଦେବଗଡ଼, ରାଉରକେଲା ଆଦି ସ୍ଥାନରେ ଦିନ ତାପମାତ୍ରା ୩୦ ଡିଗ୍ରୀରୁ କମ୍ ରହିଥିଲା ।
ପାଣିପାଗ ବିଭାଗ କହିଛି, ଶୁକ୍ରବାର, ଶନିବାର ଓ ରବିବାର ରାଜ୍ୟ ସାରା ପାଗ ଶୁଖିଲା ରହିବ । ଦିନ ତାପମାତ୍ରା ଅଧିକାଂଶ ସ୍ଥାନରେ ୮ରୁ ୧୦ ଡିଗ୍ରୀ ବଢ଼ିପାରେ ବର୍ତ୍ତମାନ ତୁଳନାରେ । ଏହାପରେ ତାପମାତ୍ରାରେ ବିଶେଷ ପରିବର୍ତ୍ତନ ସମ୍ଭାବନା ନାହିଁ । ତେବେ ୨୫ ତାରିଖରେ ଉତ୍ତର ଓଡ଼ିଶାର ଗୋଟିଏ ଦୁଇଟି ସ୍ଥାନରେ ହାଲୁକା ବର୍ଷା ହୋଇପାରେ ।
