ସମ୍ବଲପୁର,୧୫/୯ :  ଗଣପର୍ବ ନୂଆଁଖାଇରେ ବିଧାନସଭା ବାଚସ୍ପତି ନିର୍ବାଚନ ରଖିଛନ୍ତି ସରକାର । ଏହାକୁ ବିରୋଧ କରାଯିବା ପରେ ବି ନିର୍ବାଚନ ଜାଣିଶୁଣି ଘୁଞ୍ଚାଉ ନାହାନ୍ତି । ଯାହାକୁ ତୀବ୍ର ବିରୋଧ କରି ଆସନ୍ତା ୨୧ତାରିଖରେ ହେବାକୁ ଥିବା ବିଧାନସଭା ବାଚସ୍ପତି ନିର୍ବାଚନକୁ ବର୍ଜନ କରିବ ବିଜେପି । ନିର୍ବାଚନବେଳେ ନୂଆଁଖାଇ ପଡୁଥିବାରୁ ଏହାକୁ ବର୍ଜନ କରିବାକୁ ଦଳ ନିଷ୍ପତ୍ତି ନେଇଛି । ସମ୍ବଲପୁର ବିଜେପି କାର୍ଯ୍ୟାଳୟରେ ସାମ୍ବାଦିକ ସମ୍ମିଳନୀ କରି ଏହି ସୂଚନା ଦେଇଛନ୍ତି ବିଜେପି ରାଜ୍ୟ ଉପ ସଭାପତି ତଥା ରେଙ୍ଗାଲି ବିଧାୟକ ନାଉରୀ ନାଏକ । 

ବିରୋଧୀ ଦଳ ନେତା ତଥା ସମ୍ବଲପୁର ବିଧାୟକ ଜୟନାରାୟଣ ମିଶ୍ର ଓ ବିଜେପି ରାଜ୍ୟ ସଭାପତି ମନମୋହନ ସାମଲଙ୍କ ପରାମର୍ଶ କ୍ରମେ ଏହି ନିଷ୍ପତ୍ତି ନିଆଯାଇଥିବା ଶ୍ରୀ ନାଏକ କହିଛନ୍ତି । ଏହାସହ ସେ କହିଛନ୍ତି, ଚଳିତ ବର୍ଷ ପଶ୍ଚିମ ଓଡ଼ିଶାର ମହାନ କୃଷି ଭିତ୍ତିକ ଗଣପର୍ବ ନୂଆଁଖାଇ ୨୦ତାରିଖରେ ପାଳନ ହେବ। ଏହାର ପରଦିନ ଅର୍ଥାତ ୨୧ ତାରିଖ ନୂଆଁଖାଇ ଭେଟଘାଟ୍ ହେବ । ନୂଆଁଖାଇ ଭଳି ଏହି ଦିନର ମହତ୍ତ୍ୱ ରହିଛି । ତେଣୁ ୨୧ତାରିଖ ଦିନ ଅର୍ଥାତ୍ ନୂଆଁଖାଇ ପରଦିନ ପଶ୍ଚିମ ଓଡ଼ିଶାର କୌଣସି ବିଧାୟକ ଭୁବନେଶ୍ଵର ଯାଇ ବିଧାନସଭାରେ ଉପସ୍ଥିତ ରହିବା ସମ୍ଭବପର ନୁହେଁ । ଏହି ତାରିଖକୁ ପରିବର୍ତ୍ତନ କରିବା ପାଇଁ ଅନୁରୋଧ କଲା ପରେ ମଧ୍ଯ ସରକାର ନିଜ ଜିଦରେ ଅଟଳ ରହିଛନ୍ତି । ସରକାରଙ୍କ ଏଭଳି ନିଷ୍ପତ୍ତି ସମ୍ପୂର୍ଣ୍ଣ ଅଗଣତାନ୍ତ୍ରିକ ଓ ଜିଦଖୋର୍ ମନୋବୃତ୍ତିକୁ ପ୍ରଦର୍ଶିତ କରୁଛି । ତତସଙ୍ଗେ ଚିରାଚରିତ ଢଙ୍ଗରେ ପଶ୍ଚିମ ଓଡ଼ିଶା ପ୍ରତି ରାଜ୍ୟ ସରକାରଙ୍କ ରହିଥିବା ବୈମାତୃକ ମନୋଭାବକୁ ପୁନଃପ୍ରମାଣିତ କରୁଛି । ତେଣୁ ରାଜ୍ୟର ମୁଖିଆ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ବିଷୟରେ ହସ୍ତକ୍ଷେପ କରି ଗଣତାନ୍ତ୍ରିକ ବ୍ୟବସ୍ଥାକୁ ସୁଦୃଢ଼ କରିବା ପାଇଁ ଚେଷ୍ଟା କରିବା ଦରକାର । ବିଧାନସଭାର ସମ୍ମାନ ରକ୍ଷା ପାଇଁ ନିରପେକ୍ଷ, ଗଠନାତ୍ମକ ପଦକ୍ଷେପ ଗ୍ରହଣ କରିବାର ଆବଶ୍ୟକତା ରହିଛି ବୋଲି ଶ୍ରୀ ନାଏକ କହିଛନ୍ତି ।

     ଓଡ଼ିଶା ବିଧାନସଭାର ବାଚସ୍ପତି ନିର୍ବାଚନ ପାଇଁ ୧୮ରେ ନାମାଙ୍କନପତ୍ର ଦାଖଲ କରାଯିବ । ୨୧ତାରିଖରେ ନିର୍ବାଚନ ହେବା ନେଇ ବିଜ୍ଞପ୍ତି ପ୍ରକାଶ ପାଇଛି । ଏହାକୁ ନେଇ ରାଜ୍ୟ ରାଜନୀତି ଏବେ ସରଗରମ ହୋଇଛି । ପୂର୍ବରୁ କଂଗ୍ରେସ ମଧ୍ୟ ବର୍ଜନ କରିସାରିଛି । ଏହି ସମୟରେ ଗଣେଶ ପୂଜା ଓ ନୂଆଁଖାଇ ରହୁଥିବାରୁ ବିବାଦ ବଢ଼ିବାରେ ଲାଗିଛି । ଆଜି ସମ୍ବଲପୁର ସାମ୍ବାଦିକ ସମ୍ମିଳନୀରେ ଶ୍ରୀ ନାଏକଙ୍କ ସହ ସମ୍ବଲପୁର ବିଜେପି ଜିଲ୍ଲା ସଭାପତି ଗିରିଶ ପଟେଲ, ବିଜେପି କ୍ଷେତ୍ରୀୟ ପ୍ରବକ୍ତା ତଥା ଗଣମାଧ୍ୟମ ସଂଯୋଜକ ମାନସ ରଞ୍ଜନ ବକ୍ସି, ଜିଲ୍ଲା ଗଣମାଧ୍ୟମ ସଂଯୋଜକ ସଞ୍ଜୟ ଷଡ଼ଙ୍ଗୀ, ଜିଲ୍ଲା ଯୁବ ମୋର୍ଚ୍ଚା ସଭାପତି ଅଶ୍ଵିନୀ ମାଝୀ ଏବଂ ଓ ମହିଳା ମୋର୍ଚ୍ଚା ସଭାନେତ୍ରୀ ଅନ୍ନପୂର୍ଣ୍ଣା ବାରିକ ଉପସ୍ଥିତ ଥିଲେ ।