କେନ୍ଦୁଝର, ୨୫।୨: ଚମ୍ପୁଆ ଥାନା ଅଞ୍ଚଳରେ କ୍ରମଶଃ ବୃଦ୍ଧି ପାଉଛି ଚୋରି, ଲୁଟ୍ ଭଳି ଘଟଣା । ଶନିବାର ପୁଣି ଏକ ଏଟିଏମ୍ ଲୁଟ୍ ଉଦ୍ୟମ ଭଳି ଘଟଣା ସାମ୍ନାକୁ ଆସିଛି । ଗତ ବିଳମ୍ବିତ ରାତି ପ୍ରାୟ ୨ଟା ସମୟରେ ୪ରୁ୫ ଜଣ ଦୁବୃର୍ତ୍ତ ଏକ ବୋଲେରୋ ଗାଡ଼ିରେ ଆସି ଚିମିଳାଠାରେ ଥିବା ଏସବିଆଇ ଶାଖାର ଏଟିଏମ୍ କାଉଣ୍ଟର ଭଙ୍ଗାରୁଜା କରିବା ସହ ଲୁଟ୍ ଉଦ୍ୟମ କରୁଥିଲେ । ଠିକ୍ ଏତିକିବେଳେ ଭଙ୍ଗାରୁଜା ଶବ୍ଦ ଶୁଣି ନିକଟରେ ରହୁଥିବା ଜଣେ ବ୍ୟକ୍ତିଙ୍କ ନିଦ ଭାଙ୍ଗିଯାଇଥିଲା । ସେ ବାହାରେ ଆସି ଦେଖିବା ବେଳକୁ ଏସବିଆଇ ଏଟିଏମ୍ କାଉଣ୍ଟରକୁ କିଛି ଦୃବୃର୍ତ୍ତ ଭଙ୍ଗାରୁଜା କରୁଛନ୍ତି । 

ଠିକ୍ ଏହି ସମୟରେ ଦୁବୃର୍ତ୍ତଙ୍କ ନଜର ସେହି ବ୍ୟକ୍ତିଙ୍କ ଉପରେ ପଡ଼ିଥିଲା । ସେ ତୁରନ୍ତ ସେଠାରୁ ଚାଲିଯିବା ପାଇଁ ତାଙ୍କୁ ହିନ୍ଦୀ ଭାଷାରେ ଧମକ ଦେବା ସହ ଏକ ରାଉଣ୍ଡ ଫାଙ୍କା ଗୁଳି ଚଳାଇଥିଲେ । ଭୟରେ ଗ୍ରାମର ସେହି ବ୍ୟକ୍ତି ଜଣକ ସେଠାରୁ ଚାଲିଯିବା ସହ ଗ୍ରାମର କିଛି ଲୋକଙ୍କୁ ଜଣାଇବା ପରେ ଚମ୍ପୁଆ ପୋଲିସକୁ ଖବର ଦିଆଯାଇଥିଲା । ତେବେ ପୋଲିସ୍ ସେଠାରେ ପହଞ୍ଚିବା ବେଳକୁ ଦୁବୃର୍ତ୍ତମାନେ ଏଟିଏମ୍ କାଉଣ୍ଟରରେ ଲାଗିଥିବା ବ୍ୟାଟେରୀଗୁଡ଼ିକୁ ନେଇ ବୋଲେରୋରେ ଫେରାର ହୋଇଯାଇଥିଲେ । 

ସେପଟେ ଦୃବୃର୍ତ୍ତଙ୍କୁ ଧରିବା ପାଇଁ ଚମ୍ପୁଆ ପୋଲିସ୍ ପକ୍ଷରୁ ବିଭିନ୍ନ ସ୍ଥାନରେ ବ୍ଲକିଂ ଚେକିଂ କରାଯାଇଥିଲେ ବି ସେମାନଙ୍କୁ ଧରିବାରେ ସକ୍ଷମ ହୋଇପାରିନାହିଁ । ଦୁବୃର୍ତ୍ତମାନେ ଗୋଧୂଳି ରାସ୍ତା ଦେଇ ଝାଡ଼ଖଣ୍ଡକୁ ଚାଲି ଯାଇଥିବା ସନ୍ଦେହ କରାଯାଉଛି । ତେବେ ଏଟିଏମ୍‌ରେ କେତେ ଟଙ୍କା ରହିଥିଲା ଏବଂ ତାହା ସୁରକ୍ଷିତ ଅଛି ନା ନାହିଁ ତାହା ଜଣାପଡ଼ିନାହିଁ  । ଚମ୍ପୁଆ ପୋଲିସ୍ ଘଟଣାର ତନାଘନା କରିବା ସହ ଦୁବୃର୍ତ୍ତଙ୍କ ସମ୍ପର୍କରେ ପତ୍ତା ଲଗାଇବାକୁ ଚେଷ୍ଟା ଚଳାଇଛି ।