ଭୁବନେଶ୍ୱର, ୦୯/୦୪: କ’ଣ ହେବ ଭେଟେରାନଙ୍କ ଭାଗ୍ୟ? ଏ ବୟସ୍କ ଯୋଦ୍ଧାମାନେ ସାଧାରଣ ନିର୍ବାଚନ ବୈତରଣୀ ଡେଇଁଯିବେ ନା ଝୁଣ୍ଟି ପଡ଼ି ଅଟକିଯିବେ? ୨୦୨୪ ମହାସମର ପାର୍ କରିପାରିବେ ତ! ମନରେ ହଜାରେ ପ୍ରଶ୍ନ । କ’ଣ ହେବ? ବିଜୟ ନା ପରାଜୟ? ଅଧିକାଂଶ ଧରି ନେଇଛନ୍ତି, ଏହା ହୁଏତ ଶେଷ ସୁଯୋଗ । ଏଥର ନ ହେଲେ ଆଉ ନୁହେଁ । ସରିଯିବ ଲଢ଼େଇ । ପଡ଼ିଯିବ ପୂର୍ଣ୍ଣଛେଦ । ତେଣୁ କଳ, ବଳ, କୌଶଳ ଲଗାଇ ଦେଇଛନ୍ତି ସମସ୍ତେ । ଯେମିତି ହେଉ ଏ ନିର୍ଣ୍ଣାୟକ ଲଢ଼େଇରେ ବିଜୟ ପତାକା ଉଡ଼ାଇବାକୁ ହେବ । ଅଧିକାଂଶ ଭେଟେରାନଙ୍କୁ ପୁଣି ଥରେ ସୁଯୋଗ ଦେଇଛି ବିଜେଡି । ଏମିତିକି ନିଜ ଆଡ଼ୁ ଓହରି ପରିବାରର ଦାୟାଦଙ୍କ ପାଇଁ ଟିକଟ ଲବି ଚଳାଇବା ଦଳର ବହୁ ବୟସ୍କ ନେତାଙ୍କୁ ରିପିଟ କରିଛି ବିଜେଡି ।
ଭେଟେରାନ ଯୋଦ୍ଧା ଡାକ୍ତର ରମେଶ ଚନ୍ଦ୍ର ଚ୍ୟାଉପଟ୍ଟନାୟକଙ୍କ ବଳ ଉପରେ ଭରସା କରିଛି ବିଜେଡି । ୫ ବର୍ଷର ଲମ୍ବା ପ୍ରତୀକ୍ଷା ପରେ ପୁଣି ଥରେ ବ୍ରହ୍ମପୁର ବିଧାନସଭା ମଇଦାନକୁ ଓହ୍ଲାଇଛନ୍ତି ଚ୍ୟାଉପଟ୍ଟନାୟକ । ୮୧ ବର୍ଷୀୟ ଏହି ଭେଟେରାନ ନେତାଙ୍କୁ ଟିକଟ ଦେଇ ବିଜେଡି ବ୍ରହ୍ମପୁର ଗଡ଼ ଜିତିବାକୁ ଲକ୍ଷ୍ୟ ରଖିଛି । ୧୯୯୫ରୁ ୨୦୧୪ ଯାଏଁ ସେ ଲଗାତାର ୫ ଥର ଏ ଆସନରୁ ବିଧାୟକ ହୋଇଛନ୍ତି । ୨୦୧୯ରେ ଟିକଟ କଟିଥିଲା । ହେଲେ ଏବେ ପୁଣି ସେ ମଇଦାନ କମ୍ପାଇବାକୁ ପ୍ରସ୍ତୁତ ।
ମନ୍ତ୍ରୀ ଅଶ୍ୱିନୀ ପାତ୍ରଙ୍କ ବୟସ ୭୩ ଡେଇଁଲାଣି । ବିଜେଡି ଟିକଟରେ ସେ ପୁଣି ଥରେ ଜଳେଶ୍ୱରରୁ ପ୍ରାର୍ଥୀ ହୋଇଛନ୍ତି । ଏ ଆସନରୁ ୫ ଥର ଜିତିଥିବା ଅଶ୍ୱିନୀ ଏବେ ଜିଲ୍ଲା ସଭାପତି ଦାୟିତ୍ୱ ବି ତୁଲାଉଛନ୍ତି । ଅଶ୍ୱିନୀଙ୍କ ବିରୋଧରେ ବିଜେପି ବ୍ରଜ ପ୍ରଧାନଙ୍କୁ ପ୍ରାର୍ଥୀ କରିଥିବାବେଳେ କଂଗ୍ରେସରେ ଟିକଟ ଅଙ୍କ ଛିଣ୍ଡିନି ।
