ଭୁବନେଶ୍ୱର,୦୭/: ରାଜଧାନୀରେ ୨୪ ଘଣ୍ଟାରେ ୪ ମୁଣ୍ଡ ଗଡିଛି ।  ଜୋନ୍‌-୨ର ଏୟାରଫିଲ୍ଡ ଥାନା ଓ ଚନ୍ଦକା ଅଧୀନରେ ଘଟିଛି ।  ସବୁଠୁ ନୃଶଂସ ହତ୍ୟା ଥାନା ଠାରୁ ମାତ୍ର ୨୦୦ ମିଟର ନିକଟରେ ଘଟିଛି । ପୋଖରୀପୁଟ ଓଭରବ୍ରିଜ୍‌ ତଳ କେଳା ବସ୍ତିରେ ଜଣେ ୪ ବର୍ଷର ନିଷ୍ପାପ ଶିଶୁକନ୍ୟାକୁ ବଳାତ୍କାର ପରେ ତଣ୍ଟି କାଟି ହତ୍ୟା କରାଯାଇଛି । ଏହି ଜଘନ୍ୟ ହତ୍ୟାକାଣ୍ଡ ଜଣେ ନିଶାଖୋର ପଡ଼ୋଶୀର ବୋଲି ପୁଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି । 

ସେହିପରି ପୁନାମା ଗେଟ୍‌ ନିକଟ ଅରବିନ୍ଦନଗରରୁ ଆଉ ଏକ ବଧୂହତ୍ୟା ଘଟଣା ସାମ୍ନାକୁ ଆସିଛି । ସୁରଜ ଦାଶଙ୍କ ଘରୁ ୨୪ ବର୍ଷୀୟ ମହିଳା ପ୍ରିୟଙ୍କା ମିଶ୍ରଙ୍କ ଝୁଲନ୍ତା ମୃତଦେହ ମିଳିଛି । ପ୍ରିୟଙ୍କାଙ୍କ ପରିବାର ଲୋକ ୫ ଲକ୍ଷ ଟଙ୍କା ଯୌତୁକ ପାଇଁ ହତ୍ୟା ଅଭିଯୋଗ ଆଣିଛନ୍ତି । ପ୍ରିୟଙ୍କାଙ୍କୁ ହତ୍ୟା କରି ଟାଙ୍ଗି ଦେଇ ଆତ୍ମହତ୍ୟାର ରୂପ ଦେବାକୁ ଚେଷ୍ଟା କରୁଥିବା ସେମାନେ ଏତଲାକପିରେ ଦର୍ଶାଇଛନ୍ତି । 

ସେହିପରି ଖୋର୍ଦ୍ଧା ତାପଙ୍ଗର ୨୭ ବର୍ଷୀୟ ଅଞ୍ଜଳି ବେହେରା ୩ ଦିନ ତଳେ ସୁନ୍ଦରପଦା ଅଞ୍ଚଳର କ୍ଷେତ୍ରପାଳ ନଗରରେ ଥିବା ପ୍ରେମିକଙ୍କ ଘରକୁ ପଳାଇ ଆସିଥିଲେ । ପ୍ରେମ ପାଇଁ ଜିଦ୍‌ ଧରି ଘର ସାମ୍ନାରେ ବସିଥିବା ସ୍ଥାନୀୟ ବାସିନ୍ଦା ଦେଖିଥିଲେ । ସୋମବାର ସକାଳୁ ପ୍ରେମିକ ଘରୁ ପ୍ରେମିକାର ଝୁଲନ୍ତା ମୃତଦେହ ମିଳିଛି । ପରିବାର ଲୋକଙ୍କ ଅଭିଯୋଗକ୍ରମେ ପୁଲିସ ହତ୍ୟା ମାମଲା ରୁଜୁ କରିଛି । ପ୍ରେମିକକୁ ଥାନାରେ ଅଟକ ରଖି ପଚରାଉଚରା କରୁଛି।

ସେହିପରି ଚନ୍ଦକା ଗୋଠପାଟଣା ଥାନା ଅଞ୍ଚଳ‌ରେ ଜଣେ ମହିଳାଙ୍କୁ ବିଭତ୍ସ ଭାବେ ହତ୍ୟା। ମହିଳାଙ୍କୁ ଛୁରୀ ଭୁଷି ହତ୍ୟା କରାଯାଇଥିବା ସନ୍ଦେହ କରାଯାଉଛି। ମୃତ ମହିଳା ଜଣକ କିଷ୍ନାପୁରୀ କଲୋନୀ ରହୁଥିବା ସସ୍ମିତା ବେହେରା(୩୫) ବୋଲି ଜଣାପଡିଛି। ଘଟଣାସ୍ଥଳରେ ପୋଲିସ ଓ ସାଇଣ୍ଟିଫିକ୍ ଟିମ୍ ପହଞ୍ଚି ତଦନ୍ତ ଆରମ୍ଭ କରିଛି।