ଭୁବନେଶ୍ୱର, ୧୯।୯: ରାଜ୍ୟରେ ସ୍କ୍ରବ୍ ଟାଇଫସ୍ ଆତଙ୍କ ଥମିବାର ନା ନେଉନାହିଁ । ପୁଣି ଜଣଙ୍କ ମୁଣ୍ଡ ନେଇଛି ସ୍କ୍ରବ୍ ଟାଇଫସ୍ । ସୁନ୍ଦରଗଡ଼ରେ ଜଣେ ରୋଗୀଙ୍କ ମୃତ୍ୟୁ ହୋଇଥିବା ଅଭିଯୋଗ ଆସିଛି । ଫଳରେ ରାଜ୍ୟ ସରକାରଙ୍କୁ ସ୍କ୍ରବ୍ ଟାଇଫସ ଚିନ୍ତା ବଢ଼ାଇଛି । ପ୍ରକୃତରେ ସ୍କ୍ରବ୍ ଟାଇଫସ୍ ପାଇଁ ଜୀବନ ଯାଇଛି ନା ଆଉ କିଛି କାରଣ ରହିଛି ? ତାହାର ତଦନ୍ତ ପାଇଁ ଭୁବନେଶ୍ୱରରୁ ବିଶେଷଜ୍ଞ ଦଳ ସୁନ୍ଦରଗଡ଼ ଓ ବରଗଡ଼ ଜିଲ୍ଲା ଗସ୍ତ କରିଥିବା ସୂଚନା ମିଳିଛି । ଜନସ୍ୱାସ୍ଥ୍ୟ ନିର୍ଦ୍ଦେଶକ ଡାକ୍ତର ନିରଞ୍ଜନ ମିଶ୍ର କହିଛନ୍ତି, ବରଗଡ଼ ଓ ସୁନ୍ଦରଗଡ଼ ଜିଲ୍ଲାକୁ ସ୍ୱତନ୍ତ୍ର ଟିମ୍ ପଠାଯାଇଛି । ବରଗଡ଼ ଜିଲ୍ଲାରେ ୫ ସ୍କ୍ରବ୍ ଟାଇଫସ ସନ୍ଦିଗ୍ଧ ମୃତ୍ୟୁ ତଦନ୍ତ ହେବ । ଭୁବନେଶ୍ୱରରୁ ଜଣେ ଯୁଗ୍ମ ନିର୍ଦ୍ଦେଶକ ଓ ଜଣେ ଏପିଡୋମିଓଲଜିଷ୍ଟଙ୍କୁ ପଠାଯାଇଛି । ସେହିପରି ସୁନ୍ଦରଗଡ଼ ଜିଲ୍ଲାକୁ ମଧ୍ୟ ଆଉ ଜଣେ ଯୁଗ୍ମ ନିର୍ଦ୍ଦେଶକଙ୍କୁ ପଠାଯାଇଛି ।
ରାଜ୍ୟରେ ସ୍କ୍ରବ୍ ଟାଇଫସ ସର୍ଭେଲାନ୍ସ କରାଯାଉଛି । ଏଲିଶା ପଦ୍ଧତିରେ ଟେଷ୍ଟିଂ ହେଉଛି । ରୋଗର ତୁରନ୍ତ ଚିହ୍ନଟକୁ ଗୁରୁତ୍ୱ ଦିଆଯାଉଛି । ଏଣୁ ରାଜ୍ୟରେ ସ୍କ୍ରବ୍ ଟାଇଫସ୍ ଟେଷ୍ଟ ସଂଖ୍ୟା ବଢୁଛି । କେବଳ ଏଲିଶା ପଦ୍ଧତିରେ ରୋଗର ପ୍ରକୃତ କାରଣ ଜଣାପଡ଼ିବ । ଏହାଛଡ଼ା ଜିଲ୍ଲାରେ ଲୋକଙ୍କୁ ସଚେତନତା ବଢ଼ାଯାଉଛି ଏବଂ ଡାକ୍ତରଙ୍କୁ ମଧ୍ୟ ଚିକିତ୍ସା ନେଇ ତାଲିମ ଦିଆଯାଇଛି । ଅନ୍ୟପଟରେ ନିପା ଭାଇରସ ଆତଙ୍କ ଉପରେ ମତ ରଖି ଡାକ୍ତର ମିଶ୍ର କହିଛନ୍ତି, ଓଡ଼ିଶାରେ ନିପା ଭାଇରସ୍ର କୌଣସି ପ୍ରଭାବ ନାହିଁ । କେନ୍ଦ୍ର ସରକାର ବି କୌଣସି ମାର୍ଗଦର୍ଶିକା ଜାରି କରିନାହାନ୍ତି । ତଥାପି ରାଜ୍ୟ ସରକାରଙ୍କ ପକ୍ଷରୁ ନଜର ରଖାଯିବ । ଏହାବ୍ୟତୀତ ନିପା ଭାଇରସ୍ ପରୀକ୍ଷା ଓଡ଼ିଶାରେ ସମ୍ଭବ ନୁହେଁ ।
କେବଳ ଏନ୍ଆଇଭି ପୁନେରେ ହିଁ ଏହାର ଟେଷ୍ଟିଂ ବ୍ୟବସ୍ଥା ରହିଛି । ଅନ୍ୟପଟରେ ରାଜ୍ୟରେ ୧୦ ହଜାର ଊଦ୍ଧ୍ୱର୍ ସ୍କ୍ରବ୍ ଟାଇଫସ୍ ନମୁନା ଟେଷ୍ଟିଂ କରାଯାଇଛି । ସେଥିରୁ ସର୍ବାଧିକ କେନ୍ଦୁଝର ଜିଲାରେ ୬୨୭ ରୋଗୀ ଚିହ୍ନଟ ହୋଇଛନ୍ତି । ସେହିପରି ସୁନ୍ଦରଗଡ଼ ଜିଲ୍ଲାରେ ଗତ ୨୪ ଘଣ୍ଟାରେ ୩ ଆକ୍ରାନ୍ତ ହୋଇଛନ୍ତି । ଏହାକୁ ମିଶାଇ ଜିଲ୍ଲାରେ ୧୮୩ ଚିହ୍ନଟ ହୋଇଛନ୍ତି । ସେଥିରୁ ଜଣଙ୍କର ମୃତ୍ୟୁ ହୋଇଛି । ବରଗଡ଼ ଜିଲ୍ଲାରେ ୧୨ ରୋଗୀ ସ୍କ୍ରବ୍ ଟାଇଫ୍ସରେ ଚିହ୍ନଟ ହୋଇଥିବା ବେଳେ ସେଥିରୁ ୬ ଜଣଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି ।
