ଭୁବନେଶ୍ୱର, ୨୧।୮: ସିନ୍ଧିଚୋର ଓ ଲୁଟେରାଙ୍କ ଆତଙ୍କରେ ଅଣନିଶ୍ୱାସୀ ହୋଇପଡି଼ଲେଣି ରାଜଧାନୀବାସିନ୍ଦା । ଜନଗହଳିପୂର୍ଣ୍ଣ ରାସ୍ତାରେ ଛିନ୍ତାଇ, ଘରେ ପଶି ସୁନା ଅଳଙ୍କାର ଚୋରି କରିବା ନିତିଦିନିଆ ଘଟଣା । ଖୋଦ୍ ବିଚାରପତି ବି ସହରରେ ସୁରକ୍ଷିତ ନୁହନ୍ତି । ବଡ଼ଗଡ଼ ଥାନା ଅଞ୍ଚଳରୁ ଜଣେ ବିଚାରପତିଙ୍କ ସରକାରୀ ବାସଭବନରେ କଳାକନା ବୁଲାଇଛନ୍ତି ସିନ୍ଧିଚୋର । ବଡ଼ କଥା ହେଲା, ବିଚାରପତିଙ୍କ ଘର ସାମ୍ନାରେ ପୁଲିସ ଜଗି ରହିଥିଲା । ତଥାପି ଘରୁ ୩୦ ଲକ୍ଷ ଟଙ୍କାର ସୁନା ଅଳଙ୍କାର ଓ ଅନ୍ୟାନ୍ୟ ଆସବାବପତ୍ର ଚୋରି ହୋଇଛି । ଚୋରମାନେ ତାଙ୍କ ଘରେ ଲାପ୍ଟପ ଭାଙ୍ଗିଛନ୍ତି । ବାଥ୍ରୁ୍ମରୁ ପାଣି ଟ୍ୟାପ୍ ଓ ସାୱାର ତାଡି଼ ନେଇଛନ୍ତି । ସିନ୍ଧିଚୋରିର ଶିକାର ହୋଇଛନ୍ତି ଦେବୋତ୍ତର ସହକାରୀ ଆୟୁକ୍ତ ତଥା ବିଚାରପତି ଶିଶିର କୁମାର ସାହୁ । ସେ ବିଜେବି ନଗରରେ ଥିବା ସରକାରୀ ବାସଭବନ (୩ଆର୩) ରେ ରହୁଛନ୍ତି । ତାଙ୍କ ଘର ସାମ୍ନାରେ ପୁଲିସ କର୍ମଚାରୀ ଜଗି ରହୁଛନ୍ତି ।
ଶନିବାର ସେ ସପରିବାର ଯାଜପୁରସ୍ଥିତ ଭଉଣୀ ଘରକୁ ଯାଇଥିଲେ । ଯିବା ପୂର୍ବରୁ ଏନେଇ ସେ ସ୍ଥାନୀୟ ପୁଲିସକୁ ଜଣାଇଥିଲେ । ୨ଜଣ ହୋମଗାର୍ଡ ମଧ୍ୟ ଦିନରାତି ପଇଁତରା ମାରୁଥିଲେ । ଯାଜପୁରରେ ରାଖୀ ପୂର୍ଣ୍ଣିମା ପାଳିବା ପରେ ସୋମବାର ସନ୍ଧ୍ୟାରେ ଫେରି ତାଙ୍କ ଘରେ ଚୋରି ହୋଇଥିବା ଜାଣିବାକୁ ପାଇଥିଲେ । ଘର ପଛପଟ ଝରକା ତାଡି଼ ଚୋରମାନେ ବାସଭବନରେ ପଶିଥିଲେ । ଆଲମିରା ଭାଙ୍ଗି ୨ଟା ସୁନା ହାର, ୧୨ଟା ମୁଦି, ୮ ହଳ ଚୁଡି଼, ୫ ହଳ ବାହୁଟି, ୩ ହଳ ରୁପା ପାଉଁଜି ଓ ଅନ୍ୟାନ୍ୟ ସୁନା ଗହଣା ସହ ପିତଳ ବାସନ ଚୋରି କରି ନେଇଥିଲେ । ତାଙ୍କ ଶୋଇବା ଘରେ ରଖାଯାଇଥିବା ଲାପଟପ ଭାଙ୍ଗିଦେଇଥିଲେ । ଏମିତିକି ବାଥ୍ରୁମ୍ରୁ ପାଣି ଟ୍ୟାପ୍ ନେଇ ଯାଇଥିଲେ । ଏ ବାବଦରେ ବିଚାରପତିଜଣକ ପୁଲିସକୁ ଅବଗତ କରିଥିଲେ । ସାଇଣ୍ଟିଫିକ୍ ଦଳ ସହ ବଡ଼ଗଡ଼ ଥାନା ପୁଲିସ ଘଟଣାସ୍ଥଳରେ ପହଞ୍ଚି ଯାଞ୍ଚ କରିଥିଲେ । ଆଖାପାଖର ସିସି କ୍ୟାମେରା ଯାଞ୍ଚ କରିଥିଲେ । ଦୀର୍ଘ ସମୟର ତନାଘନା ପରେ ପୁଲିସ ୪ଜଣ ନାବାଳକ ଚୋରଙ୍କୁ କାବୁ କରିଛି । ସେମାନଙ୍କଠାରୁ ଚୋରି ହୋଇଥିବା ସୁନା ଗହଣା ଓ ଅନ୍ୟ ଆସବାବପତ୍ର ଜବତ କରିଛି ।
