ନୂଆଦିଲ୍ଲୀ,୧୪/୦୯: କାର୍‌ଗୁଡିକରେ ୬ ଏୟାର୍‌ବ୍ୟାଗ୍‌କୁ ସରକାର ବାଧ୍ୟତାମୂଳକ କରିବେ ନାହିଁ । କେନ୍ଦ୍ର ସଡ଼କ ପରିବହନ ଏବଂ ରାଜପଥ ମନ୍ତ୍ରୀ ନିତିନ ଗଡକରୀ ଏହା ସ୍ପଷ୍ଟ କରିଛନ୍ତି । 

ସୂଚନାଯୋଗ୍ୟ,  ସରକାର ଗତବର୍ଷ କାରରେ ଲୋକଙ୍କ ସୁରକ୍ଷା ବଢ଼ାଇବା  ପାଇଁ ଅକ୍ଟୋବର ୧ରୁ ପ୍ରତ୍ୟେକ ଭାରିଆଣ୍ଟରେ ୬ଟି ଏୟାର୍‌ବ୍ୟାଗ୍‌କୁ ବାଧ୍ୟତାମୂଳକ କରିବା ଲାଗି ଏକ ପ୍ରସ୍ତାବ  ରଖିଥିଲେ । ଗଡକରୀ କହିଛନ୍ତି ଯେ, ଆଜିର ବଜାରରେ ୬  ଏୟାର୍‌ବ୍ୟାଗ୍‌ର ଆବଶ୍ୟକତା ଢ଼େର୍‌ ରହିଛି । କମ୍ପାନିଗୁଡ଼ିକୁ  ପ୍ରତିଯୋଗିତା ମଧ୍ୟରେ ତିଷ୍ଠି ରହିବା ପାଇଁ ୬ଟି ଏୟାର୍‌ବ୍ୟାଗ୍‌  ଦେବାକୁ ପଡ଼ିବ । ଯେଉଁ କମ୍ପାନି ଏହା କରିବେ ନାହିଁ  ସେମାନଙ୍କ ବିକ୍ରି ପ୍ରଭାବିତ ହେବ । 

ବୁଧବାର ଦିଲ୍ଲୀରେ  ଏକ କାର୍ଯ୍ୟକ୍ରମରେ ଉଦ୍‌ବୋଧନ ଦେଇ ଗଡକରୀ କହିଛନ୍ତି  ଯେ, କେତେକ କମ୍ପାନି ଏବେ ନିଜେ ୬ଟି ଏୟାର୍‌ବ୍ୟାଗ୍‌ ଦେଉଛନ୍ତି । ଆମେ କାର ପାଇଁ ୬ ଏୟାର୍‌ବ୍ୟାଗ୍‌ ନିୟମକୁ ବାଧ୍ୟତାମୂଳକ କରିବାକୁ ଚାହୁଁନା । ଦେଶରେ ଚାଲୁଥିବା  କାର କେତେ ସୁରକ୍ଷିତ ତାହାକୁ ଏବେ ଭାରତୀୟ ଏଜେନ୍ସି  ନିର୍ଦ୍ଧାରଣ କରିବେ । 

ଏଥିପାଇଁ ଭାରତୀୟ ଏଜେନ୍ସି ଭାରତ  ନ୍ୟୁ କାର ଆସେସ୍‌ମେଣ୍ଟ ପ୍ରୋଗ୍ରାମ(ଭାରତ ଏନ୍‌ସିଏପି  ବା ବିଏନ୍‌ସିଏପି)କୁ ଅଗଷ୍ଟ ୧ରୁ ଲଞ୍ଚ୍‌ କରାଯାଇଛି । ଏହା  ଅକ୍ଟୋବର ୧ରୁ ସେଫ୍ଟି ରେଟିଂ ଦେବ । ପୂର୍ବରୁ ଦୁଇଟି ବିଦେଶୀ  ଏଜେନ୍ସି ଭାରତୀୟ କାରଗୁଡ଼ିକୁ ସେଫ୍‌ଟି ରେଟିଂ ଦେଉଥିଲେ ।  କାରଗୁଡ଼ିକୁ ୦ରୁ ୫ ଷ୍ଟାର୍‌ ପର୍ଯ୍ୟନ୍ତ ରେଟିଂ ଦିଆଯାଇଥାଏ । ୦  ଅର୍ଥାତ୍‌ ବିପଦ ଏବଂ ୫ ଅର୍ଥାତ୍‌ ସମ୍ପୂର୍ଣ୍ଣ ନିରାପଦ ।