କୋଲକାତା,୧୯।୪: ପଶ୍ଚିମବଙ୍ଗର ମୁର୍ସିଦାବାଦରେ ରାମ ନବମୀ ଅବସରରେ ହୋଇଥିବା ହିଂସାକାଣ୍ଡକୁ ନେଇ ବିବାଦ ବଢିଛି। ହିଂସାରେ ଆହତ ଲୋକଙ୍କୁ ଦେଖିବାକୁ ଯେତେବେଳେ କଂଗ୍ରେସ ନେତା ଓ ସ୍ଥାନୀୟ ସାଂସଦ ଅଧିର ରଞ୍ଜନ ଚୌଧୁରୀ ମୁର୍ସିଦାବାଦ ମେଡିକାଲ କଲେଜ୍ ହସ୍ପିଟାଲ ପହଁଞ୍ଚିଥିଲେ ତାଙ୍କୁ ପ୍ରଦଶର୍ନକାରୀଙ୍କ ରାଗର ଶିକାର ହେବାକୁ କଡିଥିଲା। ଅଧିୀର ରଞ୍ଜନଙ୍କ ବିରୋଧରେ ବିକ୍ଷୋଭ ପ୍ରଦର୍ଶନ କରୁଥିବା ବିଜେପି କର୍ମୀମାନେ ତାଙ୍କୁ ଘେରି ଯାଇ ନାରାବାଜି କରିଥିଲେ। ଏହାପରେ ସ୍ଥିତି ଖରାପ ହୋଇଯାଇଥିଲା। କଂଗ୍ରେସ ଓ ବିଜେପି କର୍ମୀ ପରସ୍ପର ଭିତରେ ସଂଘର୍ଷର ସମ୍ମୁଖୀନ ହୋଇଥିଲେ।

କଥିତ ଭାବରେ ଜଣେ ବିଜେପି ନେତା ଓ ଅଧିର ରଞ୍ଜନ ଚୌଧୁରୀଙ୍କ ଭିତରେ ହାତହାତି ଭଳି ସ୍ଥିତି ସୃଷ୍ଟି ହୋଇଥିଲା। ଏହା ଭିତରେ ଅଧିର ରଞ୍ଜନ ଚୌଧୁରୀ ସେହି ବିଜେପି ନେତାଙ୍କୁ ଧକ୍କା ଦେଇଥିଲେ। ଏହାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ରିପୋର୍ଟରେ କୁହାଯାଉଛି ଯେ, ପ୍ରଥମେ ଅଧୀର ରଞ୍ଜନଙ୍କ ସୁରକ୍ଷାକର୍ମୀ ବିଜେପି ଜିଲ୍ଲାଧ୍ୟକ୍ଷଙ୍କୁ ଧକ୍କା ମାରିଥିଲେ। ଏହାପରେ ନିଜେ ଅଧିର ରଞ୍ଜନ ସେହି ନେତାଙ୍କୁ ଧକ୍କା ମାରିଥିଲେ। 

ନିର୍ବାଚନର ଠିକ୍ ପୂର୍ବରୁ ହୋଇଥିବା ଏହି ସଂଘର୍ଷ ପରେ ରାଜ୍ୟ ରାଜନୀତିର ଉଷ୍ମତା ବଢିଛି। ଏହାକୁ ନେଇ କଂଗ୍ରେସ ନେତା କହିଛନ୍ତି, ମୁଁ ସେହି ଲୋକଙ୍କୁ ଦେଖିବାକୁ ଯାଇଥିଲି, ଯେଉଁମାନେ ହିଂସାକାଣ୍ଡରେ ଆହତ ହୋଇଛନ୍ତି, କିନ୍ତୁ ବିଜେପି କର୍ମୀମାନେ ହସ୍ପିଟାଲରେ ବିକ୍ଷୋଭ ପ୍ରଦର୍ଶନ କରିବା ଆରମ୍ଭ କରିଦେଇଥିଲେ ଓ କହିଥିଲେ ହିନ୍ଦୁଙ୍କ ଉପରେ ଆକ୍ରମଣ ହେଉଛି ଓ ମୋତେ ଜବାବ ଦେବା ଦରକାର ସେମାନେ କାହିଁକି ଏଭଳି କଲେ ? ଅଧିର ରଞ୍ଜନ କହିଛନ୍ତି, ଏହି ଦଙ୍ଗା ବିଜେପି କରୁଛି। ମୁଁ ନିର୍ବାଚନ କମିଶନ ସହିତ କଥା ହୋଇଛି।’