କାଲିମେଳା/ମାଲକାନଗିରି,୧୧/୧୧: ମୃତ୍ୟୁ ଏମିତି ବି ଆସେ ।ବାସନ ମାଜିବା ବେଳେ ଉପରେ ପଡ଼ିଗଲା ତେନ୍ତୁଳିଗଛ। ଘଟଣାସ୍ଥଳରେ ପ୍ରାଣ ହରାଇଲେ ଜଣେ ମହିଳା । ବର୍ତ୍ତିଗଲେ ତାଙ୍କ ପରିବାର । ଏଭଳି ଦୁଃଖଦ ଘଟଣା ଘଟିଛି କାଲିମେଳା ଥାନା କାଙ୍ଗୁରୁକୋଣ୍ଡା ପଞ୍ଚାୟତ ସାଲମାରିକୋଣ୍ଡା ଗାଁରେ । ମୃତା ହେଲେ ନୀଳକଣ୍ଠ ପାତ୍ରଙ୍କ ସ୍ତ୍ରୀ ଗୌରୀ ପାତ୍ର(୪୫) । 

ଗୌରୀ ଶୁକ୍ରବାର ସକାଳେ ଘର ଆଗରେ ବାସନ ମାଜୁଥିଲେ । ହଠାତ୍‌  ନିକଟରେ ଥିବା ଏକ ତେନ୍ତୁଳିଗଛ ଉପୁଡ଼ି ପଡ଼ିଥିଲା । ଏହା ତାଙ୍କ ଟିଣଛପର  ଘର ଉପରେ ପଡ଼ିଥିଲା । ଛପର ଓ ଗଛ ଗୌରୀଙ୍କ ଉପରେ ପଡ଼ିଯାଇଥିଲା ।  ପରିବାରର ଅନ୍ୟ ସଦସ୍ୟମାନେ ବର୍ତ୍ତି ଯାଇଥିଲେ। ପରିବାର ଓ  ପଡ଼ୋଶୀମାନେ ତାଙ୍କୁ ଉଦ୍ଧାର କରି କାଲିମେଳା ମେଡିକାଲକୁ ନେଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। କାଲିମେଳା ଅଗ୍ନିଶମ  ବାହିନୀ ପହଞ୍ଚି ଗଛ କାଟି ସଫା କରିଥିଲେ। ଗୌରୀଙ୍କ ୩ ପୁଅ ଓ ଜଣେ  ଝିଅ ଅଛନ୍ତି । ପୁଲିସ ପହଞ୍ଚି ଶବ ଜବତ କରି ବ୍ୟବଚ୍ଛେଦ କରାଇବା ପରେ ପରିବାରକୁ ହସ୍ତାନ୍ତର କରିଛି ।