ନୂଆଦିଲ୍ଲୀ: ଲିଭ୍-ଇନ୍ ରିଲେସନଶିପକୁ କେନ୍ଦ୍ର କରି ଦେଶରେ ଅନେକ ଭୟଙ୍କର ଘଟଣା ସାମ୍ନାକୁ ଆସିବାରେ ଲାଗିଛି । ଇତିମଧ୍ୟରେ ଲିଭ୍-ଇନ୍ ରିଲେସନଶିପକୁ ଏକ ମାରାତ୍ମକ ରୋଗର ଆଖ୍ୟା ଦେବା ସହ ଏହା ବିରୁଦ୍ଧରେ କଠୋର ଆଇନ ଆଣିବାକୁ ଆଜି ସଂସଦରେ ଦାବି କରିଛନ୍ତି ବିଜେପି ସାଂସଦ ଧରମବୀର ସିଂହ । ଲୋକସଭାର ଶୂନ୍ୟକାଳରେ ଏନେଇ କହିବା ସହ ‘ଛାଡ଼ପତ୍ର’ ମାମଲାକୁ ନେଇ ମଧ୍ୟ ବିସ୍ଫୋରକ ମନ୍ତବ୍ୟ ଦେଇଛନ୍ତି ସାଂସଦ । ସେ କହିଛନ୍ତି ପ୍ରେମ ବିବାହରେ ଛାଡ଼ପତ୍ର ମାମଲା ବୃଦ୍ଧି ପାଉଛି । ତେଣୁ ପ୍ରେମ ବିବାହକୁ ଯୁବକ ଏବଂ ଯୁବତୀଙ୍କ ବାପା-ମା ଅନୁମତି ଦେବା ବାଧ୍ୟତାମୂଳକ ହେଉ ବୋଲି ସେ ଦାବି ମଧ୍ୟ କରିଛନ୍ତି ।
ସେ ଆହୁରି ମଧ୍ୟ କହିଛନ୍ତି ଯେ, ‘ମୁଁ ସଂସଦ ଓ ସରକାରଙ୍କ ସମ୍ମୁଖରେ ଏକ ଗମ୍ଭୀର ପ୍ରସଙ୍ଗ ଉଠାଇବାକୁ ଚାହୁଁଛି । ଭାରତର ସଂସ୍କୃତି ବସୁଧୈବ କୁଟୁମ୍ୱକମ୍ ପାଇଁ ବିଶ୍ୱରେ ପରିଚିତ । ଆମ ସାମାଜିକ ଚଳନି ଦୁନିଆର ଅନ୍ୟ ଦେଶଠାରୁ ଭିନ୍ନ । ସାରା ଦୁନିଆ ହିଁ ଆମ ବିବିଧତାରେ ଏକତା ସଂସ୍କୃତିରେ ପ୍ରଭାବିତ । ଭାରତରେ ବାପା-ାଆଙ୍କ ସମ୍ମତି ଓ ସମ୍ପର୍କୀୟଙ୍କ ସହମତିରେ ବିବାହକୁ ଗୁରୁତ୍ୱ ଦିଆଯାଉଛି । ବିବାହରେ ପୁଅ ଓ ଝିଅଙ୍କ ସହମତି ବ୍ୟତୀତ ପରିବାରର ସହମତି ମଧ୍ୟ ରହିଥାଏ । ଆରେଞ୍ଜ ମ୍ୟାରେଜରେ ଅନେକ ଦିଗ ଉପରେ ଗୁରୁତ୍ବ ଦିଆଯାଏ।’
ଭିଓ୍ବାନି-ମହେନ୍ଦ୍ରଗଡ଼ର ବିଜେପି ସାଂସଦ କହିଛନ୍ତି ଯେ, ଭାରତୀୟ ସଂସ୍କୃତିରେ ବିବାହାକୁ ୭ ଜନ୍ମର ବନ୍ଧନ ଭାବେ ବିବେଚନା କରାଯାଏ । ଭାରତରେ ଛାଡ଼ପତ୍ର ହାର ୧.୧ ପ୍ରତିଶତ ଥିବା ବେଳେ ଆମେରିକାରେ ୪୦ ପ୍ରତିଶତ ବିବାହ ବିଚ୍ଛେଦ ହେଉଛି । ତେବେ ଆରେଞ୍ଜ ମ୍ୟାରେଜରେ ଛାଡ଼ପତ୍ର ହାର ବହୁତ କମ । କିନ୍ତୁ ନିକଟରେ ବିବାହ ବିଚ୍ଛେଦ ସଂଖ୍ୟା ବୃଦ୍ଧି ପାଇଛି ଏବଂ ଏହାର ମୁଖ୍ୟ କାରଣ ହେଉଛି ପ୍ରେମ ବିବାହ ବୋଲି ସେ କହିଛନ୍ତି ।
ସେପଟେ ବିବହା ବିନା ପୁଅ-ଝିଅ ଏକାଠି ରହିବାକୁ ଲିଭ-ଇନ ରିଲେସନଶିପ କୁହାଯାଉଥିବା ବେଳେ ଏହା ଏକ ଗୁରୁତର ରୋଗ ଏବଂ ସାମାଜିକ ଶତ୍ରୁ ବୋଲି କହିଛନ୍ତି ଧରମବୀର ସିଂହ । ସାଂସଦ କହିଛନ୍ତି ଯେ ମୋ ମତରେ ଲଭ୍ ମ୍ୟାରେଜରେ ବି ମାଆ-ବାପାଙ୍କ ମଞ୍ଜୁରି ବାଧ୍ୟତାମୂଳକ ହେବା ଦରକାର । ଏହାରି ଭିତରେ ଆଉ ଏକ ରୋଗ ଆରମ୍ଭ ହୋଇଛି, ଯାହାକୁ ଲିଭ୍-ଇନ୍ ରିଲେସନଶିପ କୁହାଯାଉଛି । ଏଥିରେ ଦୁଇ ଜଣ ବିନା ବିବାହରେ ବି ଏକାସଙ୍ଗରେ ରହୁଛନ୍ତି । ବିଜେପି ସାଂସଦ ଦିଲ୍ଲୀର ଶ୍ରଦ୍ଧା ହତ୍ୟା ମାମଲା ସଂପର୍କରେ ମଧ୍ୟ ଉଲ୍ଲେଖ କରିଛନ୍ତି ।
ଲିଭ-ଇନ ରିଲେସନଶିପ ଯେ କେବଳ ଆମ ସଂସ୍କତିକୁ ପ୍ରଭାବିତ କରୁଛି ତାନୁହେଁ ବରଂ ସମାଜରେ ଘୃଣା ସୃଷ୍ଟି କରୁଛି । ଯଦି ଏଭଳି ଜାରି ରହେ ତେବେ ଆମ ସଂସ୍କୃତିର ମୃତ୍ୟୁ ହୋଇଯିବ । ଏହା ସହ ଆମର ଏବଂ ଅନ୍ୟମାନଙ୍କ ମଧ୍ୟରେ କୌଣସି ପ୍ରଭେଦ ରହିବ ନାହିଁ ବୋଲି ସେ କହିଛନ୍ତି । ତେଣୁ ଲିଭ-ଇନ ରିଲେସଶିପ୍ ବିରୁଦ୍ଧରେ କଠୋର ଆଇନ୍ ଆଣିବା ଲାଗି ଗୃହରେ ମନ୍ତ୍ରୀଙ୍କୁ ନିବେଦନ କରିଛନ୍ତି ବିଜେପି ସାଂସଦ ଧରମବୀର ସିଂହ ।
