ପେଶାୱାର, ୦୩/୧୨: ଶନିବାର ପାକିସ୍ତାନ ଅଧିକୃତ ଗିଲଗିଟ୍ ବାଲତିସ୍ତାନରେ ବଡ଼ ଧରଣର ଆକ୍ରମଣ କରିଛନ୍ତି ଆତଙ୍କବାଦୀ । ଏକ ଯାତ୍ରୀବାହୀ ବସ୍ ଉପରକୁ ଆତଙ୍କବାଦୀ ଆକ୍ରମଣ କରିଛନ୍ତି । ଆତଙ୍କୀ ଆକ୍ରମଣରେ ୮ ଜଣଙ୍କ ମୃତ୍ୟୁ ହୋଇଥିବା ବେଳେ ୨୬ ଜଣ ଆହତ ହୋଇଥିବା ଜଣାପଡ଼ିଛି ।

ସୂଚନା ଅନୁସାରେ, ଯାତ୍ରୀବାହୀ ବସଟି ଗିଲଗିଟରୁ ରାୱାଲପିଣ୍ଡି ଅଭମୁଖେ ଯାଉଥିବା ବେଳେ ଆତଙ୍କବାଦୀ ଗୁଳିମାଡ଼ କରିଥିଲେ । ଶନିବାର ସନ୍ଧ୍ୟା ସ୍ଥାନୀୟ ସମୟ ୬ଟା ୩୦ରେ ଆତଙ୍କବାଦୀ ମାନେ ବସ୍ ଉପରକୁ ଫାୟାରିଂ କରିଥିବା ଜଣାପଡ଼ିଛି ।

ଆତଙ୍କବାଦୀ ଆକ୍ରମଣ ପରେ ବସ୍ ଉପରୁ ନିୟନ୍ତ୍ରଣ ହରାଇଥିଲେ ଚାଳକ । ଫଳରେ ବସିଟି ବିପରୀତ ଦିଗରୁ ଆସୁଥିବା ଏକ୍ ଟ୍ରକକୁ ଧକ୍କା ଦେଇଥିଲା । ଫଳରେ ୮ ଜଣଙ୍କ ମୃତ୍ୟୁ ହୋଇଥିବା ଡେପୁଟି କମିଶନର ଚିଲ୍ଲାସ ଆରିଫ୍ ଅହମଦ ସୂଚନା ଦେଇଛନ୍ତି । ଆହତ ୨୬ ଜଣଙ୍କୁ ମେଡିକାଲରେ ଭର୍ତ୍ତି କରାଯାଇଛି ।

ବସରେ ଥିବା ଯବାନଙ୍କ ମଧ୍ୟରୁ ଜଣଙ୍କର ମୃତ୍ୟୁ ହୋଇଥିବା ବେଳେ ଜଣେ ଆହତ ହୋଇଛନ୍ତି । ସୂଚନା ଅନୁସାରେ, ବସରେ ଥିବା ଅଧିକାଂଶ ଯାତ୍ରୀ କୋହିସ୍ତାନ, ପେଶାୱାର, ଘିଜର, ଚିଲ୍ଲାସ, ରୋଉନ୍ଦୁ, ସ୍କାର୍ଡୁ, ମାନଶେରା ଓ ସ୍ୱାବି ଅଞ୍ଚଳର । ଆକ୍ରମଣ ପରେ ଆତଙ୍କବାଦୀ ଖସି ପଳାଇବାରେ ସକ୍ଷମ ହୋଇଛନ୍ତି । ମୃତାହତଙ୍କ ସଂଖ୍ୟା ବୃଦ୍ଧି ପାଇବା ଆଶଙ୍କା କରାଯାଉଛି ।

ଆତଙ୍କବାଦୀ ଆକ୍ରମଣ ପରେ ତଦନ୍ତ ଆରମ୍ଭ କରିଛି ପୋଲିସ । ଆକ୍ରମଣ ନେଇ ଏଯାଏଁ କେହି ନିଜକୁ ଦାୟୀ କରି ନାହାନ୍ତି । ଏହା ପୂର୍ବରୁ ୨୦୧୩ରେ ଗିଲଗିଟ୍ ବାଲତିସ୍ତାନରେ ଆତଙ୍କବାଦୀ ଆକ୍ରମଣରେ ୯ ଜଣ ବିଦେଶୀ ପ୍ରାଣ ହରାଇଥିଲେ ।