ବ୍ୟାସନଗର, ୧୯/୪ : ଯାଜପୁର ରୋଡ ଥାନା ଅଧୀନ ଯୋକଡିଆ ନିକଟ ଖରସ୍ରୋତା ନଦୀରେ ଗୁରୁବାର ଗାଧୋଇବାକୁ ଯାଇ ୨ ଭାଇ ବୁଡ଼ି ଯାଇଥିଲେ। ଆଜି ସକାଳୁ ଯୋକଡ଼ିଆ ନୂଆ ପୋଲ ନିକଟରୁ ବଡ଼ଭାଇର ମୃତଦେହ ଉଦ୍ଧାର ହୋଇଛି। ମୃତକ ଜଣଙ୍କ ହେଉଛନ୍ତି ଶାଶ୍ଵତ। ଏବେବି ଅନ୍ୟ ଜଣେ ନିଖୋଜ ଅଛନ୍ତି।
ସୂଚନାନୁଯାୟୀ, ଶିବାନନ୍ଦ ନଗରରେ ରହୁଥିବା ଶେଖର ଚନ୍ଦ୍ର ସ୍ୱାଇଁଙ୍କ ଦୁଇପୁଅ ଶାଶ୍ଵତ(୨୪ ବର୍ଷ) ଓ ସ୍ଵସ୍ତିକ(୨୧ ବର୍ଷ) ଯୋକଡିଆ ନିକଟ ଖରସ୍ରୋତା ନଦୀରେ ଗୁରୁବାର ଗାଧୋଇବାକୁ ଯାଇ ବୁଡ଼ି ଯାଇଥିଲେ। ଆଜି ସକାଳୁ ଯୋକଡ଼ିଆ ନୂଆ ପୋଲ ନିକଟରେ ଶାଶ୍ଵତର ମୃତଦେହ ଭାସୁଥିବା ଦେଖିବାକୁ ମିଳିଥିଲା। ସ୍ଥାନୀୟ ଲୋକେ ଏନେଇ ପୋଲିସକୁ ଖବର ଦେଇଥିଲେ। ଯାଜପୁର ରୋଡ ପୁଲିସ ପହଞ୍ଚି ମୃତଦେହ ଉଦ୍ଧାର କରିବା ସହ ଶବ ବ୍ୟବଚ୍ଛେଦ ପାଇଁ ନିକଟସ୍ଥ ମେଡ଼ିକାଲକୁ ପଠାଇଛି। ଖବର ଲେଖା ହେବା ପର୍ଯ୍ୟନ୍ତ ସାନ ଭାଇ ସ୍ଵସ୍ତିକର କୌଣସି ସନ୍ଧାନ ମିଳିନାହିଁ।