ନୂଆଦିଲ୍ଲୀ: ଓ୍ବାଇଏସଆର କଂଗ୍ରେସ ମୁଖ୍ୟ ଏବଂ ଆନ୍ଧ୍ର ପ୍ରେଦଶର ପୂର୍ବତନ ମୁଖ୍ୟମନ୍ତ୍ରୀ ଜଗନ ମୋହନ ରେଡ୍ଡୀଙ୍କ ତିରୁପତିର ତିରୁମାଳା ମନ୍ଦିର ଗସ୍ତ ରଦ୍ଦ ହୋଇଛି । ତିରୁପତି ବାଲାଜୀ ମନ୍ଦିରରେ ପ୍ରସାଦ ରୂପେ ମିଳୁଥିବା ଲଡୁରେ ପଶୁ ଚର୍ବି ମିଶୁଥିବା ନେଇ ଅଭିଯୋଗ ମଧ୍ୟରେ ତିରୁପତି ମନ୍ଦିର ପରିଦର୍ଶନ କରିବେ ବୋଲି ଗତକାଲି (ଗୁରୁବାର) ଘୋଷଣା କରିଥିଲେ ଜଗନ ରେଡ୍ଡୀ । ହେଲେ ସୁରକ୍ଷା ଦୃଷ୍ଟିରୁ ତାଙ୍କର ଏହି ଗସ୍ତ ବାତିଲ ହୋଇଥିବା ଜଣାପଡ଼ିଛି । ପୂର୍ବ ସରକାରରେ ତିରୁପତି ଲଡୁରେ ପଶୁ ଚର୍ବି ମିଶୁଥିବା ନେଇ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡୁ ଅଭିଯୋଗ କରିଥିଲେ । ଏହା ପରେ ଦେଶବ୍ୟାପି ତିରୁପତି ଲଡୁ ବିବାଦ ଜୋର ଧରିଛି । 

ସେପଟେ ସଙ୍ଗୀନ ଅଭିଯୋଗ ଆସିବା ପରେ ସାରା ରାଜ୍ୟରେ ଥିବା ମନ୍ଦିରରେ ପୂଜା କରିବେ ବୋଲି ଜଗନ ରେଡ୍ଡୀ ଘୋଷଣା କରିଥିଲେ । ସାରା ରାଜ୍ୟରେ ଥିବା ମନ୍ଦିର ପରିଦର୍ଶନ କରିବେ ବୋଲି ଜଗନ ରେଡ୍ଡୀଙ୍କ ଘୋଷଣା ପରେ ରାଜନୀତି ମଧ୍ୟ ଜୋର ଧରିଛି ।  ଜଗନ ରେଡ୍ଡୀ ତିରୁପତି ମନ୍ଦିରରେ ପ୍ରବେଶ ପୂର୍ବରୁ ସେ ହିନ୍ଦୁ ଧର୍ମରେ ବିଶ୍ବାସ କରୁଛନ୍ତି ବୋଲି ଘୋଷଣା କରିବାକୁ ଦାବି କରିଥିଲା ରାଜ୍ୟ ବିଜେପି । ବିଜେପି ନେତା ଏଲ.ଦିନାକର କହିଥିଲେ ଯେ, ଯଦିଓ ଭାରତୀୟ ସମ୍ବିଧାନ ଅନୁସାରେ ସେ (ଜଗନ ରେଡ୍ଡୀ) ନିଜ ପସନ୍ଦର ଧର୍ମକୁ ଅନୁସରଣ କରିପାରିବେ କିନ୍ତୁ ଅନ୍ୟ ଧର୍ମ, ସଂସ୍କୃତି ଓ ପରମ୍ପରା ପ୍ରତି ଶ୍ରଦ୍ଧା ଦେଖାଇବା ଜରୁରି ।  

ସେପଟେ ନିୟମ ଅନୁସାରେ, ତିରୁପତିର ଭଗବାନ ଭେଙ୍କଟେଶ୍ବରଙ୍କ ଦର୍ଶନ ଲାଗି ବିଦେଶୀ ନାଗରିକ ଏବଂ ଅଣହିନ୍ଦୁ ବ୍ୟକ୍ତି ତାଙ୍କ ପ୍ରତି ଶ୍ରଦ୍ଧା ପ୍ରକଟ କରିବା ଦରକାର । ଦିନାକର ଆହୁରି କହିଥିଲେ ଯେ, ‘ତାଙ୍କୁ ହିନ୍ଦୁ ମନ୍ଦିରର ପ୍ରଣାଳୀ ଏବଂ ପ୍ରଥାର ପାଳନ କରିବାକୁ ପଡ଼ିବ, ଅନ୍ୟଥା ଦେବସ୍ଥାନମ (ତିରୁମାଳା ମନ୍ଦିର)ରେ ପ୍ରବେଶ କରିବା ଲାଗି ସେ ଅଯୋଗ୍ୟ ବିବେଚିତ ହେବେ ।’ ଏହା ସହ ଶାସନରେ ଥିବା ବେଳେ ତିରୁପତି ମନ୍ଦିର ପ୍ରସାଦରେ ଅପମିଶ୍ରଣ କରିଥିବାରୁ ବିରୋଧୀ ଦଳ ନେତା କ୍ଷମା ମାଗନ୍ତୁ ବୋଲି ଦାବି କରିଛନ୍ତି ବିଜେପି ନେତା ଏଲ. ଦିନାକର ।