ଆଗ୍ରା,୧୪/୦୫: ବିଭିନ୍ନ ଘରୋଇ କଳହ ଏବଂ ମାନମନାନ୍ତର ପାଇଁ ପତିପତ୍ନୀଙ୍କ ମଧ୍ୟରେ ଛାଡ଼ପତ୍ର  ହେଉଥିବା ଘଟଣା ଅନେକ ଥର ସାମ୍ନାକୁ ଆସିଛି । କିନ୍ତୁ  ‘କୁର୍‌କୁରେ’କୁ ନେଇ ଛାଡ଼ପତ୍ର ଆବେଦନ କରାଯିବା  ଘଟଣା ପ୍ରଥମ ଥର ପାଇଁ ଦେଖିବାକୁ ମିଳିଛି । ଉତ୍ତର ପ୍ରଦେଶର ଆଗ୍ରାରେ ଏହି ଘଟଣା ଘଟିଛି । ପ୍ରତିଦିନ  ୫ ଟଙ୍କାର କୁର୍‌କୁରେ ଖାଇବାକୁ ଦେବା ପାଇଁ ସ୍ୱାମୀ ମନା କରିଦେବାରୁ ତାଙ୍କଠାରୁ ଛାଡ଼ପତ୍ର ପାଇବା ପାଇଁ ପତ୍ନୀ ଆବେଦନ କରିଛନ୍ତି । 

ଓକିଲ ଡ. ସତୀଶ  ଖିରୱାର କହିଛନ୍ତି, ମହିଳା ଜଣକ କୁର୍‌କୁରେ ଚିପ୍ସ ଖାଇବାକୁ ବେଶ୍‌ ଭଲ ପାଆନ୍ତି । ସେ ସବୁଦିନ ଏହାକୁ  କିଣି ଖାଇଥାନ୍ତି । ଏହାକୁ ନେଇ ତାଙ୍କ ସ୍ୱାମୀ ଆପତ୍ତି  ଉଠାଇଥିଲେ । ପ୍ରତିଦିନ କୁର୍‌କୁରେ କାହିଁକି ଖାଉଛ  ବୋଲି ପ୍ରଶ୍ନ କରିଥିଲେ । ଏହାକୁ ନେଇ ଉଭୟଙ୍କ  ମଧ୍ୟରେ ବଚସା ହୋଇଥିଲା । ପରେ ଏହା ଝଗଡ଼ାର  ରୂପ ନେଇଥିଲା । ଶେଷରେ ମହିଳା ଜଣକ ରାଗିକରି  ନିଜ ବାପଘରକୁ ପଳାଇଥିଲେ । ଦୁଇମାସ ଧରି ସେଠାରେ ରହିବା ପରେ ଶେଷରେ ଛାଡ଼ପତ୍ର ଲାଗି  ଆବେଦନ କରିଛନ୍ତି । ବର୍ଷକ ତଳେ ଉଭୟଙ୍କ ବିବାହ  ହୋଇଥିଲା । ପ୍ରଥମେ ସବୁକିଛି ଠିକ୍‌ଠାକ୍‌ ଚାଲିଥିଲା ।  ପେସାରେ ରୁପା କାରିଗର ଭାବେ କାମ କରୁଥିବା ସ୍ୱାମୀ  ପ୍ରଥମ ୬ ମାସ ପତ୍ନୀଙ୍କର ପ୍ରତିଟି କଥା ଶୁଣୁଥିଲେ ।  କିନ୍ତୁ ପରେ ତାଙ୍କ ମନୋଭାବ ବଦଳିଥିଲା ବୋଲି  ଅଭିଯୋଗ ହୋଇଛି । ଓକିଲ ଜଣକ ଏହି ଦମ୍ପତିଙ୍କର  ପରିଚୟ ଦେବାକୁ ମନାକରି ଦେଇଛନ୍ତି । ଏହି ଘଟଣା  ଚର୍ଚ୍ଚାର ବିଷୟ ହୋଇଛି ।