ନୂଆଦିଲ୍ଲୀ,୭।୯: ଦେଶର ରାଜଧାନୀ ଦିଲ୍ଳୀରେ ଜି-୨୦ ଦେଶର ମିଟିଂ ପାଇଁ ପ୍ରସ୍ତୁତି ଆରମ୍ଭ ହୋଇଛି। ଜୋ ବାଇଡେନ୍, ଋଷି ସୁନକଙ୍କ ସହିତ ଦୁନିଆର ଶୀର୍ଷ ନେତା ସ୍ବାଗତ ପାଇଁ ସ୍ବତନ୍ତ୍ର ପ୍ରସ୍ତୁତି କରିଛନ୍ତି। ଏହି ସଂଗଠନକୁ ଦୁନିଆର ଏଜେଣ୍ଡା ତିଆରି କରୁଥିବାର ମନେକରାଯାଏ,ଯେଉଁଥିରେ ଟପ୍-୨୦ ଇକୋନୋମି ରହିଛି। ଋଷ, ଚୀନ୍, ଜର୍ମାନୀ, ଫ୍ରାନ୍ସ, ଆମେରିକା, ବ୍ରିଟେନ୍, ଇଣ୍ଡୋନେସିଆ, ସାଉଦି ଆରବ, କାନାଡା, ତୁର୍କୀ,ଦକ୍ଷିଣ କୋରିଆ, ଦକ୍ଷିଣ ଆଫ୍ରିକା, ବ୍ରାଜିଲ, ମେକ୍ସିକୋ, ଜାପାନ, ଅଷ୍ଟେ୍ରଲିଆ, ଆର୍ଜେଣ୍ଟିନା ଓ ଇଟାଲି ଭଳି ଦେଶର ଏହାର ଅଂଶ ରହିଛି। ଏହାଛଡା ୟୁରୋପିଆନ୍ ୟୁନିଅନ୍କୁ ମଧ୍ୟ ସାମିଲ କରାଯାଇଛି।
ଏଥିରେ ବହୁ ଦେଶ ଅଛନ୍ତି, ଯାହାକି କ୍ଷେତ୍ରଫଳ ଓ ଜନସଂଖ୍ୟା ଦୃଷ୍ଟିରୁ ଛୋଟ। ତଥାପି ମଧ୍ୟ ତାଙ୍କୁ ଏଥିରେ ସାମିଲ କରାଯାଇଛି। ଏଭଳି ସ୍ଥିତିରେ ପାକିସ୍ତାନ ଜି-୨୦ ବୈଠକରେ ସବୁବେଳେ ଏହି ପ୍ରସଙ୍ଗ ଉଠାଇଛି, ତାଙ୍କ ଦେଶ ଏହି ସଂଗଠନରେ କାହିଁକି ନାହିଁ। ଜନସଂଖ୍ୟାରେ ଦୁନିଆର ପଞ୍ଚମ ସବୁଠାରୁ ବଡ ଦେଶ ଓ କ୍ଷେତ୍ରଫଳରେ ତୁର୍କୀ, ଜାପାନ ଓ ଫ୍ରାନ୍ସ ଭଳି ଦେଶଠାରୁ ବଡ଼ ପାକିସ୍ତାନ ଏଥିରୁ ଅଲଗା ରହିବାର କାରଣ ହେଉଛି ଏହାର ଅର୍ଥନୀତି। ପାକିସ୍ତାନର କ୍ଷେତ୍ରଫଳ ଦୁନିଆର ୩୩ ତମ ବଡ ଦେଶ ଓ ଜନସଂଖ୍ୟାରେ ପଞ୍ଚମ ସ୍ଥାନରେ ରହିଛି, କିନ୍ତୁ ଏହି ଅର୍ଥବ୍ୟବସ୍ଥା ମାମଲାରେ ୪୨ତମ ସ୍ଥାନରେ ରହିଛି।
କେବଳ ସେତିକି ନୁହେଁ ବାଂଲାଦେଶ, ଇସ୍ରାଏଲ, ସ୍ବିଡେନ୍, ପୋଲାଣ୍ଡ ଭଳି ଛୋଟ ଦେଶ ମଧ୍ୟ ଅର୍ଥବ୍ୟବସ୍ଥାରେ ପାକିସ୍ତାନକୁ ମାତ୍ ଦେଇଥାଏ। ୨୬ ସେପ୍ଟେମ୍ବର ୧୯୯୯ ରେ ଅସ୍ତିତ୍ବରେ ଆସିଥିବା ଏହି ସଂଗଠନକୁ ଏବେ ବିଶ୍ବ ଅର୍ଥବ୍ୟବସ୍ଥା ଏବଂ ରାଜନୀତିରେ ବିଶେଷଜ୍ଞ ଭାବରେ ମନେକରାଯାଏ। ଚୀନ୍, ଋଷ, ଆମେରିକା, ଫ୍ରାନ୍ସ, ଜର୍ମାନୀ, ବ୍ରିଟେନ୍ ଓ ଭାରତ ମଳି ମହାଶକ୍ତି ଏଥିରେ ସାମିଲ ହେବା କାରଣରୁ ଏହାର ଗୁରୁତ୍ବ ବୁଝି ହୋଇଥାଏ। ସେଭଳି ପାକିସ୍ତାନ ଏହାକୁ ନେଇ ସବୁବେଳେ ଅସନ୍ତୁଷ୍ଟ ରହିଛି। ପାକିସ୍ତାନର ପୂର୍ବତନ ଅର୍ଥମନ୍ତ୍ରୀ ଜାଭେଦ ଅହମ୍ମଦ ବୁର୍କୀଙ୍କ ମତରେ ଜି-୨୦ ଦେଶରେ ସାମିଲ ନହେବା ପାକିସ୍ତାନର କୁଟନୈତିକ ଅସଫଳତା।
