ଥିରୁଅନନ୍ତପୁରମ୍,୧୦।୫: କୋରନାର ଭୟ ନ ଯାଉଣୁ ସାମ୍ନାକୁ ଆସିଛି ଆଉ ଏକ ଜ୍ବର। କେରଳରେ ଅନେକ ଲୋକ ଏହି ଜ୍ବରରେ ଆକ୍ରାନ୍ତ ହୋଇଥିବା ଜଣାପଡିଛି। ଏହି ଜ୍ବରର ନାମ ‘ଓ୍ବେଷ୍ଟ ନାଇଲ ଫିବର’ । ବର୍ତ୍ତମାନ ସୁଦ୍ଧା ଏହି ଜ୍ବରର ୬ ଟି ମାମଲା ସାମ୍ନାକୁ ଆସିଛି । ଏହି ଘଟଣା ଜଣାପଡିବା ପରେ ଆଲର୍ଟରେ ରହିଛି କେରଳ ସ୍ବାସ୍ଥ୍ୟ ବିଭାଗ । ସୂଚନାରୁ ଜଣାପଡିଛି ଯେ ଭାଇରାଲ ସଂକ୍ରମଣ ହେତୁ ଓ୍ବେଷ୍ଟ ନାଇଲ ଫିବର ବ୍ୟାପିବାରେ ଲାଗିଛି ।

ତେବେ କେରଳର ତିନୋଟି ଜିଲ୍ଲାରେ ଏହି ଜ୍ବର ବ୍ୟାପିବାରେ ଲାଗିଛି । ମାଲାପୁରମ, କୋଜିକୋଡ, ତ୍ରିଶୁର ଜିଲ୍ଲାରୁ ଏହି ମାମଲା ସାମ୍ନାକୁ ଆସିଛି । ଏହାପରେ କେରଳରେ ହାଇଆଲର୍ଟ ହେବା  ସହିତ ସତର୍କ ରହିବା ପାଇଁ ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି । ଗତ ସପ୍ତାହରେ ସ୍ବାସ୍ଥ୍ୟ ବିଭାଗର ଉଚ୍ଚସ୍ତରୀୟ ବୈଠକ କରାଯାଇଥିଲା । ଏଥିରେ ରାଜ୍ୟ ସ୍ବାସ୍ଥ୍ୟମନ୍ତ୍ରୀ ଭିନା ଗର୍ଗ ମୌସୁମୀ ପୂର୍ବରୁ ସଫାସୁତରା ରହିବା ପାଇଁ ନିର୍ଦ୍ଦେଶ ଦେଇଥିଲେ । କାର୍ଯ୍ୟକଳାପକୁ ଆହୁରି ଜୋରଦାର କରିବାକୁ ଜିଲ୍ଲା ଚିକିତ୍ସା ଅଧିକାରୀଙ୍କୁ ମଧ୍ୟ ନିର୍ଦ୍ଦେଶ ଦିଆଯାଇଛି। ମଶା ନିୟନ୍ତ୍ରଣ ଓ ସେମାନଙ୍କ ବଂଶବୃଦ୍ଧି ରୋକିବା ଉପରେ ଗୁରୁତ୍ବ ଦେଇଛନ୍ତି ସ୍ବାସ୍ଥ୍ୟମନ୍ତ୍ରୀ । 

୨୦୧୧ ମସିହାରୁ କେରଳର ବିଭିନ୍ନ ଜିଲ୍ଲାରେ ଓ୍ବେଷ୍ଟ ନାଇଲ ଜ୍ବର ରିପୋର୍ଟ ହୋଇଛି। ତେଣୁ ଚିନ୍ତା କରିବାର କୌଣସି ଆବଶ୍ୟକତା ନାହିଁ ବୋଲି କୁହାଯାଇଛି। ଜ୍ବର କିମ୍ବା ଅନ୍ୟାନ୍ୟ ଲକ୍ଷଣ ଥିବା ବ୍ୟକ୍ତିଙ୍କୁ ତୁରନ୍ତ ଚିକିତ୍ସା କରିବାକୁ ସ୍ବାସ୍ଥ୍ୟମନ୍ତୀ ନିବେଦନ କରିଛନ୍ତି । ଦୁଇବର୍ଷ ପୂର୍ବେ କେରଳର  ଜଣେ ବ୍ୟକ୍ତି ଏହି ଜ୍ବରରେ ଆକ୍ରାନ୍ତ ହୋଇ ପ୍ରାଣ ହରାଇଥିଲେ । କ୍ୟୁଲେକ୍ସ ମଶା ଦ୍ବାରା ବ୍ୟାପୁଥିବା ଏହି ଜ୍ବର ୨୦୧୯ ରେ କେରଳରେ ଜଣଙ୍କ ଜୀବନ ନେଇଥିଲା । ଓ୍ବେଷ୍ଟ ନାଇଲ ଭାଇରସ ସାଧାରଣତଃ ଆଫ୍ରିକା, ୟୁରୋପ, ମିଡିସ ଇଷ୍ଟ, ଉତ୍ତର ଆମେରିକା ଏବଂ ପଶ୍ଚିମ ଏସିଆରେ ଦେଖାଯାଏ । ବିଶ୍ବ ସ୍ବାସ୍ଥ୍ୟ ସଂଗଠନ ଅନୁସାରେ, ଓ୍ବେଷ୍ଟ ନାଇଲ ଜ୍ବର ହେଲେ ଜ୍ୱର, ମୁଣ୍ଡବିନ୍ଧା, ଥକାପଣ , ଶରୀରର ଯନ୍ତ୍ରଣା ଓ ବାନ୍ତି  ଭଳି ସମସ୍ୟା ଦେଖାଯାଇଥାଏ । ଏହି ରୋଗ ପାଇଁ ବର୍ତ୍ତମାନ ସୁଦ୍ଧା ଟିକା ବାହାରି ନାହିଁ।