ନୂଆଦିଲ୍ଲୀ,୨୨/୦୩: ଦିଲ୍ଲୀ ଅବକାରୀ ନୀତି ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ମୁଖ୍ୟମନ୍ତ୍ରୀ ତଥା ଆପ୍ ମୁଖ୍ୟ ଅରବିନ୍ଦ କେଜ୍ରିଓ୍ବାଲଙ୍କୁ ଗିରଫ କରିଛି। ତେବେ ଗିରଫ ପୂର୍ବରୁ କେଜ୍ରିଓ୍ବାଲ ସୁରକ୍ଷାକୁ ନେଇ ଦିଲ୍ଲୀ ହାଇକୋର୍ଟଙ୍କ ଦ୍ବାରସ୍ତ ହୋଇଥିଲେ ବି ଏଥିରେ କୋର୍ଟ ତାଙ୍କୁ ଆଶ୍ବସ୍ତି ପ୍ରଦାନ କରିନଥିଲେ। ଏହାର କିଛି ଘଣ୍ଟା ପରେ ଦିଲ୍ଲୀ ମୁଖ୍ୟମନ୍ତ୍ରୀ କେଜରିଓ୍ବାଲଙ୍କ ବାସଭବନରେ ଇଡି ଚଢ଼ାଉ କରିଥିଲା ଏବଂ ଦୁଇ ଘଣ୍ଟାର ଜେରା ପରେ କେଜରିଓ୍ବାଲଙ୍କୁ ଗିରଫ କରିଥିଲା। ଉଲ୍ଲେଖଯୋଗ୍ୟ ଯେ, ତମାମ ମାମଲାରେ ଏହା ହେଉଛି ୧୬ ତମ ଗିରଫଦାରି।
ଗୋଟିଏ ସପ୍ତାହ ପୂର୍ବରୁ ମାର୍ଚ୍ଚ ୧୫ ତାରିଖରେ ଇଡି ତେଲଙ୍ଗାନାର ପୂର୍ବ ମୁଖ୍ୟମନ୍ତ୍ରୀ ଚନ୍ଦ୍ରଶେଖର ରାଓଙ୍କ ଝିଅ ତଥା ବିଆର୍ଏସ୍ ନେତ୍ରୀ କବିିତାଙ୍କୁ ହାଇଦ୍ରାବାଦରୁ ଗିରଫ କରିଥିଲା। ତାଙ୍କ ଉପରେ ମଧ୍ୟ ଅର୍ଥ ହେରଫେର ଅଭିଯୋଗ ହୋଇଥିଲା। ଦିଲ୍ଲୀ ମଦ ନୀତି ମାମଲାରେ ମନୀଷ ସିସୋଦିଆ ଏବଂ ସଞ୍ଜୟ ସିଂହଙ୍କୁ ଇଡି ପୂର୍ବରୁ ଗିରଫ କରିସାରିଛି। ଏହି ମାମଲାରେ ଏବେ ଚତୁର୍ଥ ହାଇ ପ୍ରୋଫାଇଲ ଗିରଫ କରାଯାଇଛି। ଏହି ନେତାଙ୍କୁ ପିଏମ୍ଏଲ୍ଏ ଧାରା ୩ ଏବଂ ଧାରା ୪ ମାଧ୍ୟମରେ ଅର୍ଥ ହେରଫେର ଅଭିଯୋଗରେ ଗିରଫ କରାଯାଇଛି।
ଏହି ମଦ ନୀତି ମାମଲାରେ ପ୍ରଥମ ଗିରଫଦାରି ୨୦୨୨ରେ ହୋଇଥିଲା । ସେତେବେଳେ ଇଡି ସମୀର ମହେନ୍ଦୁଙ୍କୁ ୨୮ ସେପ୍ଟେମ୍ବର ୨୦୨୨ରେ ଗିରଫ କରିଥିଲା। ମହେନ୍ଦୁ ଦେଶର ସବୁଠାରୁ ବଡ଼ ମଦ ବ୍ୟବସାୟୀ ଥିଲେ।
ଏପର୍ଯ୍ୟନ୍ତ କିଏ କିଏ ହୋଇଛନ୍ତି ଗିରଫ?
ଦିଲ୍ଲୀ ମଦ ନୀତି ମାମଲାରେ ବର୍ତ୍ତମାନ ସୁଦ୍ଧା ସମୀର ମହେନ୍ଦୁ, ପି ଶରତ ଚନ୍ଦ୍ର ରେଡ୍ଡି, ବିନୟ ବାବୁ, ବିଜୟ ନାୟର, ଅଭିଶେକ ବୋଇନପଲ୍ଲୀ, ଅମିତ ଆରୋରାଙ୍କୁ ଗିରଫ କରାଯାଇସାରିଛି। ଏହି ସବୁ ଗିରଫଦାରି ୨୦୨୨ରେ ହୋଇଥିବା ବେଳେ ୨୦୨୩ରେ ଇଡି ଗୌତମ ମଲ୍ହୋତ୍ରା, ରାଜେଶ ଯୋଶୀ, ରାଘବ ମଙ୍ଗୁଟା, ଅମନ ଢ଼ାଲ, ଅରୁଣ ପିଲ୍ଲାଇ, ମନୀଷ ସିସୋଦିଆ, ଦିନେଶ ଆରୋରା ଏବଂ ସଞ୍ଜୟ ସିଂହଙ୍କୁ ଗିରଫ କରିଥିଲା ଇଡି। ୨୦୨୪ ରେ ଦ୍ବିତୀୟ ଥରରେ କେଜରିଓ୍ବାଲଙ୍କୁ ଗିରଫ କରିଛି ଇଡି।