ଦଶମନ୍ତପୁର, ୨୬।୩ : ହୋଲିରେ ଅଘଟଣ । କୋରାପୁଟ ଜିଲ୍ଲା ଦଶମନ୍ତପୁର ବ୍ଲକ ସଦର ପଞ୍ଚାୟତ ଅଧିନସ୍ଥ ମୁନ୍ଦାର ଗାଁ ନିକଟସ୍ଥ ଏକ କଲଭର୍ଟ ତଳେ ଭାରସାମ୍ୟ ହରାଇ ଯାତ୍ରୀ ବାହି ଅଟୋ ଓଲଟି ପଡ଼ିଥିବା ଥିବା ଜଣାପଡ଼ିଛି । ଏଥିରେ ଅଟୋ ଚାଳକ ସହ ବସିଥିବା ୧୬ ଜଣ ଯାତ୍ରୀ ଆହାତ ହୋଇଥିବା ବେଳେ ତାଙ୍କ ମଧ୍ୟରୁ ଜଣେ ୧୭ ବର୍ଷୀୟା ଯୁବତୀଙ୍କର ଘଟଣା ସ୍ଥଳରେ ମୃତ୍ୟୁ ହୋଇଥିବା ଜଣାପଡ଼ିଛି । ମୃତ ଯୁବତୀ ଜଣକ ହେଲେ ଦାଶି ମୁଦୁଲି । 

ସୂଚନା ମୁତାବକ, ୧୫ ଜଣଙ୍କ ମଧ୍ୟରୁ ୫ ଜଣଙ୍କ ଅବସ୍ଥା ଗୁରୁତର ଥିବାରୁ ସେମାନଙ୍କୁ ପ୍ରାଥମିକ ଚିକିତ୍ସା ପରେ କୋରାପୁଟ ଜିଲ୍ଲା ସହିଦ୍ ଲକ୍ଷ୍ମଣ ନାୟକ କଲେଜ୍ ଓ ହସପିଟାଲେକୁ ସ୍ଥାନାନ୍ତରିତ କରାଯାଇଛି । ସ୍ଥାନୀୟ ଅଞ୍ଚଳର ଯୁବକ ମାନେ ଖବର ପାଇ ସମସ୍ତ ଆହତମାନଙ୍କୁ ଉଦ୍ଧାର କରି ଦଶମନ୍ତପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରଠାରେ ଭର୍ତ୍ତି କରିଥିଲେ । ଚିକିତ୍ସା ପରେ ଗୁରୁତରମାନଙ୍କୁ କୋରାପୁଟ ହସ୍ପିଟାଲକୁ ରେଫର କରିଥିବା ସ୍ବାସ୍ଥ୍ୟ ଅଧିକାରୀ ଡ. ଦୀପକ କୁମାର ସାମଲ ସୂଚନା ଦେଇଛନ୍ତି । ଅନ୍ୟ ପଟେ ଖବର ପାଇ, ପୋଲିସ ମଧ୍ୟ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛ୍ । ଏଥିରେ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ କରୁଥିବା ଏଏସ୍‌ଆଇ ଲକ୍ଷ୍ମୀକାନ୍ଥ ପଣ୍ଡା ପ୍ରକାଶ କରିଛନ୍ତି । 

ପୋଲିସ ସୂଚନାରୁ ଜଣାପଡିଛି ଯେ, ଗତକାଲି ସନ୍ଧ୍ୟାରେ ଦଶମନ୍ତପୁରଠାରୁ ଦୋଳପୂର୍ଣ୍ଣିମା ଉପଲକ୍ଷେ ଜାଗର ପାଇଁ ଦେଶିଆ ନାଚ ଚାଲିଥିଲା । ଏହି ନାଚ ଦେଖିବାକୁ ପିଣ୍ଡା ପଦର ପଞ୍ଚାୟତ ଅଧିନସ୍ଥ ବରଗଛ ଗାଁର ୧୮ ରୁ ୧୨ ବର୍ଷ ମଧ୍ୟରେ ଥିବା ନାବାଳିକାମାନେ ରାତିରେ ନାଚ ଦେଖିବାକୁ ଯାଇଥିଲେ । ମଙ୍ଗଳବାର ସକାଳେ ପାଖାପାଖି ସାଢ଼େ ୬ଟା ବେଳେ ଦଶମନ୍ତପୁରଠାରୁ ନିଜ ଗାଁ ଅଭିମୁଖେ ଏକ ଅଟୋ ସାହାଯ୍ୟରେ ୧୬ ଜଣ ଯାତ୍ରୀ ଫେରୁଥିବା ବେଳେ ଅଟୋଟି ହଠାତ୍ ଭାରସାମ୍ୟ ହରାଇ ଓଲଟି କଲଭର୍ଟ ତଳେ ଓଲଟି ପଡ଼ିଥିଲା । ପରେ ସ୍ଥାନୀୟ ଲୋକଙ୍କ ସାହାଯ୍ୟରେ ଦଶମନ୍ତପୁର ସ୍ବାସ୍ଥ୍ୟକେନ୍ଦ୍ରକୁ ଅଣାଯାଇଥିବା ପୋଲିସ କହିଛି । ଏହି  ଅଟୋରେ ବସିଥିବା ସମସ୍ତ ଯାତ୍ରୀ ଗୋଟିଏ ଗାଁର ହୋଇଥିବା ବେଳେ ଅଧିକାଂଶ ବିଭିନ୍ନ ବିଦ୍ୟାଳୟରେ ପଡ଼ୁଥିବା ଛାତ୍ରୀ ।‌