ଆଉ ଦୁଇ ଭେଟେରାନ ଯୋଦ୍ଧା ହେଲେ ଭଣ୍ଡାରିପୋଖରୀ ବିଧାୟକ ପ୍ରଫୁଲ୍ଲ ସାମଲ ଓ ମନ୍ତ୍ରୀ ପ୍ରଫୁଲ୍ଲ ମଲ୍ଲିକ । ଉଭୟ ପ୍ରଫୁଲ୍ଲଙ୍କୁ ୭୭ ଛୁଇଁଲାଣି । ଏଥର ପ୍ରଫୁଲ୍ଲ ସାମଲ ନିଜ ପୁଅ ପାଇଁ ଟିକଟ ଚାହୁଁଥିଲେ । ହେଲେ ବରପଦା ଇଞ୍ଜିନିୟରିଂ କଲେଜ ବିବାଦ ଉଠିବା ପରେ ତାଙ୍କ ପୁଅର ପତ୍ତା କଟିଲା । ଦଳ ପ୍ରଫୁଲ୍ଲଙ୍କୁ ଭଣ୍ଡାରିପୋଖରୀରୁ ନେଇ ଭଦ୍ରକରେ ପ୍ରାର୍ଥୀ କରାଇଛନ୍ତି ।
ବିଜେପି ଭଦ୍ରକରେ ନବାଗତ ସୀତାଂଶୁ ଶେଖର ମହାପାତ୍ରଙ୍କୁ ଟିକଟ ଦେଇଛି । ଏଥର ଭଦ୍ରକ ଆସନରେ ଲଢ଼େଇ ରୋମାଞ୍ଚକ ହୋଇପାରେ । କାମାକ୍ଷାନଗରରୁ ୪ ଥର ଜିତିଥିବା ପ୍ରଫୁଲ୍ଲ ମଲ୍ଲିକ ପୁଣି ଲଢ଼େଇ ପାଇଁ ଓହ୍ଲାଇଛନ୍ତି । ସାମ୍ନା କରିବେ ବିଜେପିର ଶତ୍ରୁୂଘ୍ନ ଜେନାଙ୍କୁ । କଂଗ୍ରେସ ଏଯାଏଁ ପ୍ରାର୍ଥୀ ଘୋଷଣା କରିନି ପ୍ରଫୁଲ୍ଲଙ୍କ ବିରୋଧରେ । ୫ ଥରିଆ ବିଧାୟକ ଡାକ୍ତର ନୃସିଂହ ସାହୁ ୨୦୧୯ରେ ବହୁ କଷ୍ଟରେ ଜିତିଥିଲେ । ବୟସ ୭୫ ଡେଇଁଥିବାବେଳେ ଏଥର ନିର୍ବାଚନ ଲଢ଼ିବା ନେଇ ସନ୍ଦେହ ଉପୁଜୁଥିଲା । ହେଲେ ନୃସିଂହଙ୍କ ଭଳି ଭେଟେରାନ ଯୋଦ୍ଧାଙ୍କୁ ପୁଣି ପରଜଙ୍ଗ ମଇଦାନରେ ଓହ୍ଲାଇଛି ବିଜେଡି ।
ପୁଣି ଥରେ ପର୍ଜଙ୍ଗରେ ନୃସିଂହଙ୍କୁ ଟକ୍କର ଦେଉଛନ୍ତି ବିଜେପିର ବିଭୂତି ଭୁଷଣ ପ୍ରଧାନ । ୨୦୧୯ରେ ମାତ୍ର ୭୪୦ ଖଣ୍ଡ ଭୋଟ ବ୍ୟବଧାନରେ ନୃସିଂହ ହରାଇଥିଲେ ବିଭୂତିଙ୍କୁ । ପୁଅର ରାଜନୈତିକ ଭବିଷ୍ୟତ ପାଇଁ ବାଟ ଛାଡ଼ିବାକୁ ପ୍ରସ୍ତୁତ ଥିବା ବରିଷ୍ଠ ମନ୍ତ୍ରୀ ରାଜେନ୍ଦ୍ର ଢୋଲକିଆଙ୍କୁ ପୁଣି ବିଜେଡି ନୂଆପଡ଼ାରୁ ପ୍ରାର୍ଥୀ କରିଛି ।ଏ ଆସନରୁ ସେ ୩ ଥର ଜିତିଥିବାବେଳେ ଏଥର କଡ଼ା ଲଢ଼େଇ ସାମ୍ନା କରିବାକୁ ପଡ଼ିପାରେ । ସାମ୍ନାରେ ଅଛନ୍ତି ପିସିସି ସଭାପତି ଶରତ ପଟ୍ଟନାୟକ ଓ ବିଜେପିରୁ ବସନ୍ତ ପଣ୍ଡାଙ୍କ ପୁଅ ଅଭିନନ୍ଦନ ପଣ୍ଡା । ସେହିପରି ପ୍ରଥମ ଥର ବିଧାନସଭା ମଇଦାନକୁ ଓହ୍ଲାଇଥିବା ପିସିସି ସଭାପତି ଶରତଙ୍କ ପାଇଁ ଏହା କୌଣସି ଅଗ୍ନି ପରୀକ୍ଷାଠାରୁ କମ୍ ନୁହେଁ । ପୂର୍ବରୁ ସେ ଲୋକସଭା ସାଂସଦ ଥିଲେ ମଧ୍ୟ କେବେ ବିଧାନସଭା ପାଇଁ ଲଢ଼ିନଥିଲେ ।
ଭେଟେରାନ ପଦ୍ମନାଭ ବେହେରା ବି ନିଜ ଦାୟାଦଙ୍କ ଟିକଟ ଚାହୁଁଥିଲେ । ଦଳ ପୁଣି ତାଙ୍କୁ ଟିକଟ ଦେଲା ବୀରମହରାଜପୁରରୁ । ପଦ୍ମନାଭ ଫୁଲବାଣୀରୁ ୨ ଥର ଓ ବୀରମହରାଜପୁରରୁ ୩ଥର ବିଧାୟକ ହୋଇଛନ୍ତି । ଏ ଆସନରେ ବିଜେପି ପୁଣି ରଘୁନାଥ ଜଗଦଲାଙ୍କୁ ଟିକଟ ଦେଇଛି । ଏଥର ଟିକଟକୁ ନେଇ ପଦ୍ମନାଭ ଦଳ ଭିତରେ ଅସନ୍ତୋଷର ସାମ୍ନା କରିଥିବାବେଳେ ଲଢ଼େଇ ସଂଘର୍ଷପୂର୍ଣ୍ଣ ହୋଇପାରେ ।
ବିଜେଡିର ଭେଟେରାନ ଯୋଦ୍ଧା ମଧ୍ୟରେ ମନ୍ତ୍ରୀ ପ୍ରଦୀପ ଅମାତ (୭୨) ପୁଣି ବୌଦ୍ଧ ମଇଦାନରେ ଓହ୍ଲାଇଛନ୍ତି । ୫ ଥର ଜିତି ସାରିଛନ୍ତି । ଏଥର ତାଙ୍କ ବିରୋଧରେ ବିଜେପିରୁ ପ୍ରାର୍ଥୀ ଅଛନ୍ତି ସରୋଜ ପ୍ରଧାନ ।
ବିଜେପିରୁ ତିନି ଭେଟେରାନ ଲୋକସଭା ମଇଦାନକୁ ଓହ୍ଲାଇଛନ୍ତି । ଢେଙ୍କାନାଳରୁ ରୁଦ୍ର ପାଣି (୬୪) ଓ ବାଲେଶ୍ୱରରୁ ପ୍ରତାପ ଷଡ଼ଙ୍ଗୀ (୬୯) ଓ କଟକରୁ ଭର୍ତ୍ତୃହରି ମହତାବ (୬୬) । ୬ ଥରିଆ ସାଂସଦ ଭର୍ତ୍ତୃହରି ବିଜେଡି ଛାଡ଼ି ପ୍ରଥମ ଥର ପାଇଁ ବିଜେପି ଟିକଟରେ କଟକରୁ ଲଢ଼ୁଛନ୍ତି । ତାଙ୍କ ସାମ୍ନାରେ ଏଥର ବିଜେଡିର ନବାଗତ ସଂତୃପ୍ତ ମିଶ୍ର ଅଛନ୍ତି । ସେହିପରି ଢେଙ୍କାନାଳରେ ବିଜେଡିର ନବାଗତ ଡା.ଅବିନାଶ ସାମଲଙ୍କ ସହ ଲଢ଼ୁଛନ୍ତି ରୁଦ୍ର । ସେପଟେ ପ୍ରତାପଙ୍କ ବିରୋଧରେ ବିଜେଡି କିମ୍ବା କଂଗ୍ରେସ କାହାକୁ ପ୍ରାର୍ଥୀ ଘୋଷଣା କରିନାହାନ୍ତି । କଂଗ୍ରେସରୁ ବାଲେଶ୍ୱରରେ ଭେଟେରାନ ଶ୍ରୀକାନ୍ତ ଜେନା (୭୩) ସାଂସଦ ପ୍ରାର୍ଥୀ ହେବା ସମ୍ଭାବନା ଅଛି । ବିଜେଡି ସରପ୍ରାଇଜ୍ କାର୍ଡ ଖେଳିପାରେ । ଆଠମଲ୍ଲିକ ବିଧାନସଭା ଆସନରେ ଭେଟେରାନ ସଞ୍ଜୀବ ସାହୁ (୬୪)ଙ୍କୁ ବିଜେପି ପ୍ରାର୍ଥୀ କରିଛି । ଏକଦା ବିଜେଡିର ଟାଣୁଆ ନେତା ଥିବା ସଞ୍ଜୀବଙ୍କ ପାଇଁ ଏଥର କର ବା ମର ଲଢ଼େଇ ସ୍ଥିତି ।
କଂଗ୍ରେସର ଭେଟେରାନ ଯୋଦ୍ଧା ତାଲିକାରେ ୩ ଥରିଆ ବିଧାୟକ କିଶୋର ପଟେଲ (୭୮)ଙ୍କ ନାଁ ଅଛି । ବଜ୍ରରାଜନଗରରୁ ଏଥର ଦଳ ତାଙ୍କୁ ପ୍ରାର୍ଥୀ କରିଛି । ୧୯୯୫ରେ ସେ ଶେଷ ଥର ପାଇଁ ବିଧାୟକ ହୋଇଥିଲେ ସୁନ୍ଦରଗଡ଼ରୁ । ସୁନ୍ଦରଗଡ଼ କଂଗ୍ରେସ ଲୋକସଭା ପ୍ରାର୍ଥୀ ଜନାର୍ଦ୍ଦନ ଦେହୁରୀ (୬୪) ବି ୧୯୯୫ରେ ବଣାଇରୁ ବିଧାୟକ ହୋଇଥିଲେ । ଉଭୟଙ୍କ ପାଇଁ ଏଥର ଲଢ଼େଇ ବହୁ କଠିନ ।
ପିସିସି ପ୍ରଚାର କମିଟି ଅଧ୍ୟକ୍ଷ ଭକ୍ତ ଦାସ ବି ଏଥର ୩୯ ବର୍ଷ ପରେ ବିଧାନସଭା ପରୀକ୍ଷା ଦେବେ । ଏଥର ସେ ନର୍ଲାରୁ ହୋଇଛନ୍ତି ପ୍ରାର୍ଥୀ। ଏ ଆସନରେ ବିଜେପି ଅନିରୁଦ୍ଧ ପଧାନଙ୍କୁ ଟିକଟ ଦେଇଥିବାବେଳେ ବିଜେଡିର ଟିକଟ ଅଙ୍କ ଛିଣ୍ଡିପାରିନି । ବିଜେଡି ନର୍ଲାରେ ସରପ୍ରାଇଜ୍ କାର୍ଡ ବି ଖେଳିପାରେ ।
ଯଦି ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ ପୁଣି ଥରେ ନିର୍ବାଚନ ମଇଦାନକୁ ଓହ୍ଲାଇବେ, ତେବେ ତାଙ୍କ ଉପରେ ସଭିଙ୍କ ନଜର ରହିବ । ପାଖାପାଖି ୮୨ ବର୍ଷ ତାଙ୍କୁ ହେଲାଣି । ଏଥର ଭଣ୍ଡାରିପୋଖରୀକୁ ନେଇ ତାଙ୍କ ନାଁ ବେଶ୍ ଚର୍ଚ୍ଚାରେ । ପୂର୍ବତନ ପିସିସି ସଭାପତି ଜୟଦେବ ଜେନା ବି ଆନନ୍ଦପୁରରୁ ଲଢ଼ିପାରନ୍ତି । ତାଙ୍କ ବୟସ ବି ୭୩ ପାଖାପାଖି । ଉଭୟ ନିରଞ୍ଜନ ଓ ଜୟଦେବ ଶେଷ ଥର ପାଇଁ ୨୦୦୪ରେ ଜିତିଥିଲେ । ୨୦ ବର୍ଷ ପରେ ଉଭୟ ଭେଟେରାନ ପୁଣି ଥରେ ବିଜୟ ବାନା ଉଡ଼ାଇ ପାରିବେ କି ନାହିଁ, ତାହା ସବୁଠୁ ବଡ଼ ପ୍ରଶ୍ନ ।