ଭୁବନେଶ୍ୱର,୦୪/୦୪: ୫-ଟି ଅଧ୍ୟକ୍ଷ କାର୍ତ୍ତିକ ପାଣ୍ଡିଆନଙ୍କ ସୁରକ୍ଷା ସମ୍ପର୍କରେ ନକଲି ଆର୍ଟିଆଇ ତଥ୍ୟ ଉପସ୍ଥାପନ କରିବା ଅଭିଯୋଗରେ କମିଶନରେଟ୍ ପୁଲିସ ୩ ସୂଚନା ଅଧିକାର କର୍ମୀଙ୍କ ବିରୋଧରେ ମାମଲା ରୁଜୁ କରିଛି । ଏନେଇ ପୁଲିସ କମିଶନର ସଞ୍ଜିବ ପଣ୍ଡା ଏକ ସାମ୍ବାଦିକ ସମ୍ମିଳନୀରେ କହିଛନ୍ତି, କମିଶନରେଟ୍ ପୁଲିସ ପକ୍ଷରୁ ସେଭଳି କୌଣସି ଦଲିଲ୍ ଦିଆଯାଇନି । ଯେଉଁ ସୂଚନା ଅଧିକାର କର୍ମୀମାନେ ଏଭଳି ନକଲି ତଥ୍ୟ ଆଧାରରେ ୫-ଟି ଅଧ୍ୟକ୍ଷଙ୍କ ବିରୋଧରେ ଅଭିଯୋଗ ଆଣିଛନ୍ତି, ସେମାନଙ୍କ ନାଁରେ ସହିଦନଗର ଥାନାରେ କେସ ନଂ.୧୯୩/୨୪ ରୁଜୁ ହୋଇଛି ।
ଅଭିଯୁକ୍ତମାନେ ହେଲେ ସୂଚନା ଅଧିକାର କର୍ମୀ ପ୍ରଦୀପ ପ୍ରଧାନ, ପ୍ରକାଶ ଦାସ ଓ ଶ୍ରୀକାନ୍ତ ପାକଳ । ସେମାନଙ୍କ ବିରୋଧରେ ଆଇପିସି ଦଫା ୪୧୯(ଛଦ୍ମବେଶରେ ଠକେଇ), ୪୨୦(ଠକେଇ), ୪୬୫(ଜାଲିଆତି), ୪୬୮(ଠକେଇ ଉଦ୍ଦେଶ୍ୟରେ ଜାଲିଆତି), ୪୬୯(ଖ୍ୟାତି ହାନି ଉଦ୍ଦେଶ୍ୟରେ ଜାଲିଆତି), ୪୭୧(ଜାଲ୍ ଦଲିଲ୍କୁ ଅସଲି ଦର୍ଶାଇବା), ୫୦୫(୧) (ଏ)(ବି) ଓ ୩୪(ଏକାଧିକ ବ୍ୟକ୍ତିଙ୍କ ସମ୍ପୃକ୍ତି) ଲଗାଯାଇଛି । ଏହାସହ ଆଇଟି ଆକ୍ଟର ସେକ୍ସନ ୬୬(ଡି) ମଧ୍ୟ ଯୋଡ଼ାଯାଇଛି । ମାମଲାର ତଦନ୍ତ ଚାଲିଛି । ଆଗକୁ କାର୍ଯ୍ୟାନୁଷ୍ଠାନ ନିଆଯିବ ।
ସୂଚନାଯୋଗ୍ୟ, ଗତ ଶୁକ୍ରବାର ରାଜ୍ୟ ସୂଚନା ଅଧିକାର ଅଭିଯାନ(ଓସା) ପକ୍ଷରୁ ଏକ ସାମ୍ବାଦିକ ସମ୍ମିଳନୀ ହୋଇଥିଲା । ୫-ଟି ଅଧ୍ୟକ୍ଷଙ୍କ ସୁରକ୍ଷା ନିମନ୍ତେ ୭୪ଜଣ ପୁଲିସ କର୍ମଚାରୀଙ୍କ ସହ ଗୋଟିଏ ଗାଡ଼ି ମଧ୍ୟ ଗୃହ ବିଭାଗ ଯୋଗାଇଥିବା ନେଇ ୩ ଅଭିଯୁକ୍ତ ସମ୍ମିଳନୀରେ ତଥ୍ୟ ରଖିଥିଲେ । କମିଶନରେଟ୍ ପୁଲିସର ରିଜର୍ଭ ବାଟାଲିୟନ କାର୍ଯ୍ୟାଳୟରୁ ଏହି ତଥ୍ୟ ମିଳିଥିବା ସେମାନେ ଦର୍ଶାଇଥିଲେ । କିନ୍ତୁ ଖୋଦ୍ ରିଜର୍ଭ ଇନ୍ସପେକ୍ଟର (ଆରଆଇ) ଭଗବାନ ପାଣିଗ୍ରାହୀ ଏହାକୁ ଖଣ୍ଡନ କରିଛନ୍ତି । ଗତ ୧ ତାରିଖରେ ଏନେଇ ଶ୍ରୀ ପାଣିଗ୍ରାହୀ ସହିଦନଗର ଥାନାରେ ଏତଲା ଦେଇଥିଲେ ।
