ଫିରିଙ୍ଗିଆ, ୨୭/୧: କନ୍ଧମାଳ ଜିଲ୍ଲା ଗୋଚ୍ଛାପଡ଼ା ଓ ଥାନା ଅଞ୍ଚଳରେ ମାଓବାଦୀଙ୍କ ଉପସ୍ଥିତି ବିଷୟ କାହାକୁ ଅଛପା ନୁହେଁ । ଏହି ଅଞ୍ଚଳରେ ମାଓ ପୋଷ୍ଟର, ବ୍ୟାନର ଲାଗିବା ଏକ ସାଧାରଣ ଘଟଣା । ତେବେ ଶନିବାର ସକାଳୁ ଗୋଚ୍ଛାପଡ଼ା ଅଞ୍ଚଳରେ ମାଓ ବିରୋଧୀ ପୋଷ୍ଟର ଦେଖିବାକୁ ମିଳିଛି । ଗୋଚ୍ଛାପଡ଼ା, ପକାରୀ, ବାଲନ୍ଦାପଡ଼ା, ଲୁଇସିଂ, ଡାଙ୍ଗେଣାମା, ଟେଟେଲପଡ଼ା, ସୁପଲା, ସୁଟେଣୀ ଘାଟି ସମେତ ବିଭିନ୍ନ ସ୍ଥାନରେ ଏଭଳି  ପୋଷ୍ଟର ଲାଗିଛି । ବିଭିନ୍ନ ଗଛରେ ପୋଷ୍ଟର ଲାଗିଥିବା ବେଳେ ରାସ୍ତାରେ ମଧ୍ୟ ପୋଷ୍ଟର ପଡ଼ିଥିବା ଦେଖିବାକୁ ମିଳିଛି । 

ମାଓ ବିରୋଧୀ ମଞ୍ଚ ପକ୍ଷରୁ ଲାଗିଥିବା ଏହି ପୋଷ୍ଟରରେ ଲୋକଙ୍କୁ ମାଓ ସଙ୍ଗଠନରେ ସାମିଲ ନ ହେବା ପାଇଁ ପରାମର୍ଶ ଦିଆଯାଇଛି । ମାଓବାଦୀମାନେ ସରଳ ଲୋକଙ୍କୁ ବିଭିନ୍ନ ଆଳ ଦେଖାଇ ସଙ୍ଗଠନରେ ସାମିଲ କରୁଥିବା ଏବଂ ପରେ ସେମାନଙ୍କୁ ନିର୍ଯାତନା ଦେଉଥିବା କୁହାଯାଇଛି । ମାଓ ସଙ୍ଗଠନକୁ ବିକାଶର ବିରୋଧୀ ବୋଲି ମଧ୍ୟ ପୋଷ୍ଟରରେ କୁହାଯାଇଛି । ତେଣୁ ଏହି ସଙ୍ଗଠନ ବିରୋଧକୁ ସମର୍ଥନ ନ ଜଣାଇବା ପାଇଁ ସତର୍କ କରାଯାଇଛି । ତେବେ ଏହି ପୋଷ୍ଟର ସବୁ କିଏ ମାରିଛି, ସେ ସମ୍ପର୍କରେ କିଛି ଜଣାପଡ଼ିନାହିଁ ।