ଚାନ୍ଦବାଲି, ୧୩।୯: ଭଦ୍ରକ ଜିଲ୍ଲା ଚାନ୍ଦବାଲି ଏନଏସି ଅନ୍ତର୍ଗତ ପାଞ୍ଚପଡ଼ାରେ ଦେଖିବାକୁ ମିଳିଛି ଅଭାବନୀୟ ଘଟଣା । ରାସ୍ତାରେ ଯାଉଥିବା ସୋଫିଆ ଇଂରାଜୀ ମିଡିୟମ୍ ସ୍କୁଲ ଗାଡ଼ିରୁ ଦୁଇ ଜଣ ପିଲା ଖସି ପଡ଼ିଥିବା ବେଳେ ଜଣେ ସାମାନ୍ୟ ଆହତ ହୋଇଛନ୍ତି । ଅନ୍ୟ ଜଣେ ଛାତ୍ରୀଙ୍କର ମୁଣ୍ଡ ଫାଟିଯାଇଥିବା ଦେଖିବାକୁ ମିଳିଛି । ଛାତ୍ରୀ ଜଣଙ୍କର ମୁଣ୍ଡ ଫାଟି ରକ୍ତ ବାହାରୁଥିବା ଦେଖି ତାଙ୍କୁ ତୁରନ୍ତ ଚାନ୍ଦବାଲି ମେଡିକାଲକୁ ନେଇ ଚିକିତ୍ସା କରି ଘରକୁ ପଠାଯାଇଛି ।

ସୂଚନା ଅନୁଯାୟୀ, ସୋଫିଆ ଇଂରାଜୀ ମିଡିୟମ୍ ସ୍କୁଲ ଗାଡ଼ି ପିଲାମାନଙ୍କୁ ନେଇ ଘରକୁ ଛାଡ଼ିବାକୁ ଯାଉଥିଲା । ଡ୍ରାଇଭରର ବେପରୁଆ ଗାଡ଼ି ଚାଳନା ଏବଂ ଗାଡ଼ିର ପଛ ଡୋର୍ ଲକ୍ ଖରାପ ଥିବାରୁ ଗାଡ଼ି ଚାଲୁଥିବା ସମୟରେ ଚାନ୍ଦବାଲି ବ୍ଲକ୍ ସମ୍ମୁଖ ରାସ୍ତାରେ ୨ଟି ସ୍କୁଲ ପିଲା ଗାଡ଼ିରୁ ତଳକୁ ଖସି ପଡ଼ିଥିଲେ l ତେବେ ପଛରୁ କୌଣସି ଗାଡ଼ି ଆସୁନଥିବାରୁ ଏକ ବଡ଼ ବିପଦରୁ ପିଲାମାନେ ରକ୍ଷା ପାଇଯାଇଥିବା ଜଣାପଡ଼ିଛି l ଏ ବାବଦରେ ସୋଫିଆ ଇଂରାଜୀ ବିଦ୍ୟାଳୟର ଚେୟାରମ୍ୟାନ୍ ରଞ୍ଜନ ଦାସ୍ ଗଣମାଧ୍ୟମ ସାମ୍ନାରେ କୌଣସି ପ୍ରତିକ୍ରିୟା ରଖିବାକୁ ମନା କରିଥିବା ବେଳେ ଉକ୍ତ ଗାଡ଼ିଟିର ଫିଟନେସ୍ ନଥିବା ପ୍ରକାଶ କରିଛନ୍ତି । ଗାଡିଟି ଫିଟନେସ୍ ପାଇଁ ଯାଇଥିବା ବେଳେ RTO ରିଜେକ୍ଟ କରିଥିବା କଥା କହିଛନ୍ତି । ତଦନ୍ତ କରି କାର୍ଯ୍ୟାନୁଷ୍ଠାନ ନିଆଯିବ ବୋଲି ଚାନ୍ଦବାଲି ଗୋଷ୍ଠୀ ଶିକ୍ଷା ଅଧିକାରୀ ଦାୟିତ୍ୱରେ ଥିବା ପ୍ରଣୟ ନାୟକ ପ୍ରକାଶ କରିଛନ୍ତି l ତେବେ ସରକାରୀ ନିୟମକୁ ଫୁ କରି ଭଙ୍ଗା ଦଦରା ଗାଡ଼ିରେ କୋମଳମତି ଶିଶୁଙ୍କୁ ବୋହୁଥିବା ସ୍କୁଲ ପ୍ରତି ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ସାଧାରଣରେ ଦାବି ହୋଇଛି